AFF Suzuki Cup សម្រេចលើកពេលទៅប្រកួតនាខែធ្នូ ឆ្នាំ២០២១
សហព័ន្ធកីឡាបាល់ទាត់អាស៊ាន (AFF) បានប្រកាសជាផ្លូវការ កាលពីថ្ងៃទី៧ ខែធ្នូ ឆ្នាំ២០២០ថា ព្រឹត្តិការណ៍បាល់ទាត់ថ្នាក់តំបន់អាស៊ីអាគ្នេយ៍ AFF Suzuki Cup ដែលគ្រោងនឹងចាប់ផ្តើមនៅខែវិច្ឆិកាឆ្នាំ២០២០ នឹងលើកទៅធ្វើឡើងនៅខែធ្នូ ឆ្នាំ២០២១ ។
ឯកឧត្តម ឧត្តមសេនីយ៍ឯក ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា និងជាប្រធានសហព័ន្ធកីឡាបាល់ទាត់អាស៊ាន (AFF) បានបញ្ជាក់នៅក្នុងសេចក្តីប្រកាសនេះថា ជានិច្ចកាល អាទិភាពទីមួយរបស់យើងគឺសុខភាព និងសុវត្ថិភាពរបស់មនុស្សគ្រប់គ្នា ដែលជាប់ទាក់ទងនឹងព្រឹត្តិការណ៍នេះ ។ ដូចនេះយើងបានឃ្លាំមើលការវិវត្តរបស់ Covid-19 ទាំងនៅក្នុងអាស៊ាន និងនៅលើពិភពលោកទាំងមូលដោយឈរលើមូលដ្ឋានជាបន្តបន្ទាប់ ។ ប្រធាន AFF ជឿជាក់ថា ការរៀបចំផែនការ AFF Suzuki Cup ដែលជាឱកាសដ៏អស្ចារ្យមួយសម្រាប់បាល់ទាត់ ក្នុងតំបន់ដូចដែលវាធ្លាប់មានកន្លងមក ហើយវាក៏ធ្វើឱ្យការប្រកួតនេះ នាខែធ្នូ ឆ្នាំ២០២១ គឺជាពេលវេលាដ៏ល្អមួយ ។
កាលបរិច្ឆេទថ្មី គឺគ្រោងនឹងចាប់ផ្តើមនៅថ្ងៃទី៥ ខែធ្នូ ២០២១ ដល់ថ្ងៃទី១ ខែមករាឆ្នាំ ២០២២ ដែលជាពេលវេលាផ្តល់ឱកាសដ៏ល្អបំផុត សម្រាប់ព្រឹត្តិការណ៍ដែលត្រូវបានរៀបចំឡើងជាទ្រង់ទ្រាយពេញលេញ សម្រាប់ការប្រកួតក្នុងផ្ទះនិងក្រៅផ្ទះទាំងវគ្គជម្រុះតាមពូល និងជាមួយកីឡដ្ឋាន ដែលពោរពេញទៅដោយអ្នកគាំទ្រ ក្នុងការលើកទឹកចិត្តនិងអបអរក្រុមរបស់ពួកគេ ។ ពានរង្វាន់ AFF Suzuki Cup គឺជាការប្រកួតបាល់ទាត់ធំជាងគេ និងមានកិត្យានុភាពបំផុតនៅអាស៊ីអាគ្នេយ៍ ហើយអ្នកគាំទ្រនឹងមើលឃើញក្រុមជម្រើសជាតិ នៃតំបន់នេះប្រកួតប្រជែងដណ្តើមជើងឯក ៕