កាណាដារំពឹងថា នឹងទទួលបានវ៉ាក់សាំង COVID-19 សរុប០៦លានដូសពីក្រុមហ៊ុន Pfizer និង Moderna នៅត្រឹមចុងខែមីនា ឆ្នាំ២០២១
កាណាដា៖ កាណាដានឹងចាប់ផ្តើមទទួលដូសដំបូងនៃវ៉ាក់សាំង COVID-19 របស់ក្រុមហ៊ុនឱសថអាមេរិក ភីហ្វីហ្សឺ នៅមុនដំណាច់ខែធ្នូឆ្នាំនេះ ឆាប់ជាងការរំពឹងទុក ហើយវ៉ាក់សាំងរាប់លានដូសបន្ថែមទៀត នឹងមកដល់នៅដើមឆ្នាំ២០២១ខាងមុខ នេះបើតាមក្រុមមន្ត្រីកាណាដា ដកស្រង់ចុះផ្សាយដោយសារព័ត៌មានរ៉យទ័រនៅថ្ងៃទី០៨ ខែធ្នូ ឆ្នាំ២០២០ ។
ថ្លែងនៅក្នុងសន្និសិទសារព័ត៌មានខ្លីមួយ នាយករដ្ឋមន្ត្រីកាណាដាលោក ចាស្ទីន ទ្រូដូ និយាយថា វាគឺជាឆ្នាំដ៏លំបាក ហើយយើងមិនទាន់រួចផុតពីវិបត្តិនេះនៅឡើយទេ ប៉ុន្តែឥឡូវនេះ វ៉ាក់សាំងនឹងមកដល់នាពេលឆាប់ៗខាងមុខ ។ ចំពោះវ៉ាក់សាំងដំណាក់កាលដំបូង នឹងត្រូវបញ្ជូនទៅកាន់ទីតាំងចំនួន១៤កន្លែង ហើយត្រូវផ្តល់អាទិភាពទៅឲ្យបុគ្គលិកសុខាភិបាល មនុស្សចាស់ជរា និងពលរដ្ឋនៅតាមតំបន់ស្រយាលនៃសហគមន៍ជនជាតិដើមភាគតិច ។
សូមជម្រាបថា ប្រទេសកាណាដាក៏បានរំពឹងផងដែរថា នឹងទទួលបានវ៉ាក់សាំង COVID-19 សរុបចំនួន ៦លានដូសពីក្រុមហ៊ុន ភីហ្វីហ្សឺ និង ម៉ូឌែណា នៅត្រឹមចុងខែមីនា ឆ្នាំ២០២១ខាងមុខនេះ ៕
