វ៉ាក់សាំង Covid-19 ដំបូងរបស់ក្រុមហ៊ុន Pfizer/BioNTech ដឹកជញ្ជូនតាមយន្តហោះទៅដល់កាណាដា
កាណាដា៖ នាយករដ្ឋមន្រ្តីកាណាដាលោក ចាស្ទីន ទ្រូដូ ថ្លែងថា វ៉ាក់សាំងប្រឆាំង Covid-19 ក្រុមដំបូងបានដឹកជញ្ជូនតាមយន្តហោះមកដល់ទឹកដីកាណាដាហើយ នៅថ្ងៃអាទិត្យសប្តាហ៍មុននេះ ខណៈប្រជាជនកាណាដាមួយចំនួនត្រូវបានរំពឹងថា នឹងទទួលបានការចាក់វ៉ាក់សាំងនៅថ្ងៃចន្ទនេះតែម្តង នេះបើតាមសារព័ត៌មានរ៉យទ័រនៅថ្ងៃទី១៤ ខែធ្នូ ឆ្នាំ២០២០ ។
ជាមួយគ្នានេះ កាណាដា និង សហរដ្ឋអាមេរិក ក្លាយជាប្រទេសលោកខាងលិចដំបូងបង្អស់ បន្ទាប់ពីអង់គ្លេសដែលបានចាប់ផ្តើមការចាក់វ៉ាក់សាំង Covid-19 របស់ក្រុមហ៊ុន Pfizer/BioNTech ។
វ៉ាក់សាំងក្រុមដំបូងចំនួន៣ម៉ឺនដូសខាងលើនេះ នឹងត្រូវដាក់ប្រើប្រាស់ទៅកាន់១៤កន្លែងទូទាំងប្រទេសកាណាដា ។ អ្នកដែលងាយរងគ្រោះបំផុត រួមទាំងមនុស្សចាស់ជរានៅក្នុងមណ្ឌលថែទាំ និងបុគ្គលិកថែទាំសុខភាព នឹងក្លាយជាមនុស្សដំបូងគេដែលនឹងត្រូវចាក់វ៉ាក់សាំងនេះ ៕