យោងតាមសេចក្ដីជូនដំណឹងរបស់អគ្គលេខាធិការដ្ឋានរដ្ឋសភានៅថ្ងៃ១៤ធ្នូឆ្នាំ២០២០នេះ បានឲ្យដឹងថា ក្រោយពីការប្រកាសរបស់ក្រសួងសុខាភិបាលអំពីលទ្ធផលនៃការធ្វើតេស្ដលើកទី៣ នៃព្រឹត្តិការណ៍សហគមន៍២៨វិច្ឆិកា គឺទទួលបានលទ្ធផលអវិជ្ជមាន។

អគ្គលេខាធិការដ្ឋានរដ្ឋសភា បានជូនដំណឹងដល់សមាជិក សមាជិការដ្ឋសភា ព្រមទាំងមន្ត្រីរាជការនៃអគ្គលេខាធិការដ្ឋានរដ្ឋសភា ដែលបានធ្វើតេស្ដលើកទី៣ និងធ្វើចត្តាឡីស័កគ្រប់១៤ថ្ងៃរួចហើយ អាចមកបំពេញការងារជាធម្មតាបាន ពុំមានការធ្វើតេស្ដលើកទី៤ទេ។

ជាមួយគ្នានោះ អគ្គលេខាធិការដ្ឋានរដ្ឋសភា បានណែនាំឲ្យអនុវត្តន៍ទៅតាមការណែនាំរបស់ក្រសួងសុខាភិបាលឲ្យបានត្រឹមត្រូវដូចជា ពាក់ម៉ាសជាប់ជានិច្ច, លាងដៃជាមួយសាប៊ូ និងទឹកស្អាតឬជាមួយអាកុល ឬទឹកជែលសម្រាប់លាងដៃឲ្យបានញឹកញាប់, មិនមានជួបជុំគ្នាកុះករច្រើនលើសពី២០នាក់ និងត្រូវរក្សាគម្លាតសុវត្ថិភាព ឲ្យលើសពីមួយម៉ែត្រកន្លះឡើងទៅជាដើម៕កឹម ទៀង