យានអវកាស ឆាងអឺ-៥ របស់ចិនទទួលជោគជ័យ ក្នុងការនាំយកគំរូតាងព្រះច័ន្ទ មកកាន់ផែនដី
ចិន៖ ទីភ្នាក់ងារអវកាសចិន CNSA បញ្ជាក់ថា យានផ្ទុកគំរូតាងព្រះច័ន្ទរបស់បេសកកម្ម ឆាងអឺ-៥ បានទទួលជោគជ័យ ក្នុងការទម្លាក់ខ្លួនមកលើផែនដីនៅពេលទាបភ្លឺថ្ងៃព្រហស្បតិ៍នេះ ដោយវាត្រូវបានចាត់ទុកថា ជាការបង្កើនសមត្ថភាពថ្មីមួយកម្រិតទៀតរបស់ចិន និងជាលើកដំបូងផងដែរ នេះបើតាមសារព័ត៌មាន CGTN នៅថ្ងៃទី១៧ ខែធ្នូ ឆ្នាំ២០២០ ។
ទីភ្នាក់ងារអវកាសចិន CNSA បន្តថា យានផ្ទុកដុំថ្មពីព្រះច័ន្ទ ដែលត្រូវបានគេអះអាងថា មានទម្ងន់ពីរគីឡូក្រាមនោះ ត្រូវបានទម្លាក់ទៅលើទីវាលមួយនៃខេត្ត អ៉ីនណឺ ម៉ុងហ្គោលី នៃភាគខាងជើងប្រទេសចិន ។ សម្រាប់គំរូតាងពីព្រះច័ន្ទនេះដែរ នឹងអាចជួយឲ្យក្រុមអ្នកវិទ្យាសាស្ត្រចិន និងអន្តរជាតិ ស្វែងយល់បន្ថែមពីការកកើតនៃព្រះច័ន្ទ និងសកម្មភាពភ្នំភ្លើង ដែលធ្លាប់កើតមាននៅលើផ្ទៃព្រះច័ន្ទ ។
សូមជម្រាបថា ប្រទេសចិនពេលនេះបានក្លាយជាមហាអំណាចអវកាសទី ៣ នៅក្នុងពិភពលោក ដែលអាចយកគំរូងតាងពីព្រះច័ន្ទត្រលប់មកកាន់ផែនដីវិញ បន្ទាប់ពីសហរដ្ឋអាមេរិក និងអតីតសហភាពសូវៀត ដែលបានធ្វើរឿងនេះកាលពីទសវត្សរ៍ ១៩៦០ និង ១៩៧០ ៕
