ឧត្តមសេនីយ៍ឯក សៅ សារឿន ដឹកនាំក្រុមការងារគណកម្មការត្រួតពិនិត្យក្រសួងការពារជាតិ ប្រជុំបូកសរុបលទ្ធផលការងារមុខសញ្ញាយោធិនចូលនិវត្តន៍ យោធិនពលី និង ពិការ ដែលជាអតីតមន្ត្រីបុគ្គលិកCMAC
បន្ទាប់ពីក្រុមការងាររបស់គណកម្មការត្រួតពិនិត្យ របស់ក្រសួងការពារជាតិបានបន្តចុះត្រួតពិនិត្យមុខសញ្ញាយោធិនចូលនិវត្តន៍ យោធិនពលី និង ពិការ ដែលជាអតីត មន្ត្រីបុគ្គលិកនៃមជ្ឈមណ្ឌលសកម្មភាពកំចាត់មីនកម្ពុជា CMAC ទាំងចំនួន៣២៤ នាក់ អស់រយៈពេល ១ ថ្ងៃ នៅរសៀលថ្ងៃទី២៤ខែធ្នូ ឆ្នំា២០២០ ឧត្តមសេនីយ៍ឯក សៅ សារឿន អគ្គនាយករង អគ្គនាយកដ្ឋានយោធសេវា ជាប្រធានក្រុមការងារត្រួតពិនិត្យគោលនយោបាយ ក្រសួងការពារជាតិ បានប្រជុំបូកសរុបលទ្ធផលការងារត្រួតពិនិត្យមុខសញ្ញាយោធិនចូលនិវត្តន៍ យោធិនពលី និង ពិការ ដែលជាអតីតមន្ត្រីបុគ្គលិក CMAC ។
យោងតាមលទ្ធផលពីជំនាញក្រុមការងារត្រួតពិនិត្យមុខសញ្ញាយោធិនចូលនិវត្តន៍ យោធិនពលី និង ពិការ ដែលជាអតីត មន្ត្រីបុគ្គលិក CMAC រយៈពេល១ថ្ងៃកន្លងមកនេះ នៃការត្រួតពិនិត្យមុខសញ្ញាយោធិនចូលនិវត្តន៍ យោធិនពលី និង ពិការ ដែលមានចំនួនសរុបទាំង ៣៣២ នាក់ ជាប់ថ្នាក់ពិការ ៨១ នាក់ ថ្នាក់សោធននិវត្តន៍ ២៣២នាក់ អវត្តមាន១នាក់ និង ពលី ៧ នាក់ ចំពោះយោធិននិវត្តន៍ ១១ នាក់ ត្រូវបញ្ជូនទៅ ពិនិត្យមុខសញ្ញាបន្តនៅមន្ទីរពេទ្យព្រះកេតុមាលា (ពេទ្យយោធា ១.៧៩ ) ។
ឯកឧត្តម សៅ សារឿន បានថ្លែងពីបំណង់ប្រាថ្នារបស់ប្រមុខរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងការយកចិត្តទុកដាក់គិតគូរជួយឧបត្ថម្ភលើកកំពស់ជីវភាពយោធិនពិការដើម្បីកាត់បន្ថយនូវភាពក្រីក្រក្នុងស្រទាប់យោធិនពិការ។ ឯកឧត្តម សៅ សារឿន ក៏បានរំលឹកពីការយកចិត្តទុកដាក់ពីសម្តេចតេជោ និងសម្តេចកិត្តិព្រឹទ្ធបណ្ឌិត និងថ្នាក់ដឹកនាំក្រសួងការពារជាតិ អគ្គមេបញ្ជាការដែលតែងតែគិតគូរដោះដ្រាយគោលនយោបាយនានាជាបន្តបន្ទាប់ ដើម្បី លើកទឹកចិត្តពីគុណបំណាច់ ចំពោះវីរៈភាពដ៏អង់អាចក្លាហានរបស់បងប្អូនយោធិនពិការ និងបងប្អូន អតីតៈយុទ្ធជន ដែលបានលះបង់សាច់ស្រស់ឈាមស្រស់ដើម្បីបុព្វហេតុជាតិមាតុភូមិនិងប្រជាជនក្នុងអំឡុងសម័យសង្គ្រាមស៊ីវិលនៅកម្ពុជាកន្លងមក។ ឯកឧត្តម សៅ សារឿន ក៏បានថ្លែងអំណរគុណចំពោះជំនាញក្រុមការងារអន្តរក្រសួងទាំងអស់ដែលបានយកចិត្តទុកដាក់ខ្ពស់ ក្នុងការត្រួតពិនិត្យវាយតម្លៃនិងបានបំពេញសំណុំលិខិតជូនមុខសញ្ញាឲ្យបានត្រឹមត្រូវ យុត្តិធ៌មនិងទាន់ពេលវាលា ដើម្បីត្រៀមលក្ខណៈរៀបចំបំពេញ សំណុំលិខិតក្នុងការគ្រប់គ្រង រួចផ្ទេរ ទៅក្រសួងសង្គមកិច្ចអតីតៈយុទ្ធជន និងយុវនិតិសម្បទា គ្រប់គ្រងបន្ត ដោយដោះស្រាយនូវរបបគោលនយោបាយសន្តិសុខសង្គមប្រចាំខែជូនលោក លោកស្រីដែល ពិការ សោធនិវត្តន៍ បន្តដោយបានរស់នៅប្រកបដោយភាពសុខដុបរមនា ៕
