ថៃបន្តរកឃើញអ្នកឆ្លង COVID-19 ក្នុងសហគមន៍៦៤ករណីទៀត ក្នុងចំណោមអ្នកឆ្លងថ្មីៗសរុប១១០ករណី
ថៃ៖ ប្រទេសថៃ នៅថ្ងៃសៅរ៍នេះ បានរកឃើញអ្នកឆ្លង Covid-19 ថ្មីៗសរុប១១០ករណី ដោយក្នុងនោះមាន៦៤នាក់ជាករណីឆ្លងក្នុងតំបន់ ដែលមានជាប់ទាក់ទិននឹងករណីឆ្លងក្នុងខេត្ត សាមុត សាខន ភាគនិរតីប្រទេស នេះបើតាមសារព័ត៌មានរ៉យទ័រនៅថ្ងៃទី២៦ ខែធ្នូ ឆ្នាំ២០២០ ។
អ្នកនាំពាក្យមជ្ឈមណ្ឌលគ្រប់គ្រងស្ថានភាពជំងឺកូវីដ១៩ CCSA លោកវេជ្ជបណ្ឌិត Taweesilp Visanuyothin បញ្ជាក់ថា នៅក្នុងចំណោមករណីឆ្លងថ្មីៗខាងលើនេះ ៣០នាក់គឺជាពលករចំណាកស្រុក និង ១៦នាក់ទៀតជាប្រភេទករណីនាំចូលពីក្រៅប្រទេស ។
ករណីឆ្លងយ៉ាងគំហុកនៅក្នុងប្រទេសថៃ បានផ្ទុះឡើងកាលពីសប្តាហ៍មុននេះ ទៅលើក្រុមពលករចំណាកស្រុក មកពីប្រទេសមីយ៉ាន់ម៉ា ដែលស្ថិតនៅក្នុងខេត្តសាមុតសាខន និងកំពុងបង្កឲ្យមានការរើសអើង យ៉ាងធ្ងន់ធ្ងរនៅក្នុងសង្គមថៃផងដែរ ។ គិតចាប់តាំងពីថ្ងៃអាទិត្យសប្តាហ៍មុន ពលករបរទេសនៅក្នុងប្រទេសថៃ សរុបជាង១ពាន់នាក់ហើយ ត្រូវបានធ្វើតេស្តចេញលទ្ធផលវិជ្ជមាន ចំពោះ COVID-19 ៕
