ភ្នំពេញ៖ ក្រសួងពាណិជ្ជកម្ម នៃព្រះរាជាណាចក្រកម្ពុជា និង ក្រុមហ៊ុន យ៉ាម៉ាតុ ហ្រ្គីន នៅព្រឹកថ្ងៃទី០៦ ខែមករា ឆ្នាំ២០២១ នេះបាន ចុះហត្ថលេខាលើអនុស្សរណៈនៃការយោគយល់គ្នាស្តីពីការអភិវឌ្ឍ​ខ្សែច្រ​វាក់តម្លៃលើផលិត ផលកសិ-ពាណិជ្ជកម្ម ។ ពិធីចុះហត្ថលេខានេះធ្វើឡើងនៅទីស្តីការក្រសួង ក្រោមអធិបតីភាព  ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងឯកឧត្តម Mikami Masahiro ឯកអគ្គរាជទូតជប៉ុនប្រចាំនៅកម្ពុជា ។

ឯកឧត្តម ប៉ាន សូរស័ក្តិ មានប្រសាសន៍ថា ការចុះអនុស្សរណៈយោគយល់គ្នាថ្ងៃនេះ ជាការធ្វើការរួមគ្នារវាងវិស័យសាធារណៈនិងឯកជន និងបានឆ្លើយតបទៅនឹងគោលនយោបាយរបស់រាជរដ្ឋាភិបាលកម្ពុជា​ ក្នុងការលើក​កម្ពស់​វិស័យកសិ-ពា​ណិជ្ជកម្ម ដែលស្របទៅនឹងចតុកោណទី៤ មុំទី១ នៃយុទ្ធសាស្ត្រចតុកោណដំណាក់កាលទី៤ ក្នុងការ​លើក​ស្ទួយវិស័យ​កសិកម្ម និងអភិវឌ្ឍន៍ជនបទ។ ឯកឧត្តម បានបន្តថា ការវិនិយោគរបស់ក្រុមហ៊ុន Yamato Green លើវិស័យកសិ-ពាណិជ្ជកម្ម គឺមានសារៈសំខាន់ណាស់ ព្រោះកសិ-ពាណិជ្ជកម្មជាវិស័យមួយដែល​មាន​សក្ដានុពលខ្ពស់នៅកម្ពុជា និងមិនទាន់មានការអភិវឌ្ឍ ឬវិនិយោគច្រើននៅឡើយ។

ឯកឧត្តមរដ្ឋមន្ត្រី មានប្រសាសន៍បន្ថែមទៀតថា អនុស្សរណៈយោគយល់គ្នានេះ នឹងបង្កើតកិច្ចសហប្រតិបត្តិការយ៉ាងល្អក្នុងការចូលរួមដោះស្រាយបញ្ហាប្រឈមនានាក្នុងខ្សែច្រវាក់តម្លៃ និងពង្រឹងផលិតភាព និងគុណភាពដើម្បីឆ្លើយតបទៅទីផ្សារ។ ក្នុងនាមភាពជាដៃគូអភិវឌ្ឍន៍ឧស្សាហកម្ម និងកសិ-ពាណិជ្ជកម្ម ក្រុមហ៊ុន Yamato Green នឹងក្លាយជាដៃគូសមស្របមួយសម្រាប់អភិវឌ្ឍន៍ផលិត​កម្ម​ កសិ-ពាណិជ្ជកម្ម ប្រកបដោយនិរន្តរភាព និងការផ្តល់បច្ចេកទេសកែច្នៃ ការវេចខ្ចប់ ព្រមទាំងនីតិវិធីផ្សេងៗ ដើម្បី​បង្កើនឱកាសក្នុងការផ្គត់ផ្គង់ទីផ្សារក្នុងស្រុក និងការនាំចេញប្រកបដោយប្រសិទ្ធភាព។ ឯកឧត្តមរដ្ឋមន្ត្រី សង្កត់ធ្ងន់ថា ដើម្បីដោះស្រាយបញ្ហាប្រឈមដែលទាក់ទង​ទៅ​នឹង​ផលិតកម្មតាមគំរូអាជីវកម្មប្រកប​ដោយនិរន្តរភាពនៅក្នុងយុគសម័យឌីជីថល ការចូលរួមរបស់ក្រុមហ៊ុន Yamato Green ក្នុងការអភិវឌ្ឍម៉ូដែលផលិតកម្មមួយ ដែលមានបច្ចេកវិទ្យាជឿនលឿន នឹងជំរុញផលិ​ត​កម្ម​ក្នុង​ស្រុក​នាពេលបច្ចុប្បន្ន។ ឯកឧត្តមរដ្ឋមន្ត្រី គូសបញ្ជាក់ថា ក្រុមហ៊ុន សហគ្រាសធុនតូចនិងមធ្យម និងក្រុម​កសិករផលិតនឹងមានលទ្ធភាពក្នុង​ការបង្កើតខ្សែច្រវាក់តម្លៃផ្គត់ផ្គង់ ដែលប្រកបដោយបរិយាប័​ន្ន និងទទួលបានឧត្តមភាពប្រកួតប្រជែងសម្រាប់ជ្រៀតចូលទីផ្សារ និង​ធ្វើពិពិធកម្មទីផ្សារ ឱ្យមានវិសាលភាពទូលំទូលាយ។

ឯកឧត្តម ប៉ាន សូរស័ក្តិ ផ្តល់នូវអនុសាសន៍ដល់ភាគីទាំងពីរ គួរតែមានប្រព័ន្ធគ្រប់គ្រងព័ត៌មានមួយជាក់លាក់សម្រាប់ចែករំលែកភារកិច្ចទៅតាមមុខងារ និងផ្តល់ព័ត៌មានទៅវិញទៅមកឱ្យទាន់​ពេល ឱ្យជាប់លាប់ និងប្រតិបតិ្តការឱ្យពេញលេញ។ ឯកឧត្តមរដ្ឋមន្ត្រី មានប្រសាសន៍បន្តទៀតថា ក្រុមការងារគួររៀបចំប្រព័ន្ធសម្របសម្រួល និងយន្តការរយៈពេលមធ្យម និងវែងដើម្បីធានា​ថា​ជំនួយបច្ចេកទេស និងអត្ថប្រយោជន៍ផ្តល់ដល់ក្រុមហ៊ុន សហគ្រាសធុន​​តូច​​​​​​​​និង​មធ្យម និងក្រុមកសិករ​ផលិត​មិនជាន់គ្នា។ ក្រុមហ៊ុន Yamato Green គួរនាំផលិតផលកសិ-ពាណិជ្ជកម្ម​ពីក្រុមកសិករផលិតខ្នាតតូចទៅទីផ្សារធំៗ​ បង្កើន​ការវិនិយោគ និងផ្តល់បច្ចេកទេសអភិវឌ្ឍន៍គ្រប់ដំណាក់កាលនៃវដ្តផលិតកម្មកសិ-ពាណិជ្ជកម្ម ដែលគិតចាប់ពីការដាំដុះ ការកែច្នៃ ការវេចខ្ចប់ រហូតដល់ការចែកចាយ។ លើសពីនេះ ក្រុមហ៊ុន  Yamato Green  គួរផ្តល់ជំនួយការលើបច្ចេកទេសក្នុងការពង្រឹងការអនុវត្តច្បាប់​ពាណិជ្ជកម្មតាមប្រព័ន្ធអេឡិចត្រូនិក។

គួរបញ្ជាក់ថា ក្រសួងពាណិជ្ជកម្ម ដើរតួនាទីសម្របសម្រួល និងកែលម្អបរិយាកាសធុរកិច្ច និងការវិនិយោគ ជាពិសេសជំរុញការផ្តល់សេវាពាណិជ្ជកម្មដល់សហគ្រាស និងស្ថាប័នពាណិជ្ជកម្ម សមាគមអាជីវកម្ម តាមរយៈការធ្វើពិពិធកម្មទីផ្សារ និងការស្វែងរកទីផ្សារថ្មីៗ​សម្រាប់​ផលិតផលខ្មែរ រួមមានផលិតផលកសិ-ពាណិជ្ជកម្ម ផលិត​ផលកសិ-ឧស្សាហកម្ម­­­។ល។ ព្រមទាំងការបន្តអនុវត្តគោលនយោបាយពាណិជ្ជកម្មកម្ពុជា ឱ្យបានជោគជ័យសម្រាប់ជាផលប្រយោជន៍ដល់ការអភិវឌ្ឍវិស័យឯកជន និងបម្រើផលប្រយោជន៍ប្រជាជនកម្ពុជាទូទាំងប្រទេស។

គម្រោងជំរុញទីផ្សារសម្រាប់កសិកម្មខ្នាតតូច (AIMS) ​បាន​ចូល​រួមសម្របសម្រួលដែលសម្រេចបាននូវសមិទ្ធផលជាផ្លែផ្កាសម្រាប់អនុស្សរណៈយោគយល់គ្នានេះ។ AIMS ជាគម្រោងរួមគ្នារបស់រាជរដ្ឋាភិបាលកម្ពុជា និងមូលនិធិអន្តរជាតិសម្រាប់អភិវឌ្ឍន៍កសិកម្ម(IFAD)។ គម្រោងAIMS​ដឹកនាំប្រតិបត្តិ​ដោយ​ក្រសួង​ពាណិជ្ជកម្មនិងមានគោលដៅលើកស្ទួយវិបុលភាព
កសិករខ្នាតតូចកម្ពុជា តាមរយៈបង្កើនផលចំណេញកាន់តែច្រើនដោយតភ្ជាប់កសិ-ពាណិជ្ជកម្ម និងទីផ្សារ។ YAMATO GREEN ជាបុត្រសម្ព័ន្ធក្រុមហ៊ុនជំនួញជប៉ុនធំៗ រួមមានធនាគារ ស្ថាប័នមីក្រូហិរញ្ញវត្ថុ ផ្សារទំនើប និងក្រុមហ៊ុនរបស់ប្រទេសជប៉ុនជាដៃគូចំនួន ១៦ក្រុមហ៊ុន។ ក្រុមហ៊ុនបានរៀបចំបង្កើតជាគំរូខ្សែច្រវាក់តម្លៃផលិតផលកសិ-ពាណិជ្ជកម្ម ដើម្បីធានាឱ្យបានទាំងបរិមាណនិងគុណភាពផលិតផលកសិ-ពាណិជ្ជកម្ម ដើម្បីឆ្លើយតបតាមតម្រូវការទីផ្សារក្នុងប្រទេស និងនាំចេញឱ្យមានចីរភាព តាមរយៈការធ្វើអាជីវកម្ម Franchise នៃគំរូផលិតដែលស្របតាមខ្នាត និងស្តង់ដារកំណត់តែមួយ។