សមាគមទេសចរណ៍ថៃរំពឹងថា នៅត្រីមាសទី៣ ឆ្នាំ២០២១ នឹងមានភ្ញៀវទេសចរបរទេសមកទស្សនាប្រទេសថៃកាន់តែច្រើន
ថៃ៖ សមាគមភ្នាក់ងារទេសចរណ៍ថៃ ATTA កំពុងអំពាវនាវអោយរដ្ឋាភិបាលលុបចោលការធ្វើចត្តាឡីស័ករយៈពេល១៤ថ្ងៃ សម្រាប់ការមកដល់របស់ភ្ញៀវទេសចរបរទេសដែលបានចាក់វ៉ាក់សាំងនៅត្រីមាសទី ៣ នៃឆ្នាំ ២០២១ នេះបើតាមសារព័ត៌មាន The Thaiger ។
ប្រធានសមាគមភ្នាក់ងារទេសចរណ៍ថៃ ATTA លោក វីឈីត ប្រាកប់ហ្គោសុល និយាយថា ដើម្បីជួយក្រុមហ៊ុនទេសចរណ៍ រដ្ឋាភិបាលត្រូវតែផ្តោតលើការគ្រប់គ្រងរលកទី ២ នៃការឆ្លងជំងឺកូវីដ១៩ឲ្យបាននៅខែក្រោយ និងធ្វើយ៉ាងណាឲ្យករណីឆ្លងធ្លាក់ចុះមកត្រឹមខ្ទង់ដប់ ហើយថា បើសិនចំនួនឆ្លងបានថយចុះពីរាប់រយមកខ្ទង់ដប់នោះ វាគួរតែបង្កើតការជឿទុកចិត្ត និងបរិយាកាសទេសចរណ៍ល្អប្រសើរ ។
លោក វីឈីត បានអះអាងថា វាត្រូវបានគេជឿជាក់ថា នៅក្នុងត្រីមាសទី៣ នៃឆ្នាំ២០២១ នឹងមានភ្ញៀវទេសចរបរទេសមកទស្សនាប្រទេសថៃកាន់តែច្រើន ហើយវិស័យទេសចរណ៍នឹងងើបឡើងវិញជាង៨០ភាគរយក្នុងឆ្នាំ២០២២ខាងមុខ ខណៈបញ្ហានេះនឹងដោះស្រាយសេដ្ឋកិច្ចដែលកំពុងមានការលំបាករបស់ប្រទេសថៃជាបណ្តើរៗ ៕
