វិបត្តិកូវីដ១៩ធ្វើអោយការលក់ស្មាតហ្វូននៅចិនធ្លាក់ចុះ២០.៤ភាគរយក្នុងឆ្នាំ២០២០
ចិន៖ ក្នុងឆ្នាំ២០២០ តួលេខនៃការលក់ស្មាតហ្វូននៅក្នុងប្រទេសចិន បានធ្លាក់ចុះ២០.៤ភាគរយ ពោលគឺធ្លាក់ចុះមកនៅត្រឹម២៩៦លានគ្រឿង ខណៈកាលពីឆ្នាំ២០១៩ មានចំនួន៣៧២លានគ្រឿង នេះបើតាមបណ្ឌិតសភាព័ត៌មាន និងគមនាគមន៍ចិន ដែលហៅកាត់ថា CAICT ចុះផ្សាយដោយសារព័ត៌មានរ៉យទ័រ ។
ប្រភពខាងលើនេះបានអោយដឹងទៀតថា មូលហេតុចម្បងដែលធ្វើឱ្យចំនួនលក់ធ្លាក់ចុះនេះ គឺមកពីបញ្ហាជំងឺកូវីដ-១៩ ដែលផ្ទុះឡើងនៅចិន និងបញ្ហាមួយទៀត គឺក្រុមហ៊ុនផលិតស្មាតហ្វូនទាំងអស់បានពន្យារពេលចេញលក់ស្មាតហ្វូនម៉ូដែលថ្មីៗ ទើបធ្វើឱ្យអ្នកប្រើប្រាស់ត្រូវរង់ចាំ ខណៈតួលេខលក់ស្មាតហ្វូនក្នុងខែធ្នូ ឆ្នាំ២០២០ មានចំនួន២៥.៣លានគ្រឿង ។
ទោះជាយ៉ាងណា ក្រុមហ៊ុនផលិតស្មាតហ្វូនក្នុងស្រុក និងក្រៅស្រុកទាំងអស់បានរំពឹងថា ទីផ្សារស្មាតហ្វូននៅចិននឹងកើនឡើងវិញនៅឆ្នាំ២០២១នេះ ខណៈស្មាតហ្វូនម៉ូដែលថ្មីៗត្រូវបានប្រកាសបង្ហាញ ជាពិសេសគឺភ្ជាប់មកនូវបច្ចេកវិទ្យា 5G ៕
