សេដ្ឋកិច្ចចិនស្ទុះងើបឡើងវិញខ្លាំងនៅត្រីមាសទី៤ ឆ្នាំ២០២០ ក្រោយរងផលប៉ះពាល់ដោយសារវិបត្តិកូវីដ១៩
សេដ្ឋកិច្ចចិនបានស្ទុះងើបឡើងវិញខ្លាំងនៅត្រីមាសទី៤ឆ្នាំ២០២០ ដែលជំរុញដោយតម្រូវការកាន់តែខ្លាំងទាំងក្នុង និងក្រៅប្រទេស រួមទាំងគោលនយោបាយជំរុញសេដ្ឋកិច្ច ដែលគេរំពឹងថា នឹងផ្តល់នូវកំណើនដ៏រឹងមាំក្នុងឆ្នាំ ២០២១ នេះ ។
ការវិភាគដែលស្ទាបស្ទង់ដោយទីភ្នាក់ងារសារព័ត៌មានរ៉យទ័របានព្យាករណ៍ថា ផលិតផលក្នុងស្រុកសរុប GDP របស់ចិនបានកើនឡើង៦.១ភាគរយកាលពីខែតុលា ដល់ខែធ្នូ បើធៀបនឹងកំណើននៅរយៈពេលដូចគ្នាកាលពីឆ្នាំ២០១៩ ដោយកើនពីអត្រា៤.៩ភាគរយនៅក្នុងត្រីមាសទី៣ ។ ប្រការនេះអាចនឹងធ្វើឱ្យចិនមួយឆ្នាំពេញមានកំណើនផលិតផលក្នុងស្រុកសរុប GDP ២.១ ភាគរយ ដែលទំនងជាធ្វើឱ្យចិនក្លាយជាប្រទេសសេដ្ឋកិច្ចធំតែមួយគត់ ដែលឃើញកំណើនកាលពីឆ្នាំមុន ប៉ុន្តែនៅតែជាល្បឿនខ្សោយបំផុតរបស់ប្រទេសនេះក្នុងរយៈពេលជាងបួនទសវត្សរ៍ ។
សូមជម្រាបថា ដោយមានវិធានការទប់ស្កាត់វីរុសយ៉ាងតឹងរ៉ឹង និង ជំនួយសង្គ្រោះបន្ទាន់សម្រាប់អាជីវកម្មនោះ សេដ្ឋកិច្ចចិនបានស្ទុះងើបឡើងវិញជាបណ្តើរៗ ពីការធ្លាក់ចុះយ៉ាងខ្លាំង៦.៨ភាគរយក្នុងរយៈពេល០៣ខែដំបូងនៃឆ្នាំ ២០២០ នៅពេលដែលជំងឺកូវីដ១៩បានផ្ទុះឡើងដំបូងនៅទីក្រុងវូហាន ហើយរីករាលដាលពេញទំហឹងលើពិភពលោក ៕
ប្រភព៖ Reuters
