យុវជនផលិតវីដេអូប្រកួតប្រជែងចំណេះដឹងវិនិយោគភាគហ៊ុនបីក្រុម ទទួលបានពានរង្វាន់ពីផ្សារមូលបត្រកម្ពុជា
ភ្នំពេញ៖ ពានរង្វាន់ជ័យលាភីប្រកួតប្រជែងវីដេអូប្រចាំឆ្នាំ 2020 ត្រូវបានផ្សារមូលបត្រកម្ពុជា (CSX) ប្រគល់ជូនយុវជនបីក្រុមមានស្នាដៃផលិតខ្លឹមសារវីដេអូស្តីពីចំណេះវិនិយោគភាគលើផ្សារហ៊ុនលេចធ្លោរជាងគេ កាលពីថ្ងៃព្រហសត្បិ៍ ម្សិលមិញ។ ក្រុមយុវជនជ័យលាភីកំពូលទាំងបីទទួលបានលិខិតសរសើរ ពានរង្វាន់ និងរង្វាន់ជាសាច់ប្រាក់ចំនួន 1500ដុល្លារ, 1000ដុល្លារ និង 500ដុល្លារពីផ្សារមូលបត្រកម្ពុជា។
ពានរង្វាន់នេះជ័យលាភីជើងឯកបានទៅលើក្រុម Secret Trust ផលិតវីដេអូចំណងជើង “ភាគហ៊ុនផ្តើមស្នេហ៍”។ ជ័យលាភីលេខ2 បានទៅលើក្រុម The Risk ផលិតវីដេអូចំណងជើង “ហានិភ័យ” និងជ័យលាភីលេខ3 បានទៅលើក្រុម Stock’nhom ផលិតវីដេអូចំណងជើង “វិនិយោគលើភាគហ៊ុន ដើម្បីឆាប់សម្រេចគោលដៅសេរីភាពហិរញ្ញវត្ថុ”។ វីដេអូទាំងបីក្រុមនេះ ពិន្ទុ 50 ភាគរយផ្តល់តាមរយៈសាធារណជនលើទំព័រហេ្វប៊ុកផ្សារមូលបត្រកម្ពុជា និងពិន្ទុ 50 ភាគរយបន្ថែមទទួលបានពីគណៈកម្មការជំនាញ វាយតម្លៃទៅលើគំនិតច្នៃប្រឌិត និងខ្លឹមសារព័ត៌មានផ្តល់ចំណេះដឹងជុំវិញវិស័យមូលបត្រនៅកម្ពុជា។
ក្នុងពិធីប្រគល់ពានរង្វាន់ដល់ជ័យលាភីទាំងអស់ ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា មានប្រសាសន៍ថា នេះជាលើកទីមួយដែលផ្សារមូលបត្រកម្ពុជា បង្កើតព្រឹត្តការណ៍ប្រកួតប្រជែងវីដេអូអំពីចំណេះដឹងវិនិយោគភាគហ៊ុនលើផ្សារមូលបត្រទៅកាន់សាធារណជន។ តាមរយៈចំណេះដឹងដែលបានចែករំលែកក្នុងវីដេអូនីមួយៗ នឹងជួយផ្តល់ព័ត៌មានពីវិស័យផ្សារមូលបត្រឱ្យកាន់តែទូលំទូលាយ។
ឯកឧត្តម ហុង សុហួរ “ វីដេអូរបស់បេក្ខជនទាំងអស់ ខ្ញុំឃើញពួកគាត់ប្រើប្រាស់មធ្យោបាយសាមញ្ញៗ ប៉ុន្តែទាក់ទាញចំណាប់អារម្មណ៍បានច្រើនពីសាធារណជន… ខ្ញុំរីករាយឃើញយុវជនយើងផលិតបានល្អ។ ខ្ញុំលើកទឹកចិត្តឱ្យទាំងអស់គ្នារៀនវិនិយោគភាគហ៊ុនដើម្បីទទួលបានចំណេះដឹងពីវិស័យនេះ និងរៀនវិនិយោគហិរញ្ញវត្ថុផ្ទាល់ខ្លួន”។ ទន្ទឹមនឹងការលើកឡើងនេះ តំណាងយុវជនជ័យលាភីទាំងបី បានបង្ហាញចំណាប់អារម្មណ៍ផ្សេងៗគ្នាចំពោះជ័យលាភីរបស់ខ្លួន។
លោក សុខ គឹមហេង តំណាងក្រុមជ័យលាភីលេខ1 បាននិយាយថា តាមរយៈវីដេអូរបស់ក្រុម Secret Trust មានគោលបំណងចូលរួមចែករំលែកបទពិសោធវិនិយោគលើផ្សារភាគហ៊ុន និងលើកស្ទួយវិស័យមូលបត្រឱ្យកាន់តែរីកចម្រើនទៅមុខ។ ទន្ទឹមគ្នានេះ ចង់ផ្តល់ព័ត៌មានបន្ថែមទៅកាន់សាធារណជនឱ្យដឹងកាន់តែច្បាស់ពីផ្សារមូលបត្រកម្ពុជា ព្រមទាំងបង្ហាញពីអត្ថប្រយោជន៍ទទួលបានពីការវិនិយោគភាគហ៊ុន។
យុវជនរូបនេះ បានបន្តថា “ការវិនិយោគភាគហ៊ុនទៅលើផ្សារមូលបត្រកម្ពុជា ប្រៀបដូចជាការស្វែងរកចំណូលទីពីររបស់យើងអីចឹង… ការប្រកួតនេះមានតម្លាភាពសម្រាប់ពួកខ្ញុំជាយុវជន។ ខ្ញុំសូមអរគុណដល់មិត្តភក្តិ និងអ្នកគាំទ្រវីដេអូរបស់ពួកខ្ញុំនៅលើបណ្តាញសង្គម និងបានចែករំលែកវីដេអូនេះ”។
ចំណែកតំណាងក្រុមយុវជនទទួលបានជ័យលាភីលេខ2 លោក លឹម ឡាយស្រេង បានឱ្យដឹងថា “ខ្ញុំរីករាយមែនទែន ! ខ្ញុំឃើញព័ត៌មានផ្សព្វផ្សាយពីការប្រកួតប្រជែងក៏ចាប់អារម្មណ៍ភ្លាម ហើយដើរបបួលមិត្តភក្តិនាំគ្នាផលិតវីដេអូហ្នឹងតែម្តង។ ពួកយើងអត់មានចំណេះដឹងវិនិយោគភាគហ៊ុនហ្នឹងទេ ហើយនាំគ្នារៀនតាមហ្វេសប៊ុកផ្សារមូលបត្រកម្ពុជា ជួបអ្នកពាក់ព័ន្ធផង ក្រុមហ៊ុនចុះបញ្ជីផ្សារមូលបត្រជួយសម្របសម្រួលផង ទើបពួកខ្ញុំផលិតវីដេអូនេះបាន… ចំណេះដឹងនេះសំខាន់សម្រាប់ពួកខ្ញុំជាយុវជន”។
កញ្ញា ផាន់ ស្រីរិទ្ធិ តំណាងក្រុមផលិតវីដេអូទទួលជ័យលាភីលេខ3 បានឱ្យដឹងថា “នេះជាឱកាសដែលពួកខ្ញុំបានរៀនសូត្រពីការវិនិយោគភាគហ៊ុនជាលើកដំបូង ពិសេសយល់ដឹងពីររបៀបផលិតវីដេអូ។ ពួកខ្ញុំចាប់ផ្តើមយល់ដឹងពីផ្សារហ៊ុននៅកម្ពុជា ហើយការវិនិយោគបែបនេះនឹងជួយដល់ពួកយើងច្រើន”។
ក្រុម Stock’nhom ទទួលបានជ័យលាទីលេខ3 ក្នុងការប្រកួតប្រជែងវីដេអូឃ្លីប។ ក្រុម The Risk ទទួលបានជ័យលាភីលេខ2 ផលិតវីដេអូចំណងជើង “ហានិភ័យ” ។
សូមជម្រាបថា កម្មវិធីប្រកួតប្រជែងឃ្លីបវីដេអូរបស់ផ្សារមូលបត្រកម្ពុជា ចាប់ផ្តើមប្រព្រឹត្តទៅរយៈពេលពេល 12ថ្ងៃនៅក្នុងខែវិច្ឆិកា 2020 កន្លងទៅ។ បេក្ខជនចូលរួមប្រកួតទាំងអស់ចំនួន 20ក្រុម និងជ្រើសរើសយកតែបីក្រុមប៉ុណ្ណោះដើម្បីទទួលបានជ័យលាភីពានរង្វាន់។ ផ្សារមូលបត្រកម្ពុជាបានបញ្ជាក់ថា នៅក្នុងឆ្នាំ 2021 នេះ ផ្សារមូលបត្រកម្ពុជានឹងរៀបចំកម្មវិធីប្រកួតប្រជែងជូញដូរភាគហ៊ុនលើកទីប្រាំ ក្នុងន័យផ្សព្វផ្សាយចំណេះដឹងវិនិយោគភាគហ៊ុនឱ្យកាន់តែទូលំទូលាយទៅកាន់ប្រជាពលរដ្ឋកម្ពុជា៕