កម្មវិធី TikTok របស់ចិន នឹងកាត់បន្ថយបុគ្គលិកនៅឥណ្ឌា បន្ទាប់ពីឥណ្ឌាប្រកាសបិទកម្មវិធី App របស់ចិនចំនួន៥៩ជាអចិន្ត្រៃយ៍
ឥណ្ឌា៖ ក្រុមហ៊ុន ByteDance ដែលជាមេធំរបស់ TikTok អះអាងថា ដោយសារតែរដ្ឋាភិបាលឥណ្ឌាបានសម្រេចចិត្តបិទកម្មវិធី App របស់ចិនចំនួន៥៩ ក្នុងនោះរួមមានទាំង TikTok ជាអចិន្ត្រៃយ៍ ដូច្នេះហើយខ្លួនក៏បានសម្រេចចិត្តកាត់បន្ថយកម្លាំងពលកម្ម ។
ក្រសួងអេឡិចត្រូនិច និងបច្ចេកវិទ្យាព័ត៌មានឥណ្ឌាបានចេញសេចក្ដីជូនដំណឹងថ្មីថា រដ្ឋាភិបាលឥណ្ឌាបានសម្រេចហាមឃាត់កម្មវិធី App របស់ចិនចំនួន ៥៩ ក្នុងនោះរួមមានទាំង TikTok ជាអចិន្រ្តៃយ៍ ។ អ្នកនាំពាក្យរដ្ឋាភិបាលឥណ្ឌាបានថ្លែងប្រាប់សារព័ត៌មាន Times of India ថា រដ្ឋាភិបាលមិនពេញចិត្តនឹងការឆ្លើយបត ឬការពន្យល់របស់ក្រុមហ៊ុន App ទាំង៥៩នោះទេ ដួច្នេះហើយទើបរដ្ឋាភិបាលសម្រេចចិត្តបិទកម្មវិធីទាំងនោះជាអចិន្រ្តៃយ៍ ។ តាមរយៈលិខិតផ្ញើជូនបុគ្គលិកដែលកំពុងបម្រើការងារនៅឥណ្ឌា ក្រុមហ៊ុន ByteDance របស់ចិនបានបញ្ជាក់ថា យើងមិនអាចទទួលខុសត្រូវចំពោះបុគ្គលិកដែលកំពុងបម្រើការងារពេញម៉ោងបានទេ ព្រោះពេលនេះ ប្រតិបត្តិការរបស់យើងត្រូវបានរដ្ឋាភិបាលឥណ្ឌាហាមឃាត់ទាំងស្រុង ហើយយើងក៏មិនដឹងថា ពេលណាអាចត្រឡប់មកវិញបានដែរ ។
សូមរំលឹកផងដែរថា ក្រុមហ៊ុន ByteDance របស់ចិន កាលពីឆ្នាំ២០១៩កន្លងទៅនេះ បានប្រកាសបោះទុន១ពាន់លានដុល្លារ ដើម្បីវិនិយោគទៅលើ ម្មវិធី TikTok នៅឥណ្ឌា ជាទីដែលមានចំនួនអ្នកប្រើកម្មវិធីវីដេអូកំសាន្តខ្លីៗដ៏ល្បីមួយនេះច្រើនជាងគេបំផុត ៕ ប្រភព៖ Reuters