ក្រសួងសេដ្ឋកិច្ច និងហិរញ្ញវត្ថុដាក់ចេញគោលនយោបាយ៣ចំនុច ដើម្បីជំរុញអោយសេដ្ឋកិច្ចកម្ពុជាងើបឡើងវិញឆាប់រហ័សក្នុងឆ្នាំ២០២១នេះ
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានដាក់ចេញនូវគោលនយោបាយ៣ចំនុច ដើម្បីជំរុញឱ្យសេដ្ឋកិច្ចកម្ពុជាងើបឡើងវិញឆាប់រហ័សក្នុងឆ្នាំ២០២១នេះ ក្រោយទទួលរងផលប៉ះពាល់ ជាសកលពីវិបត្តិកូវីដ១៩ ។ ក្នុងនោះវិស័យកសិកម្ម និងកសិឧស្សាហកម្មគឺជាដង្ហើមសេដ្ឋកិច្ច ព្រោះកម្ពុជាជាប្រទេសមានសក្តានុពលកសិកម្ម និងមានលទ្ធភាពនាំចេញផលិតផលកសិកម្មទាំងនេះ ទៅក្រៅប្រទេសបានទៀតផង ។
ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុថ្លែងថា បើទោះជាកូវីដ១៩មិនទាន់ផុតរលត់ពីកម្ពុជា តែកម្ពុជាអាចស្តារសេដ្ឋកិច្ចឡើងវិញបាន តាមរយៈគោលនយោបាយ៣ចំនុច ទី១.គឺការធានាបានការរស់នៅបន្តបាន ទី២.ការធ្វើឱ្យរស់រវើកឡើងវិញនូវជីវភាពរបស់ប្រជាពលរដ្ឋ ក៏ដូចជាផ្នែកអាជីវកម្ម ធុរកិច្ច និងសង្គមទាំងមូល និងទី៣. កិច្ចសម្រួលពាណិជ្ជកម្ម កាត់បន្ថយការចំណាយក្រោមតុ ដើម្បីបង្កបរិយាកាសដល់អ្នកវិនិយោគក្នុង និងក្រៅស្រុក ។ សម្រាប់កម្ពុជា កសិកម្មគឺជាដង្ហើមសេដ្ឋកិច្ច ខណៈកម្ពុជាមានដីកសិកម្មច្រើន មិនត្រឹមតែផលិតសម្រាប់ហូប និងផ្គត់ផ្គង់ក្នុងស្រុកទេ គឺអាចនាំចេញផលិតផលទាំងនេះ ទៅក្រៅប្រទេសទៀតផង ។ ទន្ទឹមនឹងនេះ ភាពប្រកួតប្រជែង តាមរយៈការបន្ទាបថ្លៃដើមនៃការផលិតក៏ជាដើមចម នាំឱ្យសន្ទុះការនាំចេញមានការកើនឡើងខ្ពស់ ដែលនេះជាហេតុផលធ្វើឱ្យសេដ្ឋកិច្ចកម្ពុជារក្សាបាននៅលំនឹងសេដ្ឋកិច្ច ។
ឯកឧត្តមបន្តថា ប្រទេសដែលមានសមត្ថភាពធ្វើឱ្យសេដ្ឋកិច្ចងើបលឿនជាងគេ គឺជាប្រទេសដែលពឹងផ្អែកលើវិស័យកសិកម្ម និងឧស្សាហកម្ម មិនមែនជាប្រទេសដែលពឹងលើសេវាកម្មនោះទេ បើពឹងលើផ្នែកនេះ សេដ្ឋកិច្ចនឹងមានការងើបឡើងយឺតបំផុត ។ ឯកឧត្តមបន្ថែមទៀតថា ដើម្បីជំរុញខឿនសេដ្ឋកិច្ចកម្ពុជាឱ្យកាន់តែខ្លាំង និងរឹងមាំនោះ កម្ពុជាត្រូវតែបន្តអនុវត្តការបង្កើនភាពធនសេដ្ឋកិច្ចជាបន្តទៀត ដែលកាលពីឆ្នាំ២០២០ កម្ពុជាបានអនុវត្តល្អប្រសើរហើយ ទើបធ្វើឱ្យសេដ្ឋកិច្ចកម្ពុជាធ្លាក់ចុះត្រឹមដក៣.១% ហើយថា ប្រសិនមិនមានការគ្រប់គ្រងល្អ និងអន្តរាគមន៍មានប្រសិទ្ធភាពទេនោះ សេដ្ឋកិច្ចកម្ពុជាអាចនឹងធ្លាក់ចុះច្រើនជាងនេះ ៕