ឯកឧត្តម កៅ ថាច ប្រតិភូរាជរដ្ឋាភិបាល អញ្ជើញជួបសំណេះសំណាលជាមួយលោកគ្រូ អ្នកគ្រូ ក្នុងស្រុកខ្សាច់កណ្តាល និងចុះពិនិត្យរោងដាំបន្លែក្នុងផ្ទះសំណាញ់ របស់យុវជនខេត្តកណ្តាល
ឯកឧត្តម កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃធនាគារអភិវឌ្ឍន៍ជនបទ និងកសិកម្ម និងជាប្រធានក្រុមការងារទទួលបន្ទុកចលនាយុវជនស្រុកខ្សាច់កណ្តាល កាលពីថ្ងៃទី២៨ មករា ២០២១ បានអញ្ជើញអធិបតីភាពក្នុងកម្មវិធីសំណេះសំណាលជាមួយ នាយក នាយិកា នាយករង នាយិការង លោកគ្រូ និងអ្នកគ្រូទាំងអស់ ក្នុងវិទ្យាល័យទាំង ៤ ក្នុងស្រុកខ្សាច់កណ្តាលសរុប ចំនួន ៣២៤ នាក់។ អគ្គនាយកធនាគារ ARDB រូបនេះ ក៏បានឆ្លៀតទៅពិនិត្យរោងដាំបន្លែរបស់យុវជនស្រុកខ្សាច់កណ្តាលផងដែរ។
ឯកឧត្តម កៅ ថាច ប្រតិភូរាជរដ្ឋាភិបាលបានពាំនាំប្រសាសន៍ផ្តាំផ្ញើសួរសុខទុក្ខពីសំណាក់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសូងសេដ្ឋកិច្ចនិងហិរញ្ញវត្ថុ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមការងារថ្នាក់ជាតិចុះមូលដ្ឋានខេត្តកណ្តាល ទទួលបន្ទុកស្រុកខ្សាច់កណ្តាល ស្រុកល្វាឯម និង ស្រុកកៀនស្វាយ។
នាពេលនោះដែរ ឯកឧត្តម កៅ ថាច បានធ្វើការកត់សម្គាល់នូវចំនុចសំខាន់មួយចំនួនថា តាមរយៈកំណែទម្រង់ស៊ីជម្រៅរបស់រាជរដ្ឋាភិបាល ជាពិសេស ការពង្រឹងលើប្រព័ន្ធអប់រំនៅកម្ពុជា ក្នុងមួយរយៈកាលចុងក្រោយនេះកម្មវិធីសិក្សាអប់រំបានកែប្រែយ៉ាងខ្លាំង សិស្សានុសិស្សបានខិតខំពង្រឹងខ្លួនទាំងសមត្ថភាព និងចំណេះដឹង ជាក់ស្តែងលទ្ធផលនៃការប្រឡងបាក់ឌុបក្នុងឆ្នាំកន្លងមក ជាសក្ខីភាពបង្ហាញពីភាពជោគជ័យនៃកំណែទម្រង់ប្រព័ន្ធអប់រំ តាមរយៈពាក្យស្លោក អ្នកចេះគឺជាប់។ ចំពោះឆ្នាំសិក្សា ២០២០ ក្នុងបរិបទកូវិដ ១៩ ប្រព័ន្ធអប់រំត្រូវបានកែប្រែយ៉ាងខ្លាំង ដោយសិស្សត្រូវប្តូរពីការរៀនក្នុងសាលា ទៅរៀនតាមប្រព័ន្ធអនឡាញវិញ ដែលការណ៍នេះ ជាបរិបទថ្មីដែលលោកគ្រូ អ្នកគ្រូត្រូវតាមឱ្យទាន់ និងមានភាពបទបែនខ្ពស់ចំពោះការវិវត្តនេះ។
ពាក់ព័ន្ធនឹងការធ្វើទំនើបកម្មប្រព័ន្ធបច្ចេកវិទ្យាបែបឌីជីថល និងការធ្វើទំនើបកម្មប្រពន្ធអប់រំវិញ ឯកឧត្តម កៅ ថាច បានធ្វើការកត់សម្គាល់បន្ថែមទៀតថា បច្ចុប្បន្ននេះ ក្មេងៗ និងយុវជន យុវនារី មានភាពឈ្លាវវៃ និងពូកែ ជាពិសេសលើប្រព័ន្ធបច្ចេកវិទ្យា (IT) ។ ក្នុងន័យនេះ ដើម្បីដើរឱ្យទាន់បរិបទថ្មី ឯកឧត្តម បន្តលើកទឹកចិត្ត និងស្នើសុំដល់លោកគ្រូ អ្នកគ្រូត្រូវតែធ្វើការស្រាវជ្រាវចំណេះដឹងថ្មីៗបន្ថែម ដែលកំពុងវវិត្តន៍ក្នុងបរិការណ៍ថ្មី ដើម្បីយកចំណេះដឹងទាំងនោះ ទៅចែករំលែកបន្តដល់សិស្សានុសិស្ស។
ឯកឧត្តម បានស្នើសុំលោកគ្រូ អ្នកគ្រូ បន្តការអានសៀវភៅ ធ្វើការស្រាវជ្រាវ អោយបានច្រើន និងជួយជំរុញសិស្សក្នុងការអានផងដែរ ពីព្រោះការអាន ធ្វើឱ្យយើងទទួលបានចំណេះដឹងថ្មីៗ និងដើរទាន់ការវិវត្តន៍របស់ពិភពលោក។ ឯកឧត្តម ស្នើសុំឱ្យសាលារៀបចំបណ្ណាល័យឱ្យបានស្អាត នៅតាមវិទ្យាល័យ និងដាក់សៀវភៅអានឱ្យបានច្រើន និងគ្រប់គ្រាន់ ដើម្បីជួយដល់សិស្សឱ្យមានសមត្ថភាពក្នុងការស្រាវជ្រាវ។
ឯកឧត្តមប្រតិភូ បានសំណូមពរដល់លោកគ្រូ អ្នកគ្រូជួយបណ្តុះបណ្តាលទាំងជំនាញទុន និងជំនាញរឹង និងជួយបណ្តុះស្មារតីសិស្សឱ្យចេះស្រឡាញ់កីឡា ស្រឡាញ់ការងារសង្គមជាតិ បណ្តុះឥរិយាបឱ្យមានសុជីវធម៌ គុណធម៌ និងមានសីលធម៌ខ្ពស់ ជាពិសេស ជួយបណ្តុះឱ្យសិស្សមានភាពម្ចាស់កាល និងឯករាជ្យក្នុងសិក្សា ស្រាវជ្រាវ ។
ដើម្បីជាការលើកទឹកចិត្ត និងថ្លែងអំណរគុណដល់កិច្ចខំប្រឹងប្រែងរបស់លោកគ្រូ អ្នកគ្រូ ឯកឧត្តម កៅ ថាច បានពាំនាំថវិកាដ៏ថ្លែថ្លា របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ដើម្បីធ្វើការឧបត្ថម្ភ ជូនដល់លោកគ្រូ អ្នកគ្រូ ដែលបានចំណាយពេលបង្រៀនបំប៉ន សិស្សថ្នាក់ទី១២ ដើម្បីត្រៀមប្រឡងបាក់ឌុប ឆ្នាំសិក្សា ២០១៩-២០២០ កន្លងមក ចំនួន ១៥ លានរៀល និងលោកគ្រូ អ្នកគ្រូចំនួន ៣២៤ នាក់ ដែលមានវត្តមានក្នុងកម្មវិធី ក្នុងម្នាក់ៗចំនួន ៤ ម៉ឺនរៀល និងឧបត្ថម្ភដល់សាលាស្រុក ចំនួន ១លានរៀលផងដែរ។
បន្ទាប់ពីពិធីសំណេះសំណាលចប់រួចរាល់ភ្លាម ឯកឧត្តម កៅ ថាច ក៏បានឆ្លៀតឳកាសអញ្ជើញទៅពិនិត្យមើលកន្លែងដាំដុះបន្លែ របស់យុវជនស្រុក សម្រាប់ផ្គត់ផ្គង់ទីផ្សារ ដែលជាជំនួយរបស់ក្រុមការងារទទួលបន្ទុកចលនាយុវជនស្រុកខ្សាច់កណ្តាល ដែលមានឯកឧត្តម កៅ ថាច ជាប្រធាន ដោយក្នុងពេលចុះពិនិត្យ អគ្គនាយកធនាគារ ARDB រូបនេះបានបង្ហាញបំណងចង់ឲ្យរោងដាំបន្លែតាមបច្ចេកទេសផ្ទះសំណាញ់មួយនេះ ក្លាយជារោងដាំបន្លែគំរូមួយ សម្រាប់ស្រុកខ្សាច់កណ្តាល ក្នុងការចូលរួមជាមួយរាជរដ្ឋាភិបាលដែលមានគោលនយោបាយជំរុញការដាំដុះបន្លែ ផ្លែឈើ បន្ថយការនាំចូលពីក្រៅប្រទេសដែលគ្មានប្រភពច្បាស់លាស់ ធ្វើឲ្យប៉ះពាល់សុខភាព។ ឯកឧត្តមក៏សង្ឃឹមដែរថា នាពេលខាងមុខនេះ នឹងមានទស្សនកិច្ចយុវជនក្នុងរោងដាំបន្លែមួយនេះ ហើយមកទល់ពេលនេះ ចាប់ផ្តើមមានអតិថិជនត្រៀមបញ្ជាទិញពីទីនោះបណ្តើរៗហើយ ប៉ុន្តែឯកឧត្តមបានជំរុញឲ្យមានការចុះកិច្ចសន្យាកសិកម្ម មានផែនការត្រឹមត្រូវ ដើម្បីធានាបានទាំងតម្លៃនិងនិរន្តរភាពទីផ្សា។
ជាមួយគ្នានេះដែរ លោក ប៊ុន ផេង អភិបាលស្រុកខ្សាច់កណ្តាលបានមានប្រសាសន៍ដែរថា ក្នុងនាមអាជ្ញាធរស្រុក លោកបង្ហាញចំណាប់អារម្មណ៍ខ្ពស់ចំពោះក្រុមការងារទទួលបន្ទុកចលនាយុវជនស្រុកខ្សាច់កណ្តាល ដែលបានប្រឹងប្រែងជំរុញការដាំដុះបន្លែនៅក្នុងស្រុក ជាពិសេស យុវជនស្រុកខ្សាច់កណ្តាល ដោយធ្វើការចងក្រងគ្នាជាសហគមន៍ និងដាំដុះតាមផែនការដើម្បីបានចំណេញច្រើនពេលយកទៅលក់នៅលើទីផ្សារ ជាពិសេស សម្រាប់ទុនចំណាយលើការដាំដុះ ខាងធនាគារ ARDB តែងតែបានជួយផ្តល់ជាកម្ចីឥណទានដែលមានអត្រាការប្រាក់ទាបហើយកន្លងមក ក៏បានជួយអន្តរាគមន៍ចំពោះបញ្ហាពងទាធ្លាក់តម្លៃផងដែរ កាលពីពេលមុន។
ឯកឧត្តម កៅ ថាច បានមានប្រសាសន៍គូសបញ្ជាក់ដែរថា ឯកឧត្តម ឧបនាយករដ្ឋមន្ត្រី អូន ព័ន្ធមុនីរ័ត្ន តែងតែណែនាំជាបន្តបន្ទាប់លើកិច្ចការងារជំរុញការដាំដុះបន្លែសុវត្ថិភាពនេះ ហើយឯកឧត្តមសូមលើកទឹកចិត្តដល់ប្រជាពលរដ្ឋក្នុងស្រុកខ្សាច់កណ្តាល ជាពិសេស យុវជនខិតខំដាំដុះបន្លែឲ្យបានច្រើនបន្ថែមទៀត ដើម្បីចូលរួមបង្កើនការផ្គត់ផ្គង់ក្នុងប្រទេស បន្ថយការនាំចូលពីក្រៅប្រទេស មិនត្រឹមចំណេញដល់សេដ្ឋកិច្ចតែម្យ៉ាងទេ ប៉ុន្តែក៏ធ្វើឲ្យប្រជាពលរដ្ឋទូទាំងប្រទេសទទួលបានសុខភាពល្អ តាមរយៈការទទួលទានបន្លែសុវត្ថិភាព៕
