ក្រុមរថយន្ត OFF ROAD ខេមបូ ដឹកនាំដោយ លោក ព្រុំ រស្មី បាននាំយកអំណោយ ជាសម្ភារៈ សិក្សា អាវរងារ និងសម្ភារៈប្រើប្រាស់មួយចំនួនទៀត ចែកជូនដល់ប្រជាពលរដ្ឋរស់នៅ តំបន់ដាច់ ស្រយ៉ាល ចំនួន៣ភូមិ ស្ថិតនៅក្នុងឃុំដងពែង ស្រុកសែ្រអំបិល ខេត្ត កោះកុង ក្នុងនោះក៏មានការសហការពីលោក វង្ស គីមហួត ប្រធានក្រុម VKH CROSS COUNTRY នឹងទទួលបានការគាំទ្រពី លោក ញឹម សុវណ្ណារ៉ូ តំណាងក្រុមគ្រួសារមហាគ្រួសាររថយន្ត OFF ROAD កម្ពុជា និងក្រុមរថយន្ត OFF ROAD ជាច្រើនទៀត ។

លោក ព្រុំ រស្មី បានឲ្យដឹងថា នេះជាលើកទី៤ហើយ ដែលក្រុមរថយន្ត OFF ROAD ខេមបូ បានធ្វើដំណើរកំសាន្ត និងធ្វើសកម្មភាពមនុស្សធម៌ទៅកាន់តំបន់ឆាយរាប ដើម្បីចែករំលែកសេចក្តីស្រឡាញ់ជូនប្រជាពលរដ្ឋនៅតំបន់ទីដាច់ស្រយាលមួយនេះ និងតំបន់ដាច់ស្រយ៉ាលជាច្រើនទៀតផងដែរ ។ លោក បញ្ជាក់ថា នៅក្នុងដំណើរកំសាន្តនេះ មានរថយន្ត OFF ROAD ប្រមាណជា ៤០គ្រឿង មកពីក្រុមផ្សេងៗគ្នា នៃមហាគ្រួសាររថយន្ត OFF ROAD កម្ពុជា បានគៀងគរថវិកាសប្បុរសធម៌ពីបណ្តាក្រុមរថយន្ត OFF ROAD ទិញជាសម្ភារៈ មានដូចជា សម្ភារៈសិក្សា អាវរងារ ម៉ាស៊ីនភ្លើង អំពូលសូឡា រួមជាមួយសម្ភារៈប្រើប្រាស់ជាច្រើនទៀតផងដែរ ។

លោក ព្រុំ រស្មី អះអាងទៀតថា ជារៀងរាល់ឆ្នាំ ក្រុមរថយន្ត OFF ROAD ខេមបូ តែងតែមានដំណើរកំសាន្តរបស់ខ្លួន ទៅកាន់ឃុំដងពែង ស្រុកស្រែអំបិល ខេត្តកោះកុង ដែលមានស្ថានភាពផ្លូវលំបាក ឆ្លងកាត់ស្ទឹង អូជ្រៅៗ ថ្មធំៗ គល់ឈើ និងស្ពានចាស់ទ្រុឌទ្រោមជាដើម ប៉ុន្តែលោកសប្បាយរីករាយដែលមានក្រុមគ្រួសាររថយន្តផ្សេងទៀតចូលរួមដំណើរកំសាន្ត ទៅកាន់តំបន់ដាច់ស្រយាល ដូចជាក្រុម VKH CROSS COUNTRY ជាពិសេសក្រុមគ្រួសារមហាគ្រួសាររថយន្ត OFF ROAD កម្ពុជា ដែលដឹកនាំដោយលោក ញឹម សុវណ្ណារ៉ូ ដើម្បីផ្សព្វផ្សាយពីតំបន់ធនធានអេកូទេសរណ៍ធម្មជាតិ បរិស្ថាន កីឡា និងការងារមនុស្សធម៌ ក្រោមដំបូលសុខសន្តិភាព ដែលព្រះរាជាណាចក្រកម្ពុជាកំពុងតែមានក្រោមការដឹកនាំរបស់រាជរដ្ឋាភិបាល ។

សូមបញ្ជាក់ថា ដំណើរកំសាន្ត និងការងារមនុស្សប្រចាំឆ្នាំ របស់ ក្រុមរថយន្ត OFF ROAD ខេមបូ លើកទី៤នេះ បានចំណាយពេល២យប់៣ថ្ងៃ ចាប់ពីថ្ងៃទី៣០ ថ្ងៃទី៣១ ខែមករា ឆ្នាំ២០២១ ដោយមានការដឹកនាំពីក្រុមរថយន្ត OFF ROAD ខេមបូ និងក្រុម VKH CROSS COUNTRY នឹងទទួលបានការគាំទ្រពីលោក ញឹម សុវណ្ណារ៉ូ តំណាងក្រុមគ្រួសារមហាគ្រួសាររថយន្ត OFF ROAD កម្ពុជា បានចុះចែកអំណោយជូនពលរដ្ឋ នៅភូមិចំនួន៣ ភូមិពោធិ៍បឹង ភូមិកំលូត និងភូមិអូសំរោង ស្ថិតនៅឃុំដងពែង ស្រុកស្រែអំបិល ខេត្ត កោះកុង ៕