សាលារៀនចំនួន៣០ក្នុងខេត្តសៀមរាបទទួលបានធុងបែងចែកសំរាម តាមរយៈក្រសួងអប់រំ យុវជន និងកីឡា ក្រុមហ៊ុន កូកា-កូឡា កម្ពុជា និងអង្គភាពពាក់ព័ន្ធ
សៀមរាប៖ ក្រសួងអប់រំ យុវជន និងកីឡា ក្រុមហ៊ុន កូកា-កូឡា កម្ពុជា និង អង្គការជឿជាក់លើសិស្សជនបទកម្ពុជា បានសហការប្រគល់ធុងបែងចែកសំរាមជូនដល់សាលារៀនចំនួន ៣០ ក្នុងខេត្តសៀមរាម ដែលពិធីនេះធ្វើឡើងនៅក្នុងវិទ្យាល័យហ៊ុនសែនរលួស ខេត្តសៀមរាម ក្រោមអធិបតីភាពឯកឧត្តម សុខ សប្បាយណា អនុរដ្ឋលេខាធិការនៃក្រសួងអប់រំ យុវជន និងកីឡា ។
កម្មវិធីនេះ គឺជាការគាំទ្រមួយដល់គោលដៅជាសកលរបស់ក្រុមហ៊ុន កូកា-កូឡា ដែលបានកំពុងអនុវត្តសកម្មភាពប្រមូលដើម្បីយកទៅកែច្នៃប្រើប្រាស់ឡើងវិញ នូវសំបកវេចខ្ចប់ឲ្យស្មើនឹងចំនួនសំបកវេចខ្ចប់ដែលក្រុមហ៊ុនបានប្រើប្រាស់នៅលើទីផ្សារនៅត្រឹមឆ្នាំ ២០៣០ ។ គោលដៅនិរន្តភាពនេះ មានឈ្មោះថា «ពិភពលោកគ្មានសំរាម» យកចិត្តទុកដាក់ជាខ្លាំងលើ វដ្តជីវិតនៃសំបកវេចខ្ចប់ រាប់ចាប់ពីវិធីសាស្ត្រដែលសំបកវេចខ្ចប់ត្រូវបានរចនា និងផលិត រហូតដល់យុទ្ធសាស្ត្រប្រមូលយកទៅកែច្នៃ ប្រើប្រាស់ឡើងវិញ ។ ឯកឧត្តម សុខ សប្បាយណា អនុរដ្ឋលេខាធិការនៃក្រសួងអប់រំ យុវជន និងកីឡា បានមានប្រសាសន៍លើកទឹកចិត្តទៅកាន់លោកគ្រូ អ្នកគ្រូ ដោយមើលឃើញអំពីការលះបង់ និងប្អូនៗ សិស្សានុសិស្ស ដោយមើលឃើញអំពីក្តីសង្ឃឹម ។ ទន្ទឹមនឹងនេះ ឯកឧត្តម បានលើកឡើងបន្ថែមថា បញ្ហាសំរាម បញ្ហាអនាម័យ ជាបញ្ហាដ៏សំខាន់មួយ ជាបញ្ហារួមគ្នាមួយ ហើយទាមទារឱ្យមានការរួមគ្នាដោះស្រាយ ដើម្បីទទួលបានជោគជ័យ និងនិរន្តរភាព ។
លោក រស់ សោភា នាយកផ្នែកច្បាប់ និងទំនាក់ទំនងកិច្ចការសាធារណៈប្រចាំប្រទេស ក៏បានមានប្រសាសន៍ផងដែរថា « ការប្រគល់ធុងបែងចែកសំរាមនាថ្ងៃនេះ គឺធ្វើឡើងក្នុងគោលបំណងបញ្ជ្រាបការអប់រំដល់សិស្សនុសិស្សអំពីការបែងចែកសំណល់ ក៏ដូចជាសម្រួលដល់ការគ្រប់គ្រងសំណល់ក្នុងសាលារៀន ។ លោកបន្ថែមថា ការគ្រប់គ្រងសំណល់ប្រកបដោយប្រសិទ្ធភាព លុះត្រាតែមានចូលរួមដោះស្រាយពីភាគីពាក់ព័ន្ធទាំងអស់មិនថា វិស័យសាធារណៈ វិស័យឯកជន អង្គការ សហគមន៍ និងប្រជាសហគមន៍ ។ ខ្ញុំជឿជាក់ថា ការរួបរួមគ្នារបស់ពួកយើងទាំងអស់គ្នា ពិតជាអាចចូលរួមដោះស្រាយកង្វល់នេះបាន ៕
