វិនិយោគិនសិង្ហបុរី និង កម្ពុជាបោះទុនរួមគ្នាយ៉ាងច្រើន ដើម្បីអភិវឌ្ឍបន្លែសុវត្ថិភាពសម្រាប់ទីផ្សារកម្ពុជា និងនាំចេញទៅក្រៅប្រទេស
ភ្នំពេញ ៖ ដោយសម្លឹងពីសក្ដានុពលនៃការអភិវឌ្ឍបន្លែសុវត្ថិភាពនៅក្នុងប្រទេសកម្ពុជា វិនិយោគិនសិង្ហបុរី និងវិនិយោគិនកម្ពុជាបានរួមគ្នាក្នុងការអភិវឌ្ឍបន្លែសុវត្ថិភាព ដើម្បីផ្គត់ផ្គង់នៅលើទីផ្សារក្នុងស្រុក និងសម្រាប់នាំចេញទៅកាន់ទីផ្សារអន្តរជាតិផងដែរ ។
លោក ឃិន ម៉ារិទ្ធ អ្នកគ្រប់គ្រងទូទៅនៃក្រុមហ៊ុនអភិវឌ្ឍន៍សុវត្ថិភាព អាគ្រីអន ខេមបូឌា (Agrion Cambodia) បានប្រាប់អ្នកសារព័ត៌មានក្នុងសន្និកាសែតឱ្យដឹងថា ដោយសារតែចង់ជួយដល់កសិករ ជាពិសេសជួយដល់ប្រជាជនកម្ពុជាទទួលបានចំណីអាហារ ក្នុងនោះបន្លែផងដែរ ដែលមានសុវត្ថិភាព ក្រុមហ៊ុនសិង្ហបុរី និងកម្ពុជា បានសម្រេចក្នុងការដាក់ទុនរួមគ្នា ដើម្បីអភិវឌ្ឍន៍បន្លែសុវត្ថិភាពនៅក្នុងប្រទេសកម្ពុជា ។ ក្នុងកិច្ចសហការនេះ ភាពគីទាំងពីរក៏បានចាប់ដៃគូជាមួយនឹងប្រជាពលរដ្ឋក្នុងសហគមន៍ ដើម្បីដាំបន្លែសុវត្ថិភាពនេះដែរ ដោយរហូតមកដល់ពេលនេះ មានកសិករប្រមាណ៤៨០គ្រួសារ និងក្នុងបណ្ដាខេត្តចំនួន៩ ហើយគោលដៅនឹងពង្រីកឱ្យបាន១៣ខេត្តទូទាំងប្រទេសក្នុងការអភិវឌ្ឍបន្លែសុវត្ថិភាពនេះ ។លោកបន្តថា ជំហ៊ានដំបូង ពួកយើងនឹងជំរុញឱ្យពលរដ្ឋកម្ពុជា យល់ដឹងពីការទទួលទានបន្លែសុវត្ថិភាព និង គាំទ្ររបស់កសិករកម្ពុជា ។
នៅពេលបន្លែសុវត្ថិភាពនេះបានជ្រួតជ្រាបដល់ប្រជាពលរដ្ឋកម្ពុជា ជំហ៊ានបន្ទាប់ពួកយើងនឹង ជំរុញឱ្យកសិករអភិវឌ្ឍន៍ ដើម្បីនាំចេញទៅកាន់ទីផ្សារអន្តរជាតិ ហើយទីផ្សារដែលយើងគិតគូរក្នុងការនាំចេញនោះគឺទីផ្សារសិង្ហបុរី ដោយសារប្រទេសនេះ មានតម្រូវការបន្លែខ្ពស់ និងនាំចូលពីប្រទេសវៀតណាម និងប្រទេសថៃជាច្រើន ដូច្នេះកម្ពុជាក៏អាចបញ្ជ្រាបទីផ្សារផលិតផលរបស់យើងទៅកាន់ទីផ្សារប្រទេសសិង្ហបុរីបានផងដែរ ។ អ្នកអភិវឌ្ឍន៍បន្លែសុវត្ថិភាពរូបនេះបានឱ្យដឹងទៀតថា ដើម្បីជំរុញដល់កសិករដាំដុះបន្លែសុវត្ថិភាពឱ្យបានកាន់តែច្រើន ខាងយើងក៏មានក្រុមការងារបច្ចេកទេស ដើម្បីចុះណែនាំដល់កសិ ករ ក្នុងការដាំដុះទៅតាមបច្ចេកទេស និងផលិតផលនូវបន្លែដែលមានសុវត្ថិភាព សម្រាប់អ្នកទទួលទាន ។ ម្យ៉ាងទៀត ដើម្បីឱ្យកសិករកាន់តែមានទំនុកចិត្តយើង ក្រុមហ៊ុនក៏មានការធ្វើកិច្ចសន្យាកសិកម្មជាមួយកសិករដែរ តែក្នុងនោះ យើងមិនកំណត់តម្លៃ ក្នុងការទិញលក់ឡើង តែយ៉ាងណាយើមិនធ្វើឱ្យកសិករកម្ពុជាអស់សង្ឃឹមក្នុងការដាំដុះ ឬមិនធ្វើឱ្យកសិករខាតបង់នោះដែរ ។ លោកបន្ថែមថា គម្រោងអភិវឌ្ឍន៍បន្លែសុវត្ថិភាពនេះដែរ ក៏មានការគាំទ្រទាំងថវិកានិងបច្ចេកទេសពីទីភ្នាក់ងារសហរដ្ឋអាមេរិកសម្រាប់កិច្ចអភិវឌ្ឍអន្តរជាតិ យូសេដ ( USAID ) របស់សហរដ្ឋអាមេរិកផងដែរ ដូច្នេះយើងជឿថា គម្រោងនេះនឹងជួយដល់កសិករកម្ពុជា មានជីវភាពល្អប្រសើរមួយកម្រិតទៀតដែរ ។
ឯកឧត្តមវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទេ បានមានប្រសាសន៍ផងដែរថា ក្នុងនាមក្រសួងកសិកម្ម ពិតជារីករាយនិងសប្បាយចិត្ត នៅពេលឃើញមានវិនិយោគិនចាប់អារម្មណ៍លើការវិនិយោគក្នុងវិស័យកសិកម្ម មិនថា ផ្នែកណាមួយនោះឡើយ ។ ហើយក្រសួងក៏រឹតតែត្រេកអរ និងសប្បាយចិត្តកាន់តែខ្លាំង នៅពេលកសិករកម្ពុជាកាន់តែមានជីវភាពធូរធា ។ ឯកឧត្តមបន្តថា គោលដៅរបស់រាជរដ្ឋាភិបាលគឺជំរុញការអភិវឌ្ឍវិស័យកសិកម្ម ដោយផ្គត់ផ្គង់ទៅក្នុងស្រុកឱ្យបានគ្រប់គ្រាន់ កាត់បន្ថយការនាំចូលពីខាងក្រៅនូវផលិតផលណាដែលកម្ពុជាអាចផលិតបាន និងឈានទៅរកការនាំចេញទៅកាន់ទីផ្សារអន្តរជាតិនៅពេលអនាគត ៕