នាយករដ្ឋមន្រ្តីថៃនឹងទទួលការចាក់វ៉ាក់សាំងបង្ការ Covid-19 របស់ក្រុមហ៊ុនAstraZeneca នៅថ្ងៃអាទិត្យសប្តាហ៍នេះ
ថៃ៖ នាយករដ្ឋមន្រ្តីថៃ លោក ប្រាយុទ្ធ ចាន់អូចា នៅថ្ងៃអាទិត្យនេះ នឹងទទួលការចាក់វ៉ាក់សាំង COVID-19 ដូសដំបូងរបស់ក្រុមហ៊ុនផលិតឱសថអង់គ្លេស អាស្រ្តាហ្សេណេកា ខណៈឧបនាយករដ្ឋមន្រ្តី និងជារដ្ឋមន្រ្តីសុខាភិបាលថៃ លោក អនុធីន ឆានវីរៈគុល នឹងទទួលការចាក់វ៉ាក់សាំងរបស់ក្រុមហ៊ុនផលិតឱសថចិន ស៊ីនណូវ៉ាក់ ។
ប្រធានអនុគណៈកម្មាធិការរដ្ឋាភិបាលថៃ ទទួលបន្ទុកផ្នែកគ្រប់ គ្រងវ៉ាក់សាំងបង្ការ COVID-19 លោកវេជ្ជបណ្ឌិត សុផុន មេកថុន បាននិយាយថា លោក ប្រាយុទ្ធ និងលោក អនុធីន នឹងចាក់វ៉ាក់សាំងបង្ការ COVID-19 នៅឯវិទ្យាស្ថានបង្ការជំងឺឆ្លង ផាមរ៉ាស្នារ៉ាឌូរ៉ា នៅថ្ងៃអាទិត្យនេះ ក្រោយនាយកដ្ឋានវិទ្យាសាស្ត្រវេជ្ជសាស្រ្ត បានអនុម័តលើការចេញវិញ្ញាបនប័ត្របញ្ជាក់ពីប្រសិទ្ធភាពវ៉ាក់សាំងនេះ ។
ស្របពេលជាមួយគ្នានោះដែរ លោកវេជ្ជបណ្ឌិត សុផុន មេកថុន បានបន្ថែមទៀតថា ការចាក់វ៉ាក់សាំងបង្ការ COVID-19 ជូនដល់ក្រុមមនុស្សអាទិភាពផ្សេងៗទៀត ដែលស្ថិតនៅក្នុងបណ្ដាខេត្តគោលដៅមួយចំនួន នឹងចាប់ផ្តើមនៅថ្ងៃចន្ទសប្ដាហ៍ក្រោយនេះ ៕ ប្រភព៖ Bangkok Post
