កូរ៉េខាងត្បូងចាប់ផ្តើមយុទ្ធនាការចាក់វ៉ាក់សាំងបង្ការ Covid-19 ក្នុងទ្រង់ទ្រាយធំទូទាំងប្រទេស
កូរ៉េខាងត្បូង៖ រដ្ឋាភិបាលកូរ៉េខាងត្បូងនៅថ្ងៃសុក្រនេះ បានបើកយុទ្ធនាការចាក់វ៉ាក់សាំង COVID-19 ក្នុងលក្ខណៈទ្រង់ទ្រាយធំរបស់ខ្លួនទូទាំងប្រទេស ដោយចាប់ផ្តើមពីអ្នកជំងឺ និងបុគ្គលិកសុខាភិបាលដែលមានអាយុក្រោម៦៥ឆ្នាំនៅតាមមន្ទីរពេទ្យ និងមណ្ឌលថែទាំសុខភាព ។
យុទ្ធនាការចាក់វ៉ាក់សាំងឥតគិតថ្លៃនេះ បានចាប់ផ្តើមពីម៉ោង៩ព្រឹកថ្ងៃសុក្រនេះ (ម៉ោងក្នុងតំបន់)នៅទូទាំងប្រទេសកូរ៉េខាងត្បូង ។ ប្រជាជន និងបុគ្គលិកជាង៥,២៦០នាក់នៅក្នុងមជ្ឈមណ្ឌលថែទាំ ដែលរួមមានមជ្ឈមណ្ឌលថែទាំផ្នែកចិត្តសាស្រ្ត និងមជ្ឈមណ្ឌលស្តារនីតិសម្បទាចំនួន២១៣កន្លែង នឹងទទួលបានការចាក់វ៉ាក់សាំង COVID-19 សម្រាប់ដូសដំបូងរបស់ពួកគេ ដោយប្រើប្រាស់វ៉ាក់សាំងរបស់ក្រុមហ៊ុនផលិតឱសថអង់គ្លេស AstraZeneca និងសាកលវិទ្យាល័យ Oxford ។ រីឯប្រជាជន និងបុគ្គលិកនៅក្នុងមជ្ឈមណ្ឌលថែទាំរយៈពេលវែងចំនួន ២៩២កន្លែងទៀតក៏នឹងទទួលបានការចាក់វ៉ាក់សាំងនេះផងដែរ ។
សូមជម្រាបថា កូរ៉េខាងត្បូងនឹងចាក់វ៉ាក់សាំង COVID-19 សម្រាប់ដូសដំបូងជូនដល់ប្រជាជន និងបុគ្គលិកប្រមាណ៣៤ម៉ឺន៤ពាន់នាក់នៅក្នុងមជ្ឈមណ្ឌលថែទាំរយៈពេលវែង ដែលរួមមានមជ្ឈមណ្ឌលថែទាំផ្នែកចិត្តសាស្ត្រ និងមជ្ឈមណ្ឌលស្តារនីតិសម្បទា និងបុគ្គលិកពេទ្យជួរមុខចំនួន៥ម៉ឺន៥ពាន់នាក់ទៀតនៅក្នុងខែមីនា ឆ្នាំ២០២១នេះ ៕ ប្រភព៖ ស៊ីនហួរ
