លោក ចូ បៃដិន និយាយថា សហរដ្ឋអាមេរិកនឹងបើកយុទ្ធនាការអប់រំទ្រង់ទ្រាយធំដល់ប្រជាជនអាមេរិកអំពីវ៉ាក់សាំងបង្ការ Covid-19
អាមេរិក៖ ប្រធានាធិបតីអាមេរិកលោក ចូ បៃដិន នៅថ្ងៃព្រហស្បតិ៍នេះនិយាយថា រដ្ឋបាលរបស់លោកមានផែនការបើកយុទ្ធនាការមួយ ដើម្បីអប់រំប្រជាពលរដ្ឋអាមេរិកអំពីវ៉ាក់សាំងការពារវីរុសកូរ៉ូណា នៅក្នុងអំឡុងពេលមួយនៃឆ្នាំ២០២១នេះ ខណៈដែលការផ្គត់ផ្គង់វ៉ាក់សាំងបានកើនលើសតម្រូវការ ពីព្រោះតែការស្ទាក់ស្ទើរក្នុងការចាក់វ៉ាក់សាំង ។
ប្រធានាធិបតីអាមេរិករូបនេះ បានគូសបញ្ជាក់ថា យើងនឹងបើកយុទ្ធនាការក្នុងទ្រង់ទ្រាយធំមួយ ដើម្បីអប់រំប្រជាជនអំពីវ៉ាក់សាំង…. ពួកគេ (វ៉ាក់សាំង) ពិតជាមានសុវត្ថិភាព និងប្រសិទ្ធភាព ហើយថា យើងនឹងប្រមូលផ្តុំអ្នកដឹកនាំគ្រប់ផ្នែកនៃសង្គមរបស់យើង ដើម្បីអប់រំ និងលើកទឹកចិត្តជនជាតិអាមេរិកទាំងអស់អោយចាក់វ៉ាក់សាំង ។
គួរបញ្ជាក់ផងដែរថា សហរដ្ឋអាមេរិកបានចាក់វ៉ាក់សាំងការពារជំងឺ COVID-19 ប្រមាណ៦៦លាន៤៦ម៉ឺន៤ពាន់៩៤៧ដូសជូនដល់ប្រជាជនរបស់ខ្លួន គិតត្រឹមព្រឹកថ្ងៃពុធសប្តាហ៍នេះ (ម៉ោងក្នុងតំបន់) នៅក្នុងចំណោមវ៉ាក់សាំងដែលបានចែកចាយសរុប៨៨លាន៦៦ម៉ឺន៩ពាន់៣៥ដូស ហើយវ៉ាក់សាំងទាំងអស់ខាងលើនេះ គឺជាសុទ្ធតែជាផលិតផលរបស់ក្រុមហ៊ុន ម៉ូឌែណា និង ភីហ្វីហ្សឺ-បាយអូអិនធិច ៕ ប្រភព៖ AFP
