អង្គការសហប្រជាជាតិអនុម័តសេចក្តីសម្រេចថ្មីមួយទៀត ដើម្បីអំពាវនាវអោយមានការទទួលបានវ៉ាក់សាំង Covid-19 ដោយសមភាព
បរទេស៖ ក្រុមប្រឹក្សាសន្តិសុខអង្គការសហប្រជាជាតិ នៅថ្ងៃសុក្រសប្តាហ៍នេះ បានផ្តល់ការអនុម័តយល់ព្រមជាឯកច្ឆន្ទលើសេចក្តីសម្រេចមួយ ដែលអំពាវនាវអោយមានការទទួលបាននូវវ៉ាក់សាំង COVID-19 នៅក្នុងប្រទេសដែលមានបញ្ហាជម្លោះ និងប្រទេសក្រីក្រ ។
សេចក្តីសម្រេចខាងលើនេះ បានសង្កត់ធ្ងន់ទៅលើភាពចាំបាច់ជាបន្ទាន់នូវសាមគ្គីភាព សមធម៌ និងប្រសិទ្ធភាព ក្នុងការប្រយុទ្ធប្រឆាំង COVID-19 នៅតាមប្រទេសដែលមានលទ្ធភាពតិចតួច ក្នុងការទទួលបានវ៉ាក់សាំងបង្ការជំងឺនេះ ។ សេចក្តីសម្រេចដដែលនេះ ក៏ស្នើឲ្យបណ្តាប្រទេសអភិវឌ្ឍន៍ និងប្រទេសទាំងឡាយដែលមានលទ្ធភាព ជួយគ្នាបរិច្ចាគវ៉ាក់សាំងទៅកាន់បណ្តាប្រទេសចំណូលមធ្យមនិងទាប ក៏ដូចជាប្រទេសដែលត្រូវការជាចាំបាច់ ។
សូមជម្រាបថា នេះគឺជាសេចក្តីសម្រេចទី០២ហើយ ស្តីពីជំងឺ COVID-19 ដែលត្រូវបានអនុម័តដោយក្រុមប្រឹក្សាសន្តិសុខអង្គការសហប្រជាជាតិ ចាប់តាំងវិបត្តិជំងឺនេះបានផ្ទុះឡើងកាលពីមួយឆ្នាំមុន ខណៈសេចក្តីសម្រេចទី០១ ដែលត្រូវបានអនុម័តកាលពីខែកក្កដា ឆ្នាំ២០២០ មានគោលដៅអំពាវនាវឲ្យមានបទឈប់បាញ់នៅតាមតំបន់ជម្លោះប្រដាប់អាវុធទាំងឡាយ ដើម្បីផ្តោតទៅសម្រួលដល់កិច្ចប្រឹងប្រែងប្រយុទ្ធប្រឆាំងនឹងជំងឺ COVID-19 ៕ ប្រភព៖ AFP
