ក្រុមហ៊ុនអាកាសចរណ៍អាមេរិក United Airlines បញ្ជាទិញយន្ដហោះ Boeing ប្រភេទ 737 MAX បន្ថែមចំនួន២៥គ្រឿងទៀត ដែលគ្រោងនឹងប្រគល់នៅឆ្នាំ២០២៣
អាមេរិក៖ ក្រុមហ៊ុនអាកាសចរណ៍អាមេរិក United Airlines Holdings Inc. ប្រកាសថា ខ្លួនបានបញ្ជាទិញយន្ដហោះពីក្រុមហ៊ុន Boeing Co. ប្រភេទ 737 MAX បន្ថែមចំនួន២៥គ្រឿងទៀត ដែលគ្រោងនឹងប្រគល់នៅឆ្នាំ២០២៣ខាងមុខនេះ ដើម្បីត្រៀមសម្រាប់ការងើបឡើងវិញនៃការធ្វើដំណើរតាមផ្លូវអាកាស ក៏ដូចជាវិស័យទេសចរណ៍ ។
បើតាមក្រុមហ៊ុនអាកាសចរណ៍ដែលមានមូលដ្ឋាននៅទីក្រុងឈីកាហ្គោនេះ ខ្លួនបានពន្លឿនការដឹកជញ្ជូនយន្ដហោះប្រភេទ MAX ចំនួន៤០គ្រឿងបន្ថែមទៀតនៅឆ្នាំ២០២២ និង០៥គ្រឿងទៀតរហូតដល់ឆ្នាំ ២០២៣ ។ យ៉ាងណាមិញ ក្រុមហ៊ុន United Airlines បានបញ្ជាក់ពីការប្តេជ្ញាចិត្តថា នឹងបញ្ជាទិញឲ្យបាន១៨៨គ្រឿងនៃយន្តហោះប្រភេទ MAX ។
ស្របពេលជាមួយគ្នានេះដែរ ប្រធានពាណិជ្ជកម្មរបស់ក្រុមហ៊ុន United Airlines លោក អាន់ឌ្រូ ណូសែលឡា បាននិយាយថា នៅពេលចុងបញ្ចប់នៃជំងឺរាតត្បាតកាន់តែខិតជិត ហើយវ៉ាក់សាំងនៅតែបន្តចែកចាយនោះ ដូច្នេះការប្រកាសនៅថ្ងៃនេះនឹងជួយកំណត់គោលដៅរបស់យើង ដើម្បីឆ្លើយតបនឹងតម្រូវការដែលយើងរំពឹងថា នឹងមើលឃើញនៅឆ្នាំ២០២២ និងឆ្នាំ២០២៣ខាងមុខនេះ ៕ ប្រភព៖ WSJ
