ថ្នាក់ដឹកនាំសហព័ន្ធខ្មែរកីឡាអត្តពលកម្មស្ម័គ្រចិត្ត បានពិភាក្សាលើផែនការធំៗចំនួន៣ ត្រៀមចូលរួមប្រកួតលើឆាកអន្តរជាតិ
ឯកឧត្តម អ៊ុក សិទ្ធិជាតិ ប្រធានសហព័ន្ធខ្មែរកីឡាអត្តពលកម្មស្ម័គ្រចិត្ត បានបើកកិច្ចពិភាក្សាតាមអនឡាញ ក្នុងក្របខ័ណ្ឌសមាជិកប្រតិបត្តិរបស់ខ្លួន ដោយផ្តោតសំខាន់លើគោលដៅចំនួន៣ធំៗសម្រាប់ការហ្វឹកហាត់ និងត្រៀមចូលរួមប្រកួតលើឆាកអន្តរជាតិ ក្នុងឆ្នាំ២០២១នេះ ។
ឯកឧត្តមប្រធាន លើកឡើងថា កិច្ចពិភាក្សានេះផ្តោតការយកចិត្តទុកដាក់លើចំណុចទី១ គឺការបញ្ជូនកីឡាករ និងគ្រូបង្វឹកជម្រើសជាតិអត្តពលកម្មចេញទៅហ្វឹកហាត់នៅប្រទេសជប៉ុន តាមការឯកភាពគ្នាពីមុនមក ។ ទី២ ពាក់ព័ន្ធនឹងការចូលរួមប្រកួតកីឡាអូឡាំពិកហ្គេម នៅទីក្រុងតូក្យូ ប្រទេសជប៉ុន អំឡូងខែកក្កដា ឆ្នាំ២០២១ និងទី៣ ពាក់ព័ន្ធនឹងការប្រមូលផ្តុំ ត្រៀមលក្ខណៈចូលរួមប្រកួតប្រជែង ក្នុងស៊ីហ្គេម ចុងឆ្នាំ២០២១ នៅប្រទេសវៀតណាម ។
ក្រោយបញ្ចប់កិច្ចប្រជុំ លោក ហ៊ុន បុរី អគ្គលេខាធិការ សហព័ន្ធ បានអោយដឹងថា ក្រុមជម្រើសជាតិអត្តពលកម្ម ក្រោមការឧបត្ថម្ភគាំទ្រពីក្រសួងអប់រំ យុវជន និងកីឡា មានចំនួនសរុប២៧នាក់ ក្នុងនោះមានកីឡាការិនី ៦នាក់ គ្រូបង្វឹក៩នាក់ ដែលត្រៀមចេញទៅហ្វឹកហាត់នៅជប៉ុនខ្លះ និងហ្វឹកហាត់ នៅប្រទេសចិន នាដើមខែសីហា ឆ្នាំ២០២១ សរុបមានចំនួន១៥នាក់ ។ លោកអគ្គលេខាធិការ បញ្ជាក់ថា ក្នុងកិច្ចប្រជុំសមាជិកប្រតិបត្តិសហ បានសម្រេចចិត្តជ្រើសរើស លោក ពុធ បូរាត្រី ជាគ្រូបង្វឹក និងកីឡាករ ប៉ែន សុគង់ ឲ្យចូលរួមការប្រកួតកីឡាអូឡាំពិកទីក្រុងតូក្យូ ប្រទេសជប៉ុន ។
សូមបញ្ជាក់ថា ព្រឹត្តិការណ៍កីឡាអូឡាំពិក ឆ្នាំ២០២០ ដែលប្រព្រឹត្តទៅនៅទីក្រុង តូក្យូ ប្រទេសជប៉ុន នឹងធ្វើពិធីបើកជាផ្លូវការនាថ្ងៃទី២៣ ខែកក្កដា ឆ្នាំ២០២១ ខាងមុខ ក្នុងនោះសហព័ន្ធ បានបញ្ជូនកីឡាករ ប៉ែន សុគង់ ប្រកួតលើវិញ្ញាសារត់ ១០០ម៉ែត្រ ដោយសារការប្រកួតកីឡាអូឡាំពិកឲ្យប្រកួតតែមួយវិញ្ញាសាប៉ុណ្ណោះ ៕