អ្នកនាំពាក្យរដ្ឋាភិបាលៈ ការរិះគន់របស់មេខ្លោងឧទ្ទាមក្រៅច្បាប់ពីការបិទខ្ទប់ក្រុងភ្នំពេញ និងក្រុងតាខ្មៅ គឺដើម្បីចង់ទាក់ទាញការចាប់អារម្មណ៍តែប៉ុណ្ណោះ!
ដោយៈ ឫទ្ធិស័ក្តិ
ភ្នំពេញៈ អ្នកនាំពាក្យរាជរដ្ឋាភិបាលកម្ពុជាបានបញ្ជាក់ថា ការរិះគន់របស់មេខ្លោងឧទ្ទាមក្រៅច្បាប់អំពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល គឺដើម្បីចង់ទាក់ទាញការចាប់អារម្មណ៍ពីសំណាក់ប្រជាពលរដ្ឋ និងចង់បំផុសឲ្យប្រជាពលរដ្ឋយកចិត្តទុកដាក់ស្តាប់ការចង្អុលបង្ហាញ ឬ គោលការណ៍របស់ខ្លួនតែប៉ុណ្ណោះ។
ឯកឧត្តម ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានមានប្រសាសន៍នៅព្រឹកថ្ងៃទី២៣ខែមេសានេះថា អ្វីដែលមេខ្លោងឧទ្ទាមក្រៅច្បាប់ សម រង្ស៊ី រិះគន់សេចក្តីសម្រេចបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាលរបស់រដ្ឋាភិបាលកម្ពុជា គឺជាចរិតឧទ្ទាមកាលណាយើងថា “ស” វាថា “ខ្មៅ” និងចង់ទាក់ទាញការចាប់អារម្មណ៍ពីសំណាក់ប្រជាពលរដ្ឋតែប៉ុណ្ណោះ។ អ្វីដែលមេខ្លោងឧទ្ទាមបានលើកឡើង គឺចង់និយាយដើម្បីបំផុសឲ្យប្រជាពលរដ្ឋយកចិត្តទុកដាក់ស្តាប់ការចង្អុលបង្ហាញ ឬគោលការណ៍របស់ខ្លួនតែ។
ឯកឧត្តម ផៃ ស៊ីផាន បានបញ្ជាក់ទៀតថា ចាប់តាំងពីកម្ពុជាមានករណីឆ្លងជំងឺកូវីដ១៩ គឺមេខ្លោងឧទ្ទាមក្រៅច្បាប់ សម រង្ស៊ី មិនដែលបានជួយមួយដុល្លារ ដល់រាជរដ្ឋាភិបាលក្នុងការចូលរួមទប់ស្កាត់ប្រយុទ្ធប្រឆាំអជំងឺកូវីដ១៩ នោះទេ។
ចំណែកឯអ្នកនាំពាក្យអគ្គស្នងការដ្ឋាននគរបាលជាតិវិញ ឯកឧត្តមឧត្តមសេនីយ៍ឯក ឆាយ គឹមខឿន បានមានប្រសាសន៍នៅព្រឹកនេះដែរថា ការដាក់កម្លាំងសមត្ថកិច្ចនៅតាមគោលដៅដែលបានកំណត់សម្រាប់អនុវត្តវិធានការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាល គឺជាការអនុវត្តទៅតាមខ្លឹមសារសេចក្តីសម្រេច (ទី១) ។ ទី២. ជាការបំពេញកាតព្វកិច្ចចូលរួមបង្ការទប់ស្កាត់នៅការឆ្លងរាលដាលជំងឺកូវីដ១៩។ ជាធម្មតាកាលណាដាក់បំរាមគោចរ និងដាក់គោលដៅបិទខ្ទប់ គឺវាត្រូវតែមានភាពម៉ត់ចត់តឹងតែង ហើយវាធ្វើឲ្យអ្នកដែលរិះគនើចេះតែរកគន្លឹះ ដើម្បីប្រឆាំអងជាមួយរដ្ឋាភិបាលតែប៉ុណ្ណោះ។ អ្វីដែលយើងធ្វើ គឺចូលរួមចំណែកនៅក្នុងការការពារសុខភាពសាធារណៈ ការពារសុខភាពប្រជាពលរដ្ឋ ការពារសុខមាលភាពសង្គម និងការពារអាយុជីវិតប្រជាពលរដ្ឋ និងសង្គមជាតិ។
លោកឧត្តមសេនីយ៍ឯក ឆាយ គឹមខឿន បានបញ្ជាក់ថា “កងកម្លាំងនគរបាលដែលដាក់ពង្រាយ ក៏ដូចជាកងកម្លាំងសមត្ថកិច្ចដែលពាក់ព័ន្ធដទៃទៀត បានលះបង់ពេលវេលាច្រើនណាស់ និងស៊ូទ្រាំជាមួយនឹងការកំបាកច្រើនណាស់ក្នុងការឈរនៅតាមគោលដៅដើម្បីត្រួតពិនិត្យរាំងខ្ទប់ការធ្វើចរាចរណ៍ចេញចូលដែលបានកំណត់នៅក្នុងសេចក្តីសម្រេចរបស់រដ្ឋាភិបាល ក៏ដូចជាអាជ្ញាធរពាក់ព័ន្ធ ។យើងធ្វើនេះដើម្បីសុវត្ថិភាព និងសុខមាលភាពសង្គមទាំងអស់”។
អ្នកនាំពាក្យអគ្គស្នងការដ្ឋាននគរបាលជាតិបានបន្តថា ចំពោះទស្សនៈដែលបានលើកឡើង គឺជាទស្សនៈជ្រុលនិយម ជាទូទៅនៅលើពិភពលោកប្រទេសណាក៏ដូចគ្នាដែរ គ្រាន់តែវិធានខុសគ្នា និងលក្ខខណ្ឌខុសគ្នា តែគេត្រូវតែមានការបិទខ្ទប់នៅពេលដែលមានហានិភ័យឆ្លងចូលក្នុងសហគមន៍។ តើពួកគេចង់ឲ្យមនុស្សដើរពេញប្រទេស ឬក៏ចង់ឲ្យរលាយស្រុកទេស ឬយ៉ាងណា? ហើយការខ្វះចន្លោះរបស់អាជ្ញាធរវាតែងតែមាន ហើយក៏ជាពិសោធន៍លើកទី១ សម្រាប់កម្ពុជាដែរ និងជារឿងថ្មីបំផុតដែរ។ ថ្វីត្បិតរដ្ឋាភិបាលបានត្រៀមលក្ខណៈសម្បត្តិក៏ពិតមែន តែការផ្ទុះជំងឺកូវីដ១៩ ចូលក្នុងសហគមន៍ប្រទេសណាក៏ដូចជាប្រទេសណាដែរពិបាកគ្រប់គ្រង។ ដូច្នេះបើយោងគ្រប់គ្រងការងារឆ្លងរាលដាលចូលសហគមន៍បាន គឺយើងជោគជ័យក្នុងការតស៊ូប្រយុទ្ធប្រឆាំងជាមួយកូវីដ១៩ ហើយត្រូវយកទស្សនៈសុទិដ្ឋនិយមមកនិយាយ។មនុស្សមួយចំនួនទិតៀនហើយ ព្រោះអត់មានអីទិតៀនក្រៅពីនេះទៀតទេ។បើយើងអត់ធ្វើ គេនិយាយថា ទុកឲ្យប្រជាពលរដ្ឋស្លាប់ តែបើយើងធ្វើ គេថាតឹងរ៉ឹង។
និយាយពីក្រៅប្រទេស ទណ្ឌិត សម រង្ស៊ី បានលើកឡើងដោយរបៀបប្រឆាំងទៅនឹងវិធានការសុខាភិបាលនិងវិធានការច្បាប់ដែលរាជរដ្ឋាភិបាលប្រកាន់យកដើម្បីបង្ការទប់ស្កាត់នូវការរីករាលដាលនៃជំងឺកូវីដ១៩។
សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានបញ្ជាក់ម្តងហើយម្តងទៀតកាលពីពេលកន្លងទៅថ្មីៗនេះថា វិធានការដែលរាជរដ្ឋាភិបាលបានប្រកាន់យកគឺដើម្បីការពារអាយុជីវិតប្រជាជន ពិសេសនេះគឺជាបញ្ហាសុខភាពសាធារណៈដែលរាជរដ្ឋាភិបាលត្រូវតែគិតគូរ។
វិធានការរបស់រាជរដ្ឋាភិបាលបានទទួលការកោតសរសើរពីប្រមុខអង្គការសុខភាពពិភពលោកផងដែរ៕