ចិនបញ្ជូនក្រុមជំនាញវេជ្ជសាស្ត្រទៅជួយទប់ស្កាត់កូវីដ១៩នៅឡាវ ដែលកំពុងឆ្លងខ្លាំងវិញ
អត្ថបទដោយ៖
លន់ សារ៉ាត
ក្រុមជំនាញការវេជ្ជសាស្ត្រចិន នាំមកជាមួយនឹងសម្ភារៈបរិក្ខាទប់ស្កាត់ជំងឺកូវីដ១៩ ត្រូវបានបញ្ជូនទៅដល់ប្រទេសឡាវហើយ កាលពីថ្ងៃទី៤ ឧសភា ២០២១ ជាការទៅដល់ដើម្បីចូលរួមជួយឡាវ ប្រយុទ្ធនឹងជំងឺកូវីដ១៩ ដែលកំពុងរាតត្បាតនៅប្រទេសឡាវ។
ឡាវកំពុងផ្ទុះការឆ្លងជំងឺកូវីដ១៩ ក្នុងសហគមន៍ ចាប់តាំងពីចុងខែមេសាមក ក្នុងនោះ ការរកឃើញប្រចាំថ្ងៃមានរាប់សិបនាក់ ខ្លះមានដល់ជាង១០០នាក់។ ជាក់ស្តែង កាលពីម្សិលមិញ ឡាវបញ្ជាក់ពីចំនួនឆ្លងថ្មីចំនួន៦០នាក់។
ឡាវគឺជាប្រទេសស្ងប់ស្ងាត់កូវីដ១៩ យូរមកហើយ ទើបផ្ទុះជាថ្មីនេះ ហើយមកទល់ពេលនេះ មិនទាន់មានករណីស្លាប់ដោយសារកូវីដ១៩ នៅឡើយទេ។ ឡាវមានអ្នកកើតជំងឺកូវីដ១៩ កើនឡើងដល់១០២៦នាក់ហើយ៕
លន់ សារ៉ាត
ខ្ញុំបាទ លន់ សារ៉ាត ជាពិធីករអានព័ត៌មាន និងជាពិធីករសម្របសម្រួលកម្មវិធីផ្សេងៗ និងសរសេរព័ត៌មានអន្តរជាតិ