ក្រុមប្រទេស G-20 គាំទ្រកំណែទម្រង់ប្រព័ន្ធពន្ធលើសាជីវកម្មអន្តរជាតិ
ក្រុមប្រទេសសេដ្ឋកិច្ចលំដាប់កំពូលទាំង ២០ ឬ ហៅកាត់ថាក្រុមប្រទេស G-20 បានគាំទ្រកំណែទម្រង់ប្រព័ន្ធពន្ធសាជីវកម្មពិភពលោក ដែលដាក់ចេញដោយអង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍ (OECD) នៅក្នុងកិច្ចប្រជុំថ្នាក់រដ្ឋមន្ត្រីហិរញ្ញវត្ថុ និងទេសាភិបាលធនាគារកណ្ដាលនៃ G-20 ធ្វើឡើងរយៈពេល ២ថ្ងៃគឺនៅថ្ងៃទី៩ និងថ្ងៃទី១០ ខែកក្កដា នៅឯទីក្រុងពាណិជ្ជកម្មបុរាណ Venice ប្រទេសអ៊ីតាលី។
ប្រទេស G-20 ជាក្រុមប្រទេសមានសេដ្ឋកិច្ចជឿនលឿននៅក្នុងពិភពលោក ដោយ ២០ប្រទេសនេះបូកបញ្ចូលមានផលិតផលក្នុងស្រុកសរុប (GDP) ប្រមាណ ៨០% នៃ GDP ពិភពលោក និងមានពាណិជ្ជកម្មស្មើនឹង ៧៥% នៃពិភពលោក។
កិច្ចប្រជុំកាលពីថ្ងៃសុក្រ និងថ្ងៃសៅរ៍សប្ដាហ៍មុន គឺជាកិច្ចប្រជុំជួបមុខគ្នាដោយផ្ទាល់លើកដំបូងរវាងរដ្ឋមន្ត្រីសមាជិក G20 ចាប់តាំងពីការរីករាលដាលជំងឺកូវីដ១៩ ប៉ុន្តែមានរដ្ឋមន្ត្រីខ្លះដូចជា រដ្ឋមន្ត្រីហិរញ្ញវត្ថុចិនលោក Liu Kun បានចូលរួមតាមប្រព័ន្ធវីដេអូ។ ក្រោយពីប្រជុំបានបញ្ចប់ ក្រុមរដ្ឋមន្ត្រី និងទេសាភិបាលធនាគារបានចេញសេចក្ដីថ្លែងការណ៍រួមប្រវែង ៦ ទំព័រ ដែលនិយាយពីទិដ្ឋភាពសេដ្ឋកិច្ចពិភពលោក ក៏ដូចជាយុត្តិនាការវ៉ាក់សាំងប្រឆាំងជំងឺកូវីដ១៩ផងដែរ។
តាមរយៈសេចក្ដីថ្លែងការណ៍រួមនៃកិច្ចប្រជុំថ្នាក់រដ្ឋមន្ត្រីហិរញ្ញវត្ថុខាងលើនេះ ក្រុមប្រទេស G-20 បានប្រកាសពីការឯកភាពគ្នាលើចំណុចសំខាន់ៗនៃ កិច្ចព្រមព្រៀងថ្មីសម្រាប់កំណែទម្រង់ប្រព័ន្ធពន្ធអន្តរជាតិរបស់អង្គការ សម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច(OECD) ដែលយល់ព្រមដោយប្រទេសចំនួន ១៣១ កាលពីសប្ដាហ៍មុននេះ។
ក្របខ័ណ្ឌកំណែទម្រង់ប្រព័ន្ធពន្ធអន្តរជាតិនេះមាន ២សសរស្ដម្ភ ដែលជាលទ្ធផលនៃការចរចាគ្នាអស់រយៈពេលជាច្រើនឆ្នាំកន្លងមកនេះ ហើយក្របខ័ណ្ឌមានបំណងពង្រឹងស្ថិរភាពប្រព័ន្ធពន្ធអន្តរជាតិទៀតផង។
សសរស្ដម្ភទាំង ២នេះមានដូចជា (១) ធានាឱ្យបាននូវការបែងចែកសិទ្ធិក្នុងការយកពន្ធពីក្រុមហ៊ុនពហុជាតិធំៗ ដែលរួមមានក្រុមហ៊ុន Amazon និង Google ជាដើម ទៅតាមបណ្ដាប្រទេសដែលក្រុមហ៊ុនទាំងនេះបានទទួលប្រាក់ចំណេញ។ នេះបានសេចក្ដីថា ក្រុមហ៊ុនទាំងនេះត្រូវតែបង់ពន្ធឲ្យប្រទេសនានា ដែលសាខារបស់ខ្លួនដំណើរការ ដោយមិនត្រឹមតែបង់ពន្ធឱ្យប្រទេសដែលមានទីស្នាក់ការកណ្ដាលនោះទេ។ (២) កំណត់អត្រាពន្ធសាជីវកម្មអប្បបរមាឱ្យស្មើគ្នាជុំវិញពិភពលោក ដើម្បីកុំឱ្យក្រុមហ៊ុនទាំងនោះគេចចេញពីការបង់ពន្ធ ដោយរើទីស្នាក់ការកណ្ដាលសាជីវកម្មរបស់ខ្លួន ទៅប្រទេសដែលមានអត្រាពន្ធទាបបំផុត។ ពន្ធសាជីវកម្មជាពន្ធដែលយកលើប្រាក់ចំណេញរបស់ចំណូលក្រុមហ៊ុនធំៗ។
ទោះជាយ៉ាងណាក៏ដោយ ក្នុងសេចក្ដីថ្លែងការណ៍របស់ក្រុមរដ្ឋមន្ត្រីហិរញ្ញវត្ថុ G-20 មិនបញ្ជាក់ថា ពិភពលោកត្រូវកំណត់យកពន្ធប៉ុន្មាននោះទេ ដោយការចរចាពីព័ត៌មានលម្អិតផ្សេងៗទៀតគឺនៅបន្តនៅឡើយ។ យោងតាមរដ្ឋមន្ត្រីហិរញ្ញវត្ថុបារាំងលោក Bruno Le Maire បានឱ្យដឹងថា ក្រុមរដ្ឋមន្ត្រីនឹងធ្វើការចរចាជាលើកចុងក្រោយនៅខែតុលាខាងមុខនេះ។ ប្រសិនបើការចរចាបានសម្រេច គម្រោងកំណែទម្រង់អស់ទាំងនេះនឹងត្រូវចាប់ផ្ដើមអនុវត្តនៅឆ្នាំ២០២៣។
លោកស្រី Janet Yellen រដ្ឋមន្ត្រីក្រសួងរតនាគារសហរដ្ឋអាមេរិកបានបង្ហោះនៅក្នុង Twitter កាលពីថ្ងៃសៅរ៍ថា៖ «កិច្ចប្រជុំ G-20 បានបញ្ជាក់កាន់តែច្បាស់ថា ពិភពលោកកំពុងតែត្រៀមខ្លួនក្នុងការបញ្ចប់ការប្រកួតប្រជែងទៅរកពន្ធសាជីវកម្មដ៏ទាបបំផុតហើយ ព្រមទាំងមូលមតិគ្នាក្នុងការបញ្ចប់ការប្រណាំងប្រជែងបែបនេះតាមរយៈកម្រិតពន្ធសាជីវកម្មសកល ១៥%»។
រដ្ឋមន្ត្រីបារាំងលោក Le Maire បានឲ្យដឹងថា ចំណូលពន្ធសាជីវកម្មទាំងនេះអាចយកមកផ្គត់ផ្គង់ក្នុងការប្រយុទ្ធប្រឆាំងនឹងបម្រែបម្រួលអាកាសធាតុ។
មានសេចក្ដីរាយការណ៍ជាច្រើនបានឲ្យដឹងថា ផែនការក្នុងការបង្កើតឱ្យមានកម្រិតយកពន្ធសាជីវកម្មអប្បបរមាមិនទទួលបានការស្វាគមន៍ប៉ុន្មាននោះទេពីប្រទេសដែលយកពន្ធតិចបំផុត ដោយក្នុងនោះក៏មានប្រទេសទ្វីបអឺរ៉ុបមួយចំនួនផងដែរដូចជា សាធារណរដ្ឋអៀរឡង់ និងហុងគ្រីជាដើម។
កម្រិតពន្ធសាជីវកម្មអប្បបរមា ១៥% ជាគំនិតផ្ដួចផ្ដើមរបស់សហរដ្ឋអាមេរិកក្រោមរដ្ឋបាលរបស់លោកប្រធានាធិបតីចូ បៃដិន។
បើតាមការប៉ាន់ស្មានរបស់ OECD បានឲ្យដឹងថា ពិភពលោកអាចនឹងចំណេញប្រាក់ប្រមាណ ១០០ពាន់លានដុល្លារពីសសរស្ដម្ភទី១ និង១៥០ពាន់លានដុល្លារពីសសរស្ដម្ភទី២។
ក្រៅពីពិភាក្សាអំពីកំណែទម្រង់ពន្ធពិភពលោកនេះ រដ្ឋមន្ត្រី G-20 បានកត់សម្គាល់ថា ស្ថានភាពសេដ្ឋកិច្ចពិភពលោកមានការកើនឡើងល្អក្រោយពីវិបត្តិជំងឺឆ្លងសកលកូវីដ១៩ ប៉ុន្តែការងើបឡើងវិញផ្នែកសេដ្ឋកិច្ចរបស់ប្រទេសនីមួយៗមិនមានភាពស្មើគ្នានោះទេ ដែលកាន់តែលំបាកដោយសារការរីករាលដាលនៃវីរុសបម្លែងដែលតា និងភាពយឺតយ៉ាវនៃការចាក់វ៉ាក់សាំង៕
ប្រភព៖ Kyodo News, Ny Times, OECD, Aljazeera