តាលីបង់អះអាងថា ខ្លួនកាន់កាប់ព្រំដែនសំខាន់ជាប់ប៉ាគីស្ថាន
ហួន ឌីណា
ក្រុមឧទ្ទាមតាលីបង់បាននិយាយថា ខ្លួនបានកាន់កាប់ច្រកព្រំដែន Spin Boldak ជាប់ប៉ាគីស្ថាន និងបន្តពង្វាតទី ខណៈក្រសួងមហាផ្ទៃអាហ្វហ្គានីស្ថានអះអាងថា កងកម្លាំងរដ្ឋាភិបាលបានគ្រប់គ្រង និងបង្ក្រាបជាស្ថាពរលើការវាយប្រហាររបស់ក្រុមប្រដាប់អាវុធមួយនេះ។
លោក Arif Kakar មន្ត្រីរដ្ឋបាលមូលដ្ឋានប៉ាគីស្ថានបានបញ្ចាក់ពីការអះអាងនេះ ដោយនិយាយថា ប៉ាគីស្ថានបានបិទច្រកព្រំដែន Chaman-Spin Boldak ជាប់អាហ្វហ្គានីស្ថាន ដោយមិនអនុញ្ញាតិឱ្យទំនិញ ឬប្រជាជនឆ្លងកាត់តាមច្រកសំខាន់នេះឡើយ។ លោកបានប្រាប់សារព័ត៌មាន Al Jazeera ថា គេអាចឃើញពីវត្តមានរបស់ពួកតាលីបង់នៅខាងក្រៅព្រំដែនប្រទេស ដោយគ្មានកងកម្លាំងទ័ពរបស់រដ្ឋាភិបាលអាហ្វហ្គានីស្ថាននោះទេ។
អ្នកនាំពាក្យក្រសួងមហាផ្ទៃនៃរដ្ឋាភិបាលអាហ្វហ្គានីស្ថានលោក Tareq Arian បានបដិសេធការអះអាងនេះដោយនិយាយថា ពួកភេរវជនបានធ្វើសកម្មភាពនៅក្បែរព្រំដែន ប៉ុន្តែត្រូវបានកងកម្លាំងសន្តិសុខបង្រ្កាប។ យ៉ាងណាមិញ ប្រជាជនដែលរស់នៅក្នុងតំបន់ បានបដិសេធនឹងការឆ្លើយតបរបស់រដ្ឋាភិបាល។
លោក Raz Mohammad អ្នកលក់ឥវ៉ាន់ម្នាក់នៅក្បែរព្រំដែនបាននិយាយថា៖ «ខ្ញុំទៅកន្លែងលក់ឥវ៉ាន់កាលពីព្រឹកមិញ ទាំងឃើញពួកតាលីបង់គ្រប់កន្លែងទាំងអស់ ហើយខ្ញុំក៏ឮសម្លេងបាញ់គ្នាក្បែរនោះដែរ»។
ពួកតាលីបង់បានធ្វើការវាយលុកពាសពេញអាហ្វហ្គានីស្ថាន ចាប់តាំងពីដើមខែឧសភា នៅពេលដែលកងកម្លាំងបរទេសដឹកនាំដោយសហរដ្ឋអាមេរិក និងអង្គការណាតូបានចាប់ផ្តើមដកខ្លួនចេញពីប្រទេសអាស៊ីកណ្ដាលមួយនេះ។ តាំងពីពេលនោះមក ក្រុមនេះបានចាប់យកច្រកឆ្លងកាត់យ៉ាងតិចចំនួន ៣ ទៀតនៅតាមបណ្តោយព្រំដែនជាមួយតាហ្ស៊ីគីស្ថាន តួកម៉េនីស្ថាន និងអ៊ីរ៉ង់។
ច្រក Spin Boldak គឺជាច្រកចុងក្រោយបង្អស់តាមខ្សែបន្ទាត់ព្រំដែន ដែលពួកតាលីបង់បានរឹបអូសក្នុងរយៈពេលប៉ុន្មានសប្តាហ៍ថ្មីៗ ក្រោយការប្រយុទ្ធបង្ហូរឈាមនៅទូទាំងខេត្ត Kandahar ជាកន្លែងដែលរដ្ឋាភិបាលបង្ខំចិត្តពង្រាយកងកុម្ម៉ង់ដូដើម្បីការពារ។
កាលពីសប្តាហ៍មុន ពួកតាលីបង់បាននិយាយថា ខ្លួនបានគ្រប់គ្រងទឹកដីជាង ៨៥ ភាគរយនៃប្រទេសអាហ្វហ្គានីស្ថាន ដែលជាការអះអាងមិនអាចផ្ទៀងផ្ទាត់បាន។ តួរលេខនេះខ្ពស់ជាងសេចក្តីថ្លែងការណ៍របស់តាលីបង់កាលពីលើកមុន ដែលថាខ្លួនបានកាន់កាប់ ជាងមួយភាគបីនៃស្រុកចំនួន ៤២១ របស់ប្រទេស ក្រោយកងកម្លាំងអាហ្វហ្គានីស្ថានបោះបង់ចោល ដោយដកប្រតិបត្តិការរបស់ខ្លួនពីស្រុកទាំងនោះ។
លោក Fahim Sadat ប្រធានផ្នែកទំនាក់ទំនងអន្តរជាតិនៃសាកលវិទ្យាល័យ Kardan ក្នុងទីក្រុងកាប៊ុល បាននិយាយថា ពួកតាលីបង់កំពុងព្យាយាមគ្រប់គ្រងចំណុចដែលអាចរាំងស្ទះដល់សេដ្ឋកិច្ចដែលរួមមានច្រកព្រំដែននេះ ដើម្បីដាក់សម្ពាធដល់រដ្ឋាភិបាលក៏ដូចជាប្រជាជនដែលស្ថិតនៅក្នុងដែនរបស់រដ្ឋាភិបាល។
ទន្ទឹមនឹងនេះផងដែរ បេសកកម្មរបស់អង្គការសហប្រជាជាតិនៅអាហ្វហ្គានីស្ថានបញ្ជាក់ថា ខ្លួនមានការព្រួយបារម្ភកាន់តែខ្លាំងឡើងអំពីរបាយការណ៍នៃការរំលោភសិទ្ធិមនុស្សរួមមានការសម្លាប់ ការធ្វើទុក្ខបុកម្នេញនិងការរើសអើង ជាពិសេសទៅលើស្រ្តី និងក្មេងស្រី។ យ៉ាងណាមិញ អ្នកនាំពាក្យតាលីបង់បដិសេធការចោទប្រកាន់ដែលថាពួកគេរំលោភសិទ្ធិ ហើយនិយាយថាស្ត្រីនឹងមិនត្រូវបានគេធ្វើបាបឡើយប្រសិនបើតាលីបង់វិលត្រឡប់មកកាន់អំណាចវិញ។
ក្រុមតាលីបង់ក៏បានប្តេជ្ញាចរចាជាមួយគូប្រជែងអាហ្វហ្គានីស្ថានរបស់ខ្លួន ជាផ្នែកមួយនៃកិច្ចព្រមព្រៀងដែលសហរដ្ឋអាមេរិកយល់ព្រមដកទ័ពចេញ ប៉ុន្តែមកទល់ពេលនេះ ការវិវត្តទៅមុខមានតិចតួចប៉ុណ្ណោះ។
ប្រភព៖
- Taliban claims capturing key Afghan border crossing with Pakistan https://www.aljazeera.com/news/2021/7/14/taliban-claims-capturing-key-afghan-border-crossing-with-pakistan
- Taliban press advances, take key border post with Pakistan https://apnews.com/article/afghanistan-taliban-pakistan-6e7a6d46490a21119b5281a3a1b2c2b7
- Afghan Taliban seize border crossing with Pakistan in major advance https://www.reuters.com/world/asia-pacific/taliban-claims-control-key-afghan-border-crossing-with-pakistan-2021-07-14/