បរទេស៖ ទីភ្នាក់ងារសារព័ត៌មានបារាំង AFP បានរាយការណ៍ថា ប្រទេសមីយ៉ាន់ម៉ានឹងទទួលបានវ៉ាក់សាំងជំនួយប្រមាណ០៦លានដូសពីប្រទេសចិន នៅក្នុងខែសីហាខាងមុខនេះ ។

មន្ត្រីជាន់ខ្ពស់ម្នាក់មកពីក្រសួងព័ត៌មានមីយ៉ាន់ម៉ាបានប្រាប់អ្នកកាសែតថា រដ្ឋាភិបាលបានធ្វើការបញ្ជាទិញវ៉ាក់សាំងប្រមាណជា០៤លានដូសពីប្រទេសចិន ខណៈដែលវ៉ាក់សាំងចំនួន០២លានដូសទៀតគឺជាជំនួយ ។ បើតាមមន្រ្តីដដែលនេះ វ៉ាក់សាំងចំនួន០១លានដូសដំបូងនឹងអាចធ្វើដំណើរមកដល់ប្រទេសមីយ៉ាន់ម៉ានៅចុងខែកក្កដាខាងមុខនេះ ។

គួរកត់សម្គាល់ បច្ចុប្បន្នមីយ៉ាន់ម៉ាបាននិងកំពុងប្រឈមនូវការកើនឡើងករណីឆ្លង Covid-19 ជាថ្មីម្តងទៀត ដោយគិតមកទល់ពេលនេះ មីយ៉ាន់ម៉ាទើបតែអាចចាក់វ៉ាក់សាំងជូនដល់ប្រជាជនរបស់ខ្លួនប្រមាណជា១,៧៥លានដូសប៉ុណ្ណោះ ក្នុងចំណោមពលរដ្ឋសរុបរបស់ខ្លួនដល់ទៅ៥៤លាននាក់ ៕ ប្រភព៖ ស៊ីនហួរ