ក្រសួងពាណិជ្ជកម្ម៖ផ្សារអេឡិចត្រូនិកខេមបូឌាត្រេដ នឹងដាក់ឲ្យប្រើប្រាស់ផ្លូវការយ៉ាងយូរនៅដើមខែសីហា
រាជធានីភ្នំពេញ៖ ផ្សារអេឡិចត្រូនិក ខេមបូឌាត្រេដ (Cambodia Trade)ដែលជាផ្សារពាណិជ្ជកម្មតាមប្រព័ន្ធអេឡិចត្រូនិក គ្រោងនឹងដាក់ឲ្យប្រើប្រាស់ជាផ្លូវការហើយនៅចុងខែកក្កដា ឬដើមខែសីហាខាងមុខនេះ។នេះបើតាមការឱ្យដឹងពីសំណាក់មន្រ្តីក្រសួងពាណិជ្ជកម្ម។
គួរបញ្ជាក់ថាផ្សារអេឡិចត្រូនិក ខេមបូឌាត្រេដ នៅពេលបើកដំណើរការនឹងជួយសម្រួល ដល់ការលក់ទំនិញ និងផលិតផលរបស់កម្ពុជា ទៅកាន់អតិថិជនទាំងនៅក្នុងប្រទេស និងក្រៅប្រទេស។
ពាក់ព័ន្ធក្នុងរឿងនេះលោក សំហេង បូរ៉ា អនុរដ្ឋលេខាធិការក្រសួងពាណិជ្ជកម្ម បានឲ្យដឹងនៅក្នុងពិធីបិទសិក្ខាសាលាជាសាធារណៈ ស្តីពីនីតិវិធីនៃការចុះឈ្មោះលើផ្សារពាណិជ្ជកម្មតាមប្រព័ន្ធអេឡិចត្រូនិក ខេមបូឌាត្រេដ កាលពីថ្ងៃទី១៥ ខែកក្កដា ឆ្នាំ២០២១កន្លងទៅថា ផ្សារពាណិជ្ជកម្មនេះ បង្កើតឡើងដោយក្រសួងពាណិជ្ជកម្មដើម្បីជំរុញការលក់ផលិតផលក្នុងស្រុករបស់សហគ្រាសធុនតូច និងមធ្យមកម្ពុជា ចូលទៅក្នុងទីផ្សារជាតិ និងអន្តរជាតិ។
លោកអនុរដ្ឋលេខាធិការក្រសួងពាណិជ្ជកម្ម រំពឹងថា សហគ្រាសទាំងអស់នឹងចូលរួមជាមួយក្រសួង ក្នុងការពង្រីកសកម្មភាពធ្វើពាណិជ្ជកម្មតាមប្រព័ន្ធអេឡិចត្រូនិកក្នុងស្រុក និងបង្កើនការនាំចេញរបស់កម្ពុជាទៅកាន់ទីផ្សារអន្តរជាតិ ក្នុងគោលបំណងឲ្យមានកំណើនប្រាក់ចំណូលដល់ប្រជាជន និងកំណើនសេដ្ឋកិច្ចជាតិ។
ជុំវិញការបើកដំណើរការផ្សារបែបទំនើបថ្មីនេះ អ្នកស្រី យូ ប៉ោនី ម្ចាស់ក្រុមហ៊ុន ហ្វរខេ អាហ្គ្រីត្រេដ អេនសឺវីស ខូអិលធីឌី (ផ្គត់ផ្គង់ម្រេចកំពតសិរីរាង្គ) បញ្ជាក់ថា នៅពេលផ្សារនេះបើកដំណើរនឹងជួយសម្រួលដល់ទីផ្សារ លក់ផលិតផលតាមរយៈផ្សារអេឡិចត្រូនិកក កាន់តែច្រើនថែមទៀត ជាពិសេសទៅកាន់ទីផ្សារក្រៅប្រទេស ដែលទទួលស្គាល់ដោយពិភពលោក ។ពិសេសជាងនេះគឺខាងប៉ែកអឺរ៉ុប ដែលគេឲ្យតម្លៃរសជាតិម្រេចកំពត ដែលជាផលិតផលសម្គាល់ភូមិសាស្ត្រ រសជាតិប្លែកខុសគេតែម្តង។
គួររំលឹកថា កាលពីថ្ងៃទី១៥ ខែកក្កដាកន្លងទៅ ក្រសួងពាណិជ្ជកម្មបានរៀបចំសិក្ខាសាលាជាសាធារណៈស្តីអំពីការចុះឈ្មោះរបស់សហគ្រាសធុនតូចនិងមធ្យម នៅលើផ្សារពាណិជ្ជកម្មតាមប្រព័ន្ធអេឡិចត្រូនិក ដែលមានឈ្មោះថា ខេមបូឌាត្រេដ (CambodiaTrade) ដោយមានអ្នកចូលរួមសរុបចំនួន ៨៥នាក់ ដែលជាតំណាងសហគ្រាសធុនតូច និងមធ្យម និងភាគីពាក់ព័ន្ធ៕
