សម្តេចតេជោ៖ហាត់ប្រាណ គឺជាវិធីដ៏ល្អសម្រាប់មនុស្សគ្រប់រូប
ភ្នំពេញៈសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកទឹកចិត្តឱ្យប្រជាពលរដ្ឋហាត់ប្រាណ។ ហាត់ប្រាណគឺជាវិធីដ៏ល្អសម្រាប់មនុស្សគ្រប់រូប។
ជាមួយរូបថតជាច្រើនសន្លឹករបស់សម្តេចក្នុងសកម្មភាពកំពុងហាត់ប្រាណ សម្តេចតេជោ ហ៊ុន សែន បានសរសេរលើទំព័រហ្វេសប៊ុកផ្លូវការរបស់សម្តេចនៅល្ងាចថ្ងៃទី២០ ខែក្កដានេះថា ហាត់ប្រាណ គឺជាវិធីដ៏ល្អ សម្រាប់មនុស្សគ្រប់រូបដែលអាចហាត់បានរាប់ទាំងអ្នកមានវិជ្ជមានកូវីដ-១៩ដែលមិនធ្ងន់ធ្ងរ និងអ្នកកំពុងធ្វើចត្តាឡីស័ក។ របៀបហាត់ខុសៗគ្នាទៅតាមចំណូលចិត្ត តាមវ័យតាមលទ្ធភាពដែលអាចធ្វើបានដើម្បីរក្សា
សុខភាព ។
សម្តេចបន្តថា” តាំងពីកូវីដ-១៩រាតត្បាតខ្លាំង ខ្ញុំបានជ្រើសរើសយកការធាក់កង់ជាប្រចាំ មួយថ្ងៃ៦០នាទី-៩០នាទី និងច្រើនបំផុត១២០នាទីទៅតាមទម្ងន់មុនពេលហាត់។ ខ្ញុំរក្សាទម្ងន់៧៦, ៧៧, ៧៨ ដែលកាលពី៥ខែមុនឡើងដល់ ៨៧ស្ទើរតែរកខោស្លៀកលែងបាន។ ថ្ងៃនេះខ្ញុំស្លៀកខោខ្លីជិះកង់ហាត់ប្រាណប្លែកពីលើកមុនដែលស្លៀកខោវែង “។
ក្នុងសារនេះ សម្តេចតេជោ ឆ្លៀតនិយាយលេងសើចថា ”និយាយតិចៗកុំឱ្យប្រពន្ធខ្ញុំលឺ គាត់ប្រាប់ខ្ញុំថា (បើទៅហាត់ប្រាណត្រូវស្លៀកវែងកុំស្លៀកខោខ្លី) ។ ខ្ញុំមិនដឹងថាតើគាត់ខ្លាចខ្ញុំត្រូវក្តៅខ្មៅ? ឬគាត់ខ្លាចមនុស្សផ្សេងឃើញជើងខ្ញុំក្រៅពីគាត់? (សូមទោសនិយាយលេងទេកុំប្រកាន់)”៕
ដោយៈជម្ពូនុទ