តុលាការកំពូលសម្រេចរំលាយគណបក្សនយោបាយចំនួនបីដែលអសកម្មភាពអស់រយៈពេលជាច្រើនឆ្នាំ
ភ្នំពេញ៖ តុលាការកំពូលកម្ពុជាបានសម្រេចរំលាយគណបក្សនយោបាយចំនួនបីទៀតដែលអសកម្មក្នុងការធ្វើសកម្មភាព និងមិនបានធ្វើរបាយការណ៍អស់រយៈពេលជាច្រើនឆ្នាំ។ការសម្រេចរបស់តុលាការកំពូលកាលពីពេលថ្មីនេះ បន្ទាប់ពីមានបណ្តឹងពីក្រសួងមហាផ្ទៃ។
យោងតាមសាលដីការបស់តុលាការកំពូលដែលត្រូវបានផ្សព្វផ្សាយដោយបណ្តាញសារព័ត៌មានបង្ហាញថា គណបក្សទាំងបីនេះមាន៖ គណបក្សប្រជាធិបតេយ្យខ្មែរ របស់លោក ហោ ម៉េងហ៊ាង ដែលត្រូវកាត់ទោសរំលាយកាលពីថ្ងៃទី១២ ខែកក្កដា ឆ្នាំ២០២១, គណបក្សវង្គត ខេមរៈ មហានគរ របស់លោក ផាន់ ស៊ីណា ដែលត្រូវកាត់ទោសរំលាយកាលពីថ្ងៃទី១២ ខែកក្កដា ឆ្នាំ២០២១ និងគណបក្សសង្គមប្រជាធិបតេយ្យរបស់ លោក ថោង សុវណ្ណារ៉ា ដែលត្រូវកាត់ទោសរំលាយកាលពីថ្ងៃទី១២ ខែកក្កដា ឆ្នាំ២០២១។
យោងតាមប្រភពបណ្តាញព័ត៌មាន Fresh Newsនៅព្រឹកថ្ងៃទី២៤ខែកក្កដានេះនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ថា ក្រសួងមហាផ្ទៃបានដាក់ពាក្យប្តឹងទៅតុលាការកំពូល បន្ទាប់ពីគណបក្សទាំងបីខាងលើនេះ ស្ងាត់ដំណឹង និងអសកម្មអស់រយៈពេលច្រើនឆ្នាំ ហើយមិនអាចទាក់ទងបាន។
គិតចាប់តាំងពីឆ្នាំ២០១៧មក រហូតមកដល់ពេលនេះ គណបក្សនយោបាយបួនហើយ ត្រូវតុលាការកាត់ទោសរំលាយ ដោយការល្មើសច្បាប់ធ្ងន់ធ្ងរ និងអសកម្មភាព។ ទោះជាយ៉ាងក្តី រហូតមកដល់ពេលនេះនៅក្នុងប្រទេសកម្ពុជា មានគណបក្សប្រមាណជិត៥០ផ្សេងទៀត កំពុងធ្វើសកម្មភាព។ក្នុងនោះមានមួយចំនួន បានប្រកាសរួចហើយ ក្នុងការត្រៀមខ្លួនចូលរួមក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០២២ និងការបោះឆ្នោតជ្រើសតាំងតំណាងរាស្ត្រ នៅឆ្នាំ២០២៣ ខាងមុខ។
ឯកឧត្តម ខៀវ សុភ័គ បានបញ្ជាក់ទៀតថា ពេលនេះគណបក្សថ្មីជាច្រើនទៀតកំពុងរៀបចំបង្កើតឡើង និងបានដាក់ពាក្យទៅកាន់ក្រសួងមហាផ្ទៃជាបន្តបន្ទាប់ដែរ៕
