អនុរដ្ឋមន្ត្រីការបរទេសអាមេរិកនឹងទស្សនកិច្ចទៅចិន តែអ្នកវិភាគមិនសូវរំពឹងខ្ពស់ពីជំនួបនេះទេ
ហ៊ីម រដ្ឋា
លោកស្រី Wendy Sherman អនុរដ្ឋមន្ត្រីក្រសួងការបរទេសនៃសហរដ្ឋអាមេរិកនឹងធ្វើដំណើរទស្សនកិច្ចទៅកាន់ទីក្រុងធានជីន (Tianjin) ដែលស្ថិតនៅភាគខាងជើងប្រទេសចិន នៅថ្ងៃទី២៥-២៦ ខែកក្កដា ប៉ុន្តែអ្នកវិភាគ និងអ្នកតាមដាននានាមិនសូវរំពឹងខ្ពស់ពីជំនួបនេះប៉ុន្មានទេ។
សេចក្ដីប្រកាសព័ត៌មានរបស់ក្រសួងការបរទេសអាមេរិកបាននិយាយថា លោកស្រីអនុរដ្ឋមន្ត្រីនឹងចូលជួបជាមួយ «មន្ត្រីរបស់សាធារណរដ្ឋប្រជាមានិតចិន ដោយរាប់បញ្ចូលទាំងទីប្រឹក្សារដ្ឋ និងរដ្ឋមន្ត្រីការបរទេសចិន លោកវ៉ាង យី»។ ក្រសួងការបរទេសបានបញ្ជាក់ថា ជំនួបនេះជាផ្នែកមួយនៃកិច្ចខិតខំប្រឹងប្រែងរបស់ខ្លួន ក្នុងការការពារផលប្រយោជន៍ជាតិខ្លួន និងគុណតម្លៃរបស់អាមេរិកពីទំនាក់ទំនងជាមួយចិន។ ក្នុងជំនួបនេះដែរ លោកស្រី Sherman នឹងលើកយកបញ្ហា ដែលអាមេរិក «មានក្ដីព្រួយបារម្ភយ៉ាងធ្ងន់ធ្ងរពីសកម្មភាពរបស់ចិន ក៏ដូចជាផ្នែកណា ដែលចិន និងអាមេរិកមានផលប្រយោជន៍រួម»។
តាមពិតទៅ លោកស្រី Sherman មិនបានគ្រោងធ្វើដំណើរទស្សនកិច្ចទៅប្រទេសចិននៅខែកក្កដានេះទេ។ យោងតាមការចុះផ្សាយរបស់សារព័ត៌មាន Financial Times បានឱ្យដឹងថា ជំនួបមន្ត្រីជាន់ខ្ពស់ចិន-អាមេរិក កៀកនឹងមិនកើតមានទៅហើយ ក្រោយពីមានភាពមិនចុះសម្រុងគ្នាទៅលើពិធីការមួយចំនួន។ ដោយដំបូងឡើយ ភាគីចិនចាត់តាំងតែលោក Xie Feng អនុរដ្ឋមន្ត្រីការបរទេសចិន មានឋានៈលេខរៀងទី៥ នៅក្នុងក្រសួង ឱ្យចូលជួបជាមួយលោកស្រី Sherman ប៉ុន្តែភាគីអាមេរិកចង់ចូលជួបជាមួយ មន្ត្រីជាន់ខ្ពស់ទី២ នៅក្រសួងគឺ លោកអនុរដ្ឋមន្ត្រី Le Yucheng។
ក្រោយមក ដោយមានការសម្របសម្រួលគ្នា លោកស្រី Sherman នឹងចូលជួបជាមួយ លោក Wang Yi រដ្ឋមន្ត្រីការបរទេសចិន បន្ទាប់ពីជំនួបជាមួយនឹងលោក Xie។ នេះបើតាមការលើកឡើងរបស់លោក Zhao Lijian អ្នកនាំពាក្យក្រសួងការបរទេសចិន។
អ្នកនាំពាក្យក្រសួងការបរទេសអាមេរិក លោក Ned Price បានលើកឡើងក្នុងសន្និសីទកាសែតមួយកាលពីថ្ងៃទី២១ ខែកក្កដា ថាដំណើរទស្សនកិច្ចទៅកាន់ប្រទេសចិនរបស់លោកស្រី Sherman អាចប្រព្រឹត្តទៅបាន លុះត្រាតែមានជំនួបរបស់លោកស្រី ជាមួយនឹងលោក Wang Yi ដើម្បីឱ្យជំនួបរវាងភាគីទាំងពីរអាចយកជាការបាន។
ឆ្លៀតក្នុងពេលនោះដែរ លោក Price ក៏បានលើកឡើងថាលោកស្រី Sherman នឹងធ្វើដំណើរទៅកាន់ចិន ជាមួយនឹង «ជំហរមានប្រៀប» ដែលខុសពីជំនួបជាន់ខ្ពស់រវាងអាមេរិក និងចិន កាលពីខែមីនាកន្លងទៅ នៅទីក្រុង Anchorage រដ្ឋអាឡាស្កា សហរដ្ឋអាមេរិក ដោយនៅពេលនោះលោក Anthony Blinken រដ្ឋមន្ត្រីការបរទេសសហរដ្ឋអាមេរិក ត្រូវការការពិគ្រោះយោបល់ជាមួយសម្ព័ន្ធមិត្តទ្វីបអាស៊ីគឺ ជប៉ុន និងកូរ៉េខាងត្បូង។
កាលនោះជំនួបរវាងលោក Anthony Blinken រដ្ឋមន្ត្រីការបរទេសអាមេរិក និងលោក Jack Sullivan ទីប្រឹក្សាសន្តិសុខជាតិរបស់ប្រធានាធិបតីអាមេរិក ជាមួយនឹងលោក Yang Jiechi នាយកគណៈកម្មការការបរទេសគណបក្សកុម្មុយនិស្តចិន និងលោក Wang Yi គឺមានការប៉ះសម្ដីគ្នាទៅវិញទៅមកនៅមុខអ្នកកាសែត នៅមុនកិច្ចប្រជុំ។
ទោះជាមានរឿងមិនសមរម្យបែបនេះក្ដី ក៏អ្នកនាំពាក្យក្រសួងការបរទេសអាមេរិក បាននិយាយថា ចិន និងអាមេរិក នៅតែរក្សានូវប្រព័ន្ធទំនាក់ទំនងគ្នា ដោយក្រោយពីជំនួបនៅអាឡាស្កា មន្ត្រីជាន់ខ្ពស់នៃប្រទេសទាំងពីរ បានពិភាក្សាគ្នាតាមប្រព័ន្ធទូរស័ព្ទច្រើនដងមកហើយ។
ជាងនេះទៅទៀត លោក Ned Price បាននិយាយម្ដងហើយម្ដងទៀតថា ទំនាក់ទំនងរវាងអាមេរិក និងចិន ជាទំនាក់ទំនងប្រកបដោយការប្រកួតប្រជែងនឹងគ្នា ដូច្នេះលោកស្រី Sherman ទៅចិនលើកនេះ ដើម្បីបង្ហាញចិនឱ្យយល់ពីទំនួលខុសត្រូវរបស់ចិននៅក្នុងទំនាក់ទំនងប្រកបដោយប្រកួតប្រជែងរវាងប្រទេសទាំងពីរ។
ជាការឆ្លើយតប លោក Zhao Lijian បានលើកឡើងកាលពីថ្ងៃសុក្រថា «អាមេរិកមិនមានសិទ្ធិណាមួយក្នុងការបង្រៀនចិននោះទេ»។ លោកបានបន្ថែមថា ភសគីចិននឹងបន្តការពារអធិបតេយ្យ និងផលប្រយោជន៍នៃការអភិវឌ្ឍ និងផលប្រយោជន៍សន្តិសុខ អំឡុងពេលជំនួបជាមួយនឹងលោកស្រី Sherman។
ជាមួយនឹងស្ថានភាពនេះដែរ អ្នកវិភាគ និងអ្នកតាមដានទាំងខាងចិន និងខាងអាមេរិកហាក់បីដូចជាមិនសូវសង្ឃឹមខ្ពស់ពីភាពសាច់ការនៃជំនួបនេះប៉ុន្មាននោះទេ តែយល់ឃើញក្នុងផ្លូវវិជ្ជមានថា ភាគីទាំងពីរកំពុងតែបើកផ្លូវក្នុងការនិយាយរកគ្នាទៅវិញទៅមក។
លោកស្រីបណ្ឌិត Yu Jie អ្នកស្រាវជ្រាវជាន់ខ្ពស់នៃស្ថាប័នសិក្សាស្រាវជ្រាវ Chatham House ដែលមានមូលដ្ឋាននៅរាជធានីឡុងដុងបានប្រាប់សារព័ត៌មាន The Guardian ថា «ចំណុចពិភាក្សារវាងភាគីទាំងពីរ នឹងមានច្រើនណាស់ ប៉ុន្តែច្រើនតែភាពមិនសុខចិត្តពីគ្នាទៅវិញទៅមក លើរឿងដាក់ក្រុមហ៊ុនចិននៅក្នុងបញ្ជីខ្មៅ រហូតដល់រឿងវាយប្រហារគ្នាតាមប្រព័ន្ធអ៊ីនធឺណិត ក៏ដូចជារឿងដាក់ទណ្ឌកម្មមន្ត្រីគ្នាទៅវិញទៅមក ពាក់ព័ន្ធនឹងបញ្ហា Xinjiang ជាដើម»។
នាយកមជ្ឈមណ្ឌលសិក្សាអាមេរិក នៃសាកលវិទ្យាល័យ Renmin ដែលមានមូលដ្ឋាននៅរដ្ឋធានីប៉េកាំងបានលើកឡើងប្រាប់សារព័ត៌មាន Global Times ថាជំនួបរវាងលោកស្រី Sherman និងមន្ត្រីជាន់ខ្ពស់ប្រទេសចិន គ្រាន់តែជា «ជំនួបសួរសុខទុក្ខគ្នា» ប៉ុណ្ណោះ។ យ៉ាងណាមិញ លោក Shi យល់ឃើញថា «ជំនួបសួរសុខទុក្ខគ្នា» ប្រភេទនេះអាចបង្ការនូវជម្លោះមួយចំនួន គ្រាន់បើជាជាងការវាយប្រហារគ្នាពីចម្ងាយ។
លោកស្រី Wendy Cutler អនុប្រធាននៃវិទ្យាស្ថានគោលនយោបាយសង្គមអាស៊ី (ASPI) បានប្រាប់ South China Morning Post ថា លោកស្រីមិនរំពឹងខ្ពស់ប៉ុន្មានទេពីជំនួបរវាងចិន និងអាមេរិកលើកនេះ «ប៉ុន្តែនេះជាជំហានដ៏សំខាន់ ក្នុងការស្ដារនូវប្រព័ន្ធទំនាក់ទំនងគ្នា នៅថ្នាក់មន្ត្រីជាន់ខ្ពស់ និងបង្កើតជាមូលដ្ឋានមួយក្នុងរៀបចំឱ្យមានជំនួបទ្វេភាគីរវាងលោក Joe Biden និងលោក Xi Jinping នៅអំឡុងពេលកិច្ចប្រជុំកំពូល G-20 [ដែលធ្វើឡើងនៅខែតុលា]»៕
ប្រភព៖
Deputy Secretary Sherman’s Travel to the People’s Republic of China and Oman
https://www.state.gov/deputy-secretary-shermans-travel-to-the-peoples-republic-of-china-and-oman/
Department Press Briefing – July 21, 2021
https://www.state.gov/briefings/department-press-briefing-july-21-2021/#post-261072-China
Foreign Ministry Spokesperson Zhao Lijian’s Regular Press Conference on July 23, 2021
https://www.fmprc.gov.cn/mfa_eng/xwfw_665399/s2510_665401/2511_665403/t1894650.shtml
China snubs senior US official in worsening diplomatic stand-off
https://www.ft.com/content/2d034271-fcd7-4977-9d50-13bc048e6084
Sherman’s China trip more of ‘keeping in touch’ than ‘problem solving’
https://www.globaltimes.cn/page/202107/1229408.shtml
Why Tianjin? And what’s in store in China for US envoy Wendy Sherman?
US official to visit China as diplomatic stand-off resolved
https://www.ft.com/content/9d4154cc-b00a-4566-b3f3-78c56fd72635
