តើអ្វីទៅជាវ៉ារ៉្យង់ឡាំដា (Lambda)?
ចាប់តាំងពីមានការរាតត្បាតជំងឺកូវីដ-១៩មក វីរ៉ុស SARS-CoV-2 បានបំលែងខ្លួនជាច្រើនដង និងកាន់តែបង្កើនសមត្ថភាពខ្លួនកាន់តែខ្លាំងឡើង។
បច្ចុប្បន្ន អង្គការសុខភាពពិភពលោក (WHO) បានចាត់ថ្នាក់វ៉ារ៉្យង់បំលែងខ្លួនទាំងនេះជាវ៉ារ៉្យង់គួរឱ្យបារម្ភ ដែលមាន ៤ ថ្នាក់ពោលគឺ ថ្នាក់អាល់ហ្វា (Alpha) បេតា (Beta ) ហ្គាម៉ា (Gamma) និងដែលតា (Delta)។ បន្ថែមពីនេះ ក៏មានវ៉ារ៉្យង់ ៤ ផ្សេងទៀត រួមមាន អេតា (Eta) អាយតា (Iota) កាប៉ា (Kappa) ហើយនិងឡាំដា (Lambda) ដែលត្រូវបានគេកំណត់ថា ជាវ៉ារ្យ៉ង់នៃគួរយកចិត្តទុកដាក់។
ទោះជាយ៉ាងណាក្ដី ក្នុងប៉ុន្មានសប្តាហ៍ថ្មីៗនេះ គេសង្កេតឃើញមានការរីករាលដាលយ៉ាងឆាប់រហ័សនៃវ៉ារ៉្យង់ឡាំដា ដែលត្រូវបានរកឃើញដំបូងនៅក្នុងប្រទេសប៉េរូ និងបានទាក់ទាញចំណាប់អារម្មណ៍អ្នកជំនាញជាច្រើន។
បច្ចុប្បន្ននេះ វ៉ារ៉្យង់នេះកំពុងលេចធ្លោជាងគេនៅក្នុងប្រទេស Andean ដែលបង្កឱ្យមានអត្រាមរណភាព ខ្ពស់ជាងគេបំផុតនៅលើពិភពលោក ខណៈពេលវ៉ារ៉្យង់នេះ បានរីករាលដាលដល់ប្រទេសយ៉ាងហោច ២៨ ប្រទេសផ្សេងទៀត រួមមាន អាហ្សង់ទីន ប្រេស៊ីល កូឡុំប៊ី អេក្វាឌ័រ ចក្រភពអង់គ្លេស អេស្បាញ ហូល្លង់ អារូបា បែលហ្សិក បារាំង ព័រទុយហ្កាល់ និងសហរដ្ឋអាមេរិកជាដើម។ ហើយក្នុងរយៈពេល ៣ ខែចុងក្រោយនេះ វ៉ារ៉្យង់នេះ បានកើនឡើងដល់ ៨០ ភាគរយនៃករណីទាំងអស់នៅក្នុងប្រទេសប៉េរូ។ នេះបើយោងតាមវិទ្យាស្ថានសុខភាពជាតិរបស់ប្រទេស។
វេជ្ជបណ្ឌិត លោក Pablo Tsukayama ឯកទេសផ្នែកមីក្រូជីវសាស្ត្រម៉ូលេគុលនៅសាកលវិទ្យាល័យ Cayetano Heredia University បានប្រាប់សារព័ត៌មាន Al Jazeera ថា៖ «នៅពេល ដែលយើងរកវាឃើញដំបូង វានៅមិនទាន់មានការចាប់អារម្មណ៍ខ្លាំងនោះទេ។ ប៉ុន្តែ យើងនៅតែបន្តដំណើរការសិក្សាគំរូ ហើយបើគិតត្រឹមខែមីនា វ៉ារ៉្យង់នេះមានចំនួន ៥០ ភាគរយនៃសំណាកនៅលីម៉ាទៅហើយ។ ហើយត្រឹមខែ មេសា វាឈានដល់ ៨០ ភាគរយនៃសំណាកនៅក្នុងប្រទេសប៉េរូ ដែលការលោតឡើងនេះ គឺជាសូចនាករដំបូងវ៉ារ៉្យង់ ដែលមានសមត្ថភាពចម្លងលឿន»។
បើយោងតាមប្រភពដដែលនេះ វ៉ារ៉្យងឡាំដា មិនទាន់បង្កឱ្យមានការភ្ញាក់ផ្អើលនោះទេ ដោយសារតែខ្សែស្រឡាយវាច្រើនតែកើតមាននៅកន្លែង ដែលមានអត្រាឆ្លងខ្ពស់។
លោកបានបន្តថា៖ «ប្រហែលត្រឹមខែ ឧសភា ប្រទេសឈីលី និងប៉េរូ បានស្នើសុំឱ្យអង្គការ (WHO) ពិចារណាលើការដាក់វ៉ារ្យ៉ង់នេះទៅក្នុងបញ្ជីវ៉ារ្យ៉ងគួរចាប់អារម្មណ៍ផ្សេងៗគ្នា។ ហើយនៅពាក់កណ្តាលខែ មិថុនា ស្ថាប័ននេះបានយល់ព្រមដាក់វ៉ារ៉្យង់ចូលក្នុងបញ្ជីហើយដាក់ឈ្មោះវាថា «ឡាំដា» ។
ការស្រាវជ្រាវថ្មីៗស្ដីពីវ៉ារ៉្យង់នេះបានឱ្យដឹងថា វ៉ារ៉្យង់នេះបានបំលែងខ្លួននៅក្នុងប្រូតេអ៊ីន ដែលជាផ្នែកវីរុសមានទំនាក់ទំនងជាមួយកោសិកាមនុស្សច្រើនជាងគេ ដោយធ្វើការចងភ្ជាប់ខ្លួនវាជាមួយនឹងកោសិកានោះ ហើយចម្លងលើកោសិកាតែម្ដង។
បើយោងតាមការស្រាវជ្រាវ ដែលបានចេញផ្សាយនៅខែ កក្កដា ដោយក្រុមវេជ្ជបណ្ឌិតមកពីសាលាវេជ្ជសាស្ត្រ Grossman នៃសាកលវិទ្យាល័យញូវយ៉ក បានឱ្យដឹងថា ការបំលែងខ្លួននេះ ត្រូវបានគេសង្កេតឃើញនៅក្នុងប្រូតេអ៊ីន គឺដើម្បីបង្កើនសមត្ថភាព ឆ្លងរបស់វា ដែលអាចកាត់បន្ថយប្រសិទ្ធិភាពការពាររបស់ វ៉ាក់សាំងនាពេលបច្ចុប្បន្ននេះ។
យោងតាម វីរុសវិទូលោក Ricardo Soto-Rifo នៃវិទ្យាស្ថានវិទ្យាសាស្ត្រជីវសាស្រ្តនៃសាកលវិទ្យាល័យប្រទេសឈីលី បានឱ្យដឹងថា ការផ្លាស់ប្តូរហ្សែនមួយប្រភេទ ដែលមានឈ្មោះថា L452Q គឺស្រដៀងគ្នានឹងការផ្លាស់ប្តូរ ដែលគេឃើញនៅក្នុងដំណើរការបំលែងខ្លួននៃវ៉ារ៉្យង់ដែលតា ហើយគេជឿជាក់ថា បំលាស់ប្ដូរនេះនឹងរួមចំណែកដល់អត្រាឆ្លងខ្ពស់។ ប៉ុន្តែលោក Soto-Rifo បានបញ្ជាក់ថា ឥទ្ធិពលពិតប្រាកដនៃការផ្លាស់ប្តូរមុយតាស្យុងនៅតែមិនទាន់ច្បាស់នៅឡើយ។
លោក Soto-Rifo និងអ្នកវិទ្យាសាស្ត្រដទៃទៀត កំពុងធ្វើការសិក្សាបឋមមួយស្ដីអំពី ផលប៉ះពាល់នៃវ៉ាក់សាំងចិន CoronaVac លើវ៉ារ្យ៉ង់នេះ ប៉ុន្តែការសិក្សានេះនៅមិនទាន់ពិនិត្យមើលឡើងវិញ និងវាយតម្លៃនៅឡើយទេ។ ទោះយ៉ាងណា លទ្ធផលបានបង្ហាញថា វ៉ារ៉្យង់ឡាំដា អាចបន្សាបអង្គបដិប្រាណ ដែលបង្កើតដោយវ៉ាក់សាំងបាន។
ប៉ុន្តែសំណួរសួរថា តើយើងគួរព្រួយបារម្ភពីវ៉ារ៉្យង់នេះឬទេ? វេជ្ជបណ្ឌិត Roselyn Lemus-Martin ដែលមានសញ្ញាប័ត្របណ្ឌិតផ្នែកជីវវិទ្យា និងជីវវិទ្យាកោសិកា ពីសាកលវិទ្យាល័យ Oxford និងមានមូលដ្ឋាននៅសហរដ្ឋអាមេរិក បានឆ្លើយថា នៅមិនទាន់ទេ។
លោក Lemus-Martin បានប្រាប់សារព័ត៌មាន Al Jazeera ថា៖ « កាលពីដើមឡើយ យើងមានការព្រួយបារម្ភខ្លាំងណាស់…យើងគិតថា ដោយសារយើងគិតថាវ៉ារ៉្យង់នេះ អាចនឹងឆ្លងខ្លាំងជាងវ៉ារ៉្យង់ដែលតា។ ប៉ុន្តែ ឥឡូវនេះនៅសហរដ្ឋអាមេរិកជាឧទាហរណ៍ យើងបានឃើញថាវ៉ារ៉្យង់ដែលតា នៅតែឆ្លងខ្លាំងជាងគេដដែល ខណៈវ៉ារ៉្យង់ឡាំដានៅមិនទាន់ឆ្លងលឿនខ្លាំងទៅតំបន់ផ្សេងនៅឡើយទេ»។
ប្រភព៖ Aljazeera