Blinken ទៅឥណ្ឌាគ្រោងនិយាយរឿងយុទ្ធសាស្ត្រ និងរឿងសិទ្ធិមនុស្ស ខណៈឥណ្ឌាគ្រោងនឹងស្នើឱ្យបើកជើងហោះហើរ
រដ្ឋមន្ត្រីការបរទេសសហរដ្ឋអាមេរិកលោក Anthony Blinken ធ្វើដំណើរទស្សនកិច្ចទៅកាន់រដ្ឋធានីញូដេលី ប្រទេសឥណ្ឌានៅក្នុងថ្ងៃពុធទី ២៨ កក្កដា នេះបើតាមសេចក្ដីប្រកាសព័ត៌មានរបស់ក្រសួងការបរទេសអាមេរិក។
ប្រភពខាងលើបានឱ្យដឹងថាអំឡុងពេលទស្សនកិច្ចនៅឥណ្ឌា លោក Blinken នឹងចូលជួបជាមួយរដ្ឋមន្ត្រីការបរទេសឥណ្ឌាលោក S. Jaishankar ក៏ដូចជាជួបជាមួយនាយករដ្ឋមន្ត្រីឥណ្ឌាលោក Narendra Modi។
អាមេរិកបានរៀបរាប់ថា របៀបវារៈដែលនឹងលើកមកពិភាក្សា នៅពេលដែលលោក Blinken ទៅជួបជាមួយថ្នាក់ដឹកនាំឥណ្ឌាមានដូចជា កិច្ចការឆ្លើយតបនឹងវិបត្តិជំងឺរាតត្បាតសកលកូវីដ១៩ ទំនាក់ទំនងនៅតំបន់ឥណ្ឌូ-ប៉ាស៊ីហ្វិក ផលប្រយោជន៍រួមផ្នែកសន្តិសុខតំបន់ តម្លៃប្រជាធិបតេយ្យ និងចុងក្រោយគឺពិភាក្សាពាក់ព័ន្ធនឹងវិបត្តិអាកាសធាតុ។
ឥណ្ឌា និងសហរដ្ឋអាមេរិកនៅក្នុងបរិបទរដ្ឋបាលលោកប្រធានាធិបតីចូ បៃដិនមានការទាក់ទងគ្នា ហាក់បីជារាងញឹកញាប់។ ក្នុងរយៈពេលតែជាងកន្លះឆ្នាំប៉ុណ្ណោះ ថ្នាក់ដឹកនាំនៃប្រទេសទាំងពីរនេះជួបគ្នាច្រើនដងមកហើយតាំងពីជំនួបមេដឹកនាំ និងជំនួបរដ្ឋមន្ត្រីការបរទេស ហើយឈានទៅដល់រដ្ឋមន្ត្រីការពារជាតិទៀតផង ទាំងក្នុងបែបផែនទ្វេភាគី និងពហុភាគី។
ជំនួបដែលកក្រើកដល់ភូមិសាស្ត្រនយោបាយតំបន់ឥណ្ឌូ-ប៉ាស៊ីហ្វិកគឺ ជំនួបក្រោមក្របខ័ណ្ឌកិច្ចសន្ទនាសន្តិសុខចតុភាគី ដែលហៅកាត់ថា Quad កាលពីខែមីនាកន្លងទៅ ដោយពេលនោះលោកប្រធានាធិបតីអាមេរិកបៃដិន បានជួបជាមួយនាយករដ្ឋមន្ត្រី Modi និងនាយករដ្ឋមន្ត្រីនៃប្រទេសចំនួន ២ទៀតគឺ ជប៉ុន និងអូស្ត្រាលី។
ជំនួបនោះបានបញ្ចេញនូវសេចក្ដីថ្លែងការណ៍រួមមួយជាលើកដំបូង ដោយពិភាក្សាពីការគំរាមកំហែងនានាដល់សន្តិសុខក្នុងតំបន់។ នៅក្នុងអំឡុងទស្សនកិច្ចទៅកាន់ឥណ្ឌា គេមានរំពឹងថា លោក Blinken និងដៃគូសន្ទនានៅឥណ្ឌាអាចនឹងរៀបចំជាមូលដ្ឋានមួយសម្រាប់រៀបចំកិច្ចប្រជុំ Quad ថ្នាក់រដ្ឋមន្ត្រី ឬ ថ្នាក់មេដឹកនាំនៅពេលខាងមុខ។ ប៉ុន្តែរឿងនេះមិនទាន់បញ្ជាក់ច្បាស់នៅឡើយទេពីខាងអាមេរិក និងឥណ្ឌា។
បន្ថែមពីលើបញ្ហាសន្តិសុខ ថ្នាក់ដឹកនាំទាំង ៤ប្រទេសនៅពេលនោះព្រមព្រៀងគ្នាក្នុងការប្ដេជ្ញាចិត្តផលិតវ៉ាក់សាំងប្រើប្រាស់បច្ចេកវិទ្យាអាមេរិក ផលិតនៅឥណ្ឌាឱ្យបាន ១ពាន់លានដូសឱ្យបានត្រឹមឆ្នាំ២០២២ខាងមុខនេះ ដើម្បីចែកចាយដល់ប្រទេសនៅតំបន់ឥណ្ឌូ-ប៉ាស៊ីហ្វិក ហើយរួមបញ្ចូលទាំងតំបន់អាស៊ានផងដែរ។
នៅពេលដែលលោក Blinken ទៅជួបមេដឹកនាំឥណ្ឌា កិច្ចការពាក់ព័ន្ធនឹងផលិតវ៉ាក់សាំង ដែលស្ថិតក្រោមយន្តការគំនិតផ្ដួចផ្ដើមក្នុងការផលិតវ៉ាក់សាំង Quad ក៏ស្ថិតនៅក្នុងរបៀបវារៈក្នុងជំនួបផងដែរ។ នេះបើតាមការលើកឡើងរបស់លោក Dean Thompson រដ្ឋលេខាធិការការបរទេសស្ដីទីទទួលបន្ទុកកិច្ចការអាស៊ីខាងត្បូង និងអាស៊ីកណ្ដាល ដែលនិយាយប្រាប់អ្នកកាសែតកាលពីសប្ដាហ៍មុន។
ទាក់ទិននឹងរឿងផលិតវ៉ាក់សាំងនេះ ប្រភពមកពីរដ្ឋាភិបាលឥណ្ឌា ដែលចុះផ្សាយដោយអង្គភាពសារព័ត៌មានឥណ្ឌា PTI បានឱ្យដឹងថា ឥណ្ឌានឹងព្យាយាមជំរុញឱ្យអាមេរិកបើកការផ្គត់ផ្គង់វត្ថុធាតុដើមក្នុងការផលិតវ៉ាក់សាំងឱ្យបានទៀងទាត់ ខណៈផែនការផលិតវ៉ាក់សាំងរបស់ Quad នៅក្នុងប្រទេសឥណ្ឌានឹងចាប់ផ្ដើមនៅដើមឆ្នាំ២០២២ខាងមុខ។
បើតាមប្រភពពីឥណ្ឌាបានឱ្យដឹងថា ភាគីឥណ្ឌាក៏មានគម្រោងទាមទារឱ្យអាមេរិក បើកដំណើរការជើងហោះហើរជាមួយឥណ្ឌាឡើងវិញ ហើយជាពិសេសបញ្ចប់នូវការរឹតត្បិតទៅលើសិស្ស-និស្សិត អ្នកជំនាញ អ្នកធុរកិច្ច ការជួបជុំគ្រួសារ និងករណីមនុស្សធម៌ជាដើម។
ឥណ្ឌាកាលពីខែឧសភាកន្លងទៅ បានរកឃើញករណីវិជ្ជមានជំងឺកូវីដ-១៩ប្រចាំថ្ងៃរហូតដល់ទៅ ៤០ម៉ឺនករណី ហើយចាប់ពីពេលនោះមកប្រទេសជាច្រើនជុំវិញពិភពលោកបានផ្អាកជើងហោះហើរទៅកាន់ប្រទេសនេះ ហើយខ្លះឈានទៅដល់ផ្អាកលើចរាចរណ៍ទំនិញមួយចំនួនជាមួយឥណ្ឌាទៀតផង។ នៅខែកក្កដានេះ ស្ថានភាពកូវីដ១៩នៅឥណ្ឌាហាក់បីដូចជាធូរស្បើយបន្តិច ដោយរយៈពេល ៧ថ្ងៃចុងក្រោយជាមធ្យមមានករណីវិជ្ជមានប្រចាំថ្ងៃចំនួនក្បែរ ៤ម៉ឺននាក់ប៉ុណ្ណោះ។
ចំណែកឯបញ្ហាសន្តិសុខតំបន់វិញ លោករដ្ឋមន្ត្រី Blinken គ្រោងនឹងយករឿងអាហ្វហ្គានីស្ថានមកនិយាយជាមួយឥណ្ឌាផងដែរ។ ស្របពេលដែលអាមេរិកគ្រោងនឹងដកទ័ពចេញពីទឹកដីអាហ្វហ្គានីស្ថាន លោក Thompson បានលើកឡើងថា «ឥណ្ឌាជាដៃគូដ៏សំខាន់នៅក្នុងតំបន់ ហើយអាមេរិកស្វាគមន៍ចំពោះការប្ដេជ្ញារួមរបស់ឥណ្ឌាក្នុងការគាំទ្រដល់សន្តិភាព និងការអភិវឌ្ឍសេដ្ឋកិច្ច នៅអាហ្វហ្គានីស្ថាន»។
ទាក់ទិននឹងរឿងអាហ្វហ្គានីស្ថាន ប្រភពពីឥណ្ឌាវិញហាក់ដូចជារាងលម្អិតជាងនេះបន្តិច ដោយឥណ្ឌាគ្រោងនឹងសំណូមពរឱ្យអាមេរិកដាក់សម្ពាធទៅកាន់ប្រទេសប៉ាគីស្ថាន ដោយឥណ្ឌាយល់ឃើញថា ប៉ាគីស្ថានជាប្រភពមួយក្នុងការផ្គត់ផ្គង់ហិរញ្ញវត្ថុ និងជាកន្លែងជ្រកកោនមួយសម្រាប់ក្រុមភេរវកម្ម។
ក្រៅពីនេះ បញ្ហាសិទ្ធិមនុស្ស និងប្រជាធិបតេយ្យក៏នៅតែមានក្នុងរបៀបវារៈនៃកិច្ចជំនួបរវាងអាមេរិក និងឥណ្ឌាផងដែរ។ នេះបើតាមការឱ្យដឹងពីលោក Thompson។ មន្ត្រីស្ដីទីរូបនេះបាននិយាយថា អាមេរិកនឹងបន្តដាក់សម្ពាធក្នុងកម្រិតណាមួយទៅលើរដ្ឋាភិបាលឥណ្ឌា ពាក់ព័ន្ធលើការរឹតត្បិតសិទ្ធិសេរីភាពត្រង់ប្រការណាមួយ។
ជាការឆ្លើយតប ខាងឥណ្ឌាយល់ថា បញ្ហាសិទ្ធិមនុស្ស និងប្រជាធិបតេយ្យជាតម្លៃសកល មិនមែនផ្អែកលើការបកស្រាយរបស់ប្រទេសណាមួយ ឬ វប្បធម៌ណាមួយនោះទេ។ ប្រភពពីខាងឥណ្ឌាក៏បានបន្ថែមថា «ឥណ្ឌានៅពេលនេះកំពុងតែជោគជ័យលើផ្នែកសិទ្ធិមនុស្ស និងប្រជាធិបតេយ្យ»។
ចុងក្រោយពាក់ព័ន្ធនឹងវិបត្តិអាកាសធាតុ ភាគីទាំងពីរនឹងធ្វើការផ្អែកលើរបៀបវារៈភាពជាដៃគូអាកាសធាតុ និងថាមពលស្អាតអាមេរិក-ឥណ្ឌាឆ្នាំ២០៣០ ដែលនឹងពិភាក្សាលើការផ្ដល់ហិរញ្ញវត្ថុលើការប្រយុទ្ធប្រឆាំងនឹងបម្រែបម្រួលអាកាសធាតុ៕
ប្រភព៖ India Express