ស្វាយរៀង៖សាលារៀនបឋមសិក្សាសាមគ្គីរង្សី ក្នុង ស្រុក ស្វាយទាប ដែល នៅ មិនឆ្ងាយពី ទី រួមខេត្តស្វាយរៀង បច្ចុប្បន្ន កំពុង ជួបប្រទះ នូវការលំបាកខ្វះអាគារ សិក្សាជាខ្លាំង។

ជាក់ស្តែងតាមសម្តីលោក អ៊ុ ឈន នាយកសាលាបឋមសិក្សាសាមគ្គីរង្សី ដែលមានទីតាំងជាមួយនឹងវត្តសាមគ្គីរង្សី នៅក្នុងភូមិព្រៃសម្ភ័រ ឃុំសំបួរ ស្រុកស្វាយទាប ខេត្តស្វាយរៀង បានឲ្យដឹងថា សព្វថ្ងៃសាលាមាន អាគារសិក្សាចំនួន ៣ ខ្នងរួចហើយ  ២ខ្នងស្មើនឹង ៨បន្ទប់ និង១ខ្នងទៀតមាន៣បន្ទប់ ដែលមានសិស្សជាង៤០០នាក់កំពុង រៀនរាល់ថ្ងៃ  ក្នុងនោះ ១បន្ទប់ធ្វើជាទីចាត់ការ  និងបណ្ណាល័យ។

លោកនាយកបន្តថា ដោយសារតែមានកំណើនអ្នកចំណូលស្រុកច្រើន ដែលភាគច្រើនជាគ្រួសារកម្មកររោងចក្រដែលមានកូនតូចគ្រប់អាយុចូលរៀន ជាហេតុធ្វើអោយសិស្សមានចំនួនច្រើនពេក បានបណ្តាលឲ្យខ្វះ អគារសិក្សាក៏ដូចជាបន្ទប់ រៀនជាខ្លាំង ទើបសាលាបានរៀបចំឲ្យសិស្សថ្នាក់ខ្លះរៀននៅក្រោមកុដ្ឋលោកសង្ឃជាដើម។

ទោះជាយ៉ាងណាក្តី លោកនាយក នាយករង លោកគ្រូអ្នកគ្រូ ក៏ដូចជាអាណាព្យាបាលសិស្ស នៅសាលាបឋមសិក្សាសាមគ្គីរង្សី សូមគោរពអំពាវនាវសប្បុរជន និងថ្នាក់ដឹកនាំសូមមេត្តាជួយឧបត្ថម្ភបន្ថែមទៀត ដើម្បីសាលាមានលទ្ធភាព សាងសង់អាគារសិក្សា ឱ្យបានមួយខ្នង ថែមទៀត ដើម្បីឲ្យសិស្ស បានរៀសូត្រឱ្យបានត្រឹមត្រូវផង។

ពាក់ព័ន្ធទៅនិងបន្ទប់សិក្សានេះលោក វ៉ា វុទ្ធី អនុប្រធានការិយាល័យអប់រំ យុវជន និងកីឡាស្រុកស្វាយទាបបានឲ្យដឹងនៅព្រឹកថ្ងៃទី១៩ខែកុម្ភៈឆ្នាំ២០២០នេះថានៅសាលាបឋមសិក្សាសាមគ្គីរង្សី នេះពិតជាខ្វះបន្ទប់សិក្សាឥឡូវកំពុងតែគៀងគរសប្បុរសជនដើម្បីជួយកសាងបន្ទប់រៀនផងដែរ។

សូមបញ្ជាក់ថាសាលារៀន គឺជា កន្លែង ថ្នាលបណ្តុះធនធានមនុស្សនិងផ្ដល់ នូវ ចំណេះដឹង  ហើយបច្ចុប្បន្ន សាលារៀន នៅក្នុង ប្រទេស កម្ពុជា គេឃើញ មានស្ទើរគ្រប់ ទីកន្លែង មិនថាទីប្រជុំជន និងជនបទ ឬតំបន់ដាច់ស្រយាល ៕