ភ្លើងឆេះព្រៃនៅទ្វីបអឺរ៉ុបភាគខាងត្បូងបង្ករអោយមានការជម្លៀសប្រជាជនចេញពីតំបន់គ្រោះថ្នាក់
ភ្លើងឆេះព្រៃបានឆាបឆេះតំបន់ជាច្រើននៅទូទាំងទ្វីបអឺរ៉ុបភាគខាងត្បូងដែលបង្កឡើងដោយអាកាសធាតុក្តៅ និងខ្យល់បក់ខ្លាំងខណៈដែលប្រទេសមួយចំនួននៅភាគខាងជើងទ្វីបអ៊ឺរ៉ុបកំពុងបោសសំអាតតំបន់ដែលមានមនុស្សរស់នៅបន្ទាប់ពីមានភ្លៀងធ្លាក់ និងទឹកជំនន់កាលពីសប្តាហ៍កន្លងទៅនេះ។
នាយករដ្ឋមន្រ្តីប្រទេសក្រិក លោក Kyriakos Mitsotakis បាននិយាយថាកាលពីខែកក្កដាថា អ្នកពន្លត់អគ្គីភ័យបានប្រយុទ្ធប្រឆាំងនឹងភ្លើងឆេះព្រៃប្រហែល ៥០ ដងក្នុងរយៈពេល ២៤ ម៉ោងចុងក្រោយនេះ ហើយមានការព្យាករណ៍បន្ថែមថា អាចនឹងមានរលកកំដៅបន្ថែមទៀត។
តាមការស្រង់សម្តីរបស់សារព័ត៌មាន Reuters លោក Mitsotakis បាននិយាយថា៖ «ខ្ញុំចង់បញ្ជាក់ថាខែសីហានៅតែជាខែលំបាក ។ យើងទាំងអស់គ្នាត្រូវមានការប្រុងប្រយត្ន័ខ្ពស់រហូតដល់ការពន្លត់អគ្គីភ័យត្រូវបានបញ្ចប់ជាផ្លូវការ»។
ស្ថានភាពនៅអឺរ៉ុបភាគខាងត្បូងគឺផ្ទុយស្រឡះពីព្យុះភ្លៀងដែលបានបក់បោកនៅបណ្តាប្រទេសនៅភាគខាងជើងអ៊ឺរ៉ុបពីប្រទេសអូទ្រីសរហូតដល់អង់គ្លេស បន្ទាប់ពីមានគ្រោះទឹកជំនន់នៅប្រទេសអាល្លឺម៉ង់ និងប្រទេសជិតខាងកាលពីសប្តាហ៍មុន។
នៅលើកោះ Sardinia ប្រទេសអ៊ីតាលីយន្តហោះសម្រាប់ពន្លត់អគ្គីភ័យមកពីប្រទេសបារាំង និងក្រិកបានប្រើយន្តហោះសម្រាប់ពន្លត់អគ្គិភ័យក្នុងស្រុករបស់ខ្លួនមកជួយពន្លត់ភ្លើងឆេះព្រៃនៅលើកោះនោះដែលមានព្រៃឈើជាង ៤ ពាន់ហិកតាត្រូវបានដុតបំផ្លាញ ហើយមនុស្សជាង ៣៥០ នាក់ត្រូវបានជម្លៀសចេញពីតំបន់នោះ។
អាជ្ញាធរនៅទ្វីបអឺរ៉ុបខាងត្បូងបានព្រមានពីរលកកម្តៅដែលអាចបណ្តាលឱ្យមានភ្លើងឆេះព្រៃដែលបំផ្លិចបំផ្លាញផ្នែកខ្លះនៃតំបន់នេះ ទោះបីជាក្រុមអ្នកពន្លត់អគ្គីភ័យបានគ្រប់គ្រងអគ្គិភ័យនៅតំបន់មួយចំនួនរួមទាំងនៅប្រទេសអេស្ប៉ាញ ក្រិក និងអ៊ីតាលី។
ចំពោះប្រទេសទួរគីកំពុងទទួលរងនូវអគ្គីភ័យដ៏អាក្រក់បំផុតរបស់ខ្លួនដោយមានផ្ទៃដីជិត ៩៥ ពាន់ហិកតាត្រូវបានដុតបំផ្លាញ។ ទូរទស្សន៍ CNN បានរាយការណ៍តំបន់ទេសចរណ៍ Bodrum ត្រូវបានគេជម្លៀសប្រជាជនចេញខណៈដែលមានខ្យល់បក់ខ្លាំងបណ្តាលឱ្យមានអណ្តាតភ្លើងឆាបឆេះចេញពីស្រុក Milas ក្បែរនោះ។
តាមតួលេខរបស់សហភាពអឺរ៉ុបប្រទេសទួរគីបានរងគ្រោះដោយភ្លើងឆេះព្រៃចំនួន ១៣៣ កន្លែងនៅឆ្នាំ ២០២១នេះ។
