កីឡាកររត់ប្រណាំងបេឡារូសទទួលទិដ្ឋាការមនុស្សធម៌ប៉ូឡូញ បន្ទាប់ពីបដិសេធមាតុភូមិនិវត្តន៍ដោយ «បង្ខំ»
កីឡាកររត់ប្រណាំងតំណាងបេឡារូសមួយរូប បានទទួលទិដ្ឋាការមនុស្សធម៌ពីប្រទេសប៉ូឡូញ បន្ទាប់ពីរូបនាងបានក្លាយជាប្រធានបទមួយពាក់ព័ន្ធនឹងរឿងអាស្រូវនយោបាយមួយនៅកីឡាអូឡាំពិកក្រុងតូក្យូ។
លោកស្រី Kristina Timanovskaya ជាកីឡាកររត់ប្រណាំងអាយុ ២៤ ឆ្នាំមានជំនាញក្នុងការប្រណាំង ២០០ ម៉ែត្រ ត្រូវបានគណៈប្រតិភូបេឡារូសនៅកីឡាអូឡាំពិកក្រុងតូក្យូបញ្ជាឱ្យត្រឡប់ប្រទេសវិញមុនពេលកំណត់ បន្ទាប់ពីនាងបានធ្វើការរិះគន់ដោយបង្ហោះវីដេអូ នៅលើបណ្ដាញសង្គម Instagram ថាគ្រូបង្វឹកបានចុះឈ្មោះនាងសម្រាប់ព្រឹត្តិការណ៍រត់បណ្ដាក់ចម្ងាយ ៤០០ ម៉ែត្រ ដែលនាងមិនដែលបានហ្វឹកហាត់នោះទេ។
កាលពីថ្ងៃអាទិត្យលោកស្រី Timanovskaya បាននិយាយថាក្រុមកីឡាករបេឡារូសបានដឹកនាងដោយបង្ខំទៅអាកាសយានដ្ឋានក្រុងតូក្យូ ប៉ុន្តែពេលទៅដល់នាងបានបដិសេធឡើងជើងហោះហើរត្រឡប់ទៅបេឡារូសវិញ ហើយបានសុំជំនួយពីប៉ូលិសជប៉ុននៅទីនោះ។ នាងក៏បានសូមការអន្តរាគមន៍ពីគណៈកម្មការអូឡាំពិកអន្តរជាតិ។
ក្នុងការសម្ភាសន៍ជាមួយសារព័ត៌មាន AP នាងបាននិយាយថាគណៈប្រតិភូបេឡារូសបានបញ្ជាក់យ៉ាងច្បាស់ថានាងនឹងរងការដាក់ទណ្ឌកម្មពេលដែលនាងត្រឡប់ដល់ប្រទេសវិញ។ នាងក៏បានលើកឡើងថាពួកគេបានបញ្ជាក់ប្រាប់នាងថាការសម្រេចនេះគឺមិនធ្វើដោយពួកគេទេ គឺធ្វើដោយមន្ត្រីថ្នាក់លើនៅប្រទេសបេឡារូស។
ក្រោយពីបានចំណាយពេលមួយយប់ក្រោមការការពាររបស់អាជ្ញាធរជប៉ុន នាងបានធ្វើដំណើរទៅស្ថានទូតប្រទេសប៉ូឡូញប្រចាំក្រុងតូក្យូកាលពីថ្ងៃចន្ទ ដើម្បីទទួលទិដ្ឋាការមនុស្សធម៌។ កាលពីថ្ងៃពុធ Timanovskaya បានឡើងជើងហោះហើរចេញពីក្រុងតូក្យូ ទៅកាន់ក្រុងវីយ៉ែនណា ប៉ុន្តែគេមិនដឹងថានាងនឹងមានចំណតចុងក្រោយនៅទីណាទេ។
លោកស្រី Timanovskaya បាននិយាយថានាងមិនបានស្មានដឹងថាអាចមានការកើនឡើងយ៉ាងឆាប់រហ័សបែបនេះ ពីជម្លោះកីឡាបែបនេះឈានដល់ឧបទ្ទវហេតុការទូតដ៏ធំមួយ ដែលបានជំរុញនាងឆ្ពោះទៅរកជីវិតនៅប្រទេសថ្មី។
លោកស្រី Timanovskaya បានក្លាយជាអ្នកប្រឆាំងរដ្ឋាភិបាលមួយរូប ដែលគេមិនបានរំពឹងទុកថានឹងមាន។ នាងបាននិយាយថា៖ «ខ្ញុំនឹងមិននិយាយថានយោបាយចូលមកក្នុងជីវិតខ្ញុំទេ ព្រោះជាទូទៅគ្មាននយោបាយទេ»។
នាងបានបន្តទៀតថា៖«ខ្ញុំគ្រាន់តែសម្តែងការមិនពេញចិត្តចំពោះគ្រូបង្វឹក ដែលសម្រេចចិត្តដាក់ខ្ញុំក្នុងការប្រកួតបណ្ដាក់ ដោយមិនប្រាប់ខ្ញុំអំពីរឿងនេះដោយមិនសួរខ្ញុំថាតើខ្ញុំត្រៀមខ្លួនរត់ហើយឬនៅ។»
នៅពេលការបាតុកម្មផ្ទុះឡើងកាលពីឆ្នាំមុន បន្ទាប់ប្រធានាធិបតី Alexander Lukshenko ប្រកាសជ័យជម្នះក្នុងការបោះឆ្នោតមានជម្លោះ លោកស្រី Timanovskaya មិនបានចូលរួមបាតុកម្មនេះជាមួយពលរដ្ឋបេឡារូសរាប់សែននាក់ទេ។ ផ្ទុយទៅវិញនាងបានបន្តការហ្វឹកហាត់ជាមួយស្វាមីរបស់នាង ដើម្បីត្រៀមសម្រាប់កីឡាអូឡាំពិកតូក្យូ។ ស្វាមីរបស់នាងឈ្មោះ Arseniy Zdanevich ដែលជាអតីតកីឡាកររត់ប្រណាំងមួយរូប ឥឡូវនេះបានភៀសខ្លួនចេញពីបេឡារូសទៅកាន់ប្រទេសអ៊ុយក្រែន។
នៅពេលដែលរដ្ឋាភិបាលបង្ក្រាបដោយហិង្សាទៅលើបាតុកម្ម លោកស្រី Timanovskaya មិនបានចូលរួមជាមួយកីឡាករបេឡារូសជាង ១០០០ នាក់ចុះហត្ថលេខាលើលិខិតចំហមួយទាមទារឱ្យមានការបោះឆ្នោតជាថ្មី និងបញ្ចប់ការធ្វើទារុណកម្មនិងការចាប់ខ្លួនបាតុករ។
ក្នុងការសម្ភាសន៍នានា នាងបានជៀសវាងពីការរិះគន់លោកប្រធានាធិបតី Lukhashenko និងកូនប្រុសរបស់លោក គឺលោក Viktor Lukhashenko ដែលជាប្រធានគណៈកម្មការអូឡាំពិកបេឡារូស។ អ្នកវិភាគមួយចំនួនបានគិតថាលោកស្រី Timanovskaya បានធ្វើការជៀសវាងនេះ ដោយសារនាងការព្រួយបារម្ភអំពីសុវត្ថិភាពរបស់ឪពុកម្ដាយ និងគ្រួសាររបស់នាងនៅបេឡារូស៕
