អ្នកតវ៉ាប្រឆាំងនឹងរដ្ឋអំណាចថៃ បន្តធ្វើបាតុកម្មតាមដងផ្លូវ
អ្នកតវ៉ាប្រឆាំងនឹងរដ្ឋអំណាចថៃនៅបន្តធ្វើបាតុកម្មតាមដងផ្លូវ ដោយដង្ហែក្បួនឡាន និងម៉ូតូ កាលពីថ្ងៃអង្គារកន្លងទៅ ដោយបន្តទាមទារឱ្យនាយករដ្ឋមន្ត្រីថៃលោកប្រាយុទ្ធ ចាន់អូឆា ចុះចេញពីតំណែង ក្រោយពីមិនសប្បាយនឹងការឆ្លើយតបនឹងវិបត្តិជំងឺកូវីដ-១៩ ពីសំណាក់រដ្ឋាភិបាលថៃ។ បន្ថែមពីការទាមទារឱ្យលោកប្រាយុទ្ធចុះចេញពីតំណែង ក្រុមបាតុករថៃក៏ទាមទារឱ្យមានកំណែទម្រង់ស្ថាប័នព្រះមហាក្សត្រផងដែរ។
សារព័ត៌មាន Bangkok Post បានចុះផ្សាយថា បាតុកម្មលើកនេះដឹកនាំដោយរណសិរ្សសាមគ្គីធម្មសាស្ត្រ និងការធ្វើបាតុកម្ម។
កាលពីរសៀលថ្ងៃអង្គារ ក្រុមបាតុករបានស៊ីផ្លេឡាន និងម៉ូតូ និងដង្ហែក្បួនតាមដងផ្លូវនៃរាជធានីបាងកក។ យ៉ាងណាមិញ នៅល្ងាចថ្ងៃដដែល ក្រុមបាតុករ និងប៉ូលិសប៉ះទង្គិចគ្នា។ ប៉ូលិសបង្ក្រាបកុប្បកម្មបានប្រើគ្រាប់ជ័រ ឧស្ម័នបង្ហូរទឹកភ្នែក និងរថយន្តបាញ់ទឹក ហើយបើយោងតាមប្រភពពីប៉ូលិសថៃ ក្រុមអ្នកតវ៉ាបានគប់ដុំថ្ម ផាវ និងគ្រឿងផ្ទុះផ្សេងៗទៅកាន់ខាងប៉ូលិស។
ស្នងការរងនៃប៉ូលិសក្រុងបាងកកលោក Piya Tavichai លើកឡើងថា ខាងប៉ូលិសចំនួន ៦នាក់រងរបួស ខណៈបាតុករ ៦នាក់ត្រូវបានចាប់ខ្លួន ជាមួយនឹងការរឹបអូសម៉ូតូបាតុករសរុប ១០០គ្រឿង។
យ៉ាងណាមិញ គេមិនដឹងច្បាស់ថាបាតុករប៉ុន្មាននាក់ទេ ដែលបានរងរបួសក្នុងការប៉ះទង្គិចគ្នានោះ៕
![](https://asset.ams.com.kh/central/media/c1_2163199_210810201902-1024x683.jpg)
ប្រភព៖ Bangkok Post