វ៉ាក់សាំងជិត១លានដូស ជំនួយអាល្លឺង់ម៉ង់ជូនវៀតណាម បញ្ជូលដល់ហើយ
នាថ្ងៃទី១៦ កញ្ញា ២០២១នេះ វ៉ាក់សាំង AstraZeneca ជាជំនួយរបស់អាល្លឺម៉ង់ជិត១លានដូស តាមរយៈយន្តការកូវ៉ាក់លើកដំបូង ត្រូវបានបញ្ជូនទៅដល់ប្រទេសវៀតណាមហើយ។
ឯកអគ្គរដ្ឋទូតអាល្លឺម៉ង់ប្រចាំវៀតណាម Guido Hildner ត្រូវបានស្ថានទូតដកស្រង់សម្តីថា «អាល្លឺម៉ង់ឈរជាមួយវៀតណាមប្រយុទ្ធ និងយកឈ្នះជំងឺរាតត្បាតកូវីដ១៩។ ពួកយើងអាចយកឈ្នះជំងឺនេះបាន លុះត្រាតែយើងគ្រប់គ្រងវាគ្រប់កន្លែង ដូច្នេះ អាល្លឺម៉ង់និងសហភាពអឺរ៉ុបគាំទ្រយុទ្ធនាការវ៉ាក់សាំង កូវ៉ាក់ សម្រាប់ច្រកចេញប្រកបដោយយុត្តិធម៌និងតម្លាភាព ទូទាំងពិភពលោក»។
វ៉ាក់សាំងអាល្លឺម៉ង់ដែលត្រូវបានបញ្ជូនដល់ក្រុងហាណូយ នាថ្ងៃនេះ គឺចំនួន៨៥២,៤៨០ដូស។ ជាមួយនឹងគោលដៅត្រូវការ១៥០លានដូសនោះ គិតត្រឹមខែសីហា វៀតណាមបានទទួលវ៉ាក់សាំង៣៣លានដូស ពីប្រភពផ្សេងៗ រួមមានទាំងជំនួយរដ្ឋាភិបាល និងកុងត្រាពាណិជ្ជកម្ម ទិញដោយក្រសួងសុខាភិបាល និងក្រុមហ៊ុនក្នុងស្រុក។
រហូតមកដល់ថ្ងៃទី១៥ កញ្ញា មានមនុស្សជាង៣១.២លាននាក់ត្រូវបានចាក់វ៉ាក់សាំង ប៉ុន្តែអ្នកចាក់ដូសទី២ មានជាង៥.៨លាននាក់ប៉ុណ្ណោះ សម្រាប់វៀតណាម៕
