ម៉ាឌ្រីដ៖ ប្រជាជនចន្លោះពី៥ពាន់នាក់ទៅ១ម៉ឺននាក់ត្រូវបានបង្គាប់ឲ្យជម្លៀសចេញពីតំបន់ភ្នំភ្លើង ឃ្យូមប្រេ វីអេហូ (Cumbre Viejo) ស្ថិតនៅលើកោះ ឡា ប៉ាល់ម៉ា (La Palma) របស់ប្រទេសអេស្ប៉ាញ បន្ទាប់ភ្នំភ្លើងនៅលើនេះបានចាប់ផ្តើមផ្ទុះ និងបញ្ចេញកម្អែលយ៉ាងក្តៅគគុកនៅរសៀលថ្ងៃអាទិត្យម្សិលមិញ។

ពាក់ព័ន្ធនឹងហេតុការណ៍នេះដែរ នាយករដ្ឋមន្រ្តីអេស្ប៉ាញលោក Pedro Sanchez បានមកដល់កោះនេះនៅម៉ោងប្រហែល ៩ យប់ បន្ទាប់ពីលុបចោលគម្រោងធ្វើដំណើរទៅសហរដ្ឋអាមេរិក ជាទីដែលលោកនឹងទៅចូលរួមមហាសន្និបាតអង្គការសហប្រជាជាតិ។ ប្រជុំកោះ Canary ដែលមានកោះ La Palma នៅក្នុងនោះ គឺជាដែនដីកម្មសិទ្ធិរបស់ប្រទេសអេស្ប៉ាញ ស្ថិតនៅក្នុងដែនសមុទ្រអាត្លង់ទិច នៃភាគពាយ័ព្យទ្វីបអាហ្វ្រិក។

បើតាមអាជ្ញាធរអេស្ប៉ាញ ការបង្គាប់ឲ្យមនុស្សម្នាជម្លៀសខ្លួនចេញត្រូវបានធ្វើឡើងបន្ទាប់ពីភ្នំភ្លើង Cumbre Viejo ផ្ទុះឡើងកាលពីវេលាម៉ោង ៣៖១២នាទីរសៀលថ្ងៃអាទិត្យម្សិលមិញ (ម៉ោងក្នុងតំបន់)។ ការផ្ទុះលើកនេះ បានកើតឡើងបន្ទាប់ពីអាជ្ញាធរតាមដានសកម្មភាពភ្នំភ្លើងបានរាយការណ៍ថា កោះ La Palma ដែលជាកោះក្មេងជាងគេក្នុងតំបន់ប្រជុំកោះ កាណារី (Canary islands) បានរងការញ័ររញ្ជួយដីរហូតដល់ទៅជាង២ម៉ឺនដងនៅក្នុងរយៈពេល១សប្តាហ៍មកនេះ៕ ប្រភព៖ CGTN