ភ្នំពេញៈក្រសួងព្រះបរមរាជវាំងបានបញ្ជាក់ថាក្នុងរយៈពេលថ្មីៗនេះមានអត្ថបទកាសែតបរទេសមួយចំនួនបានចុះផ្សាយពាក់ព័ន្ធដល់ព្រះអង្គម្ចាស់រជ្ជទាយាទ “Prince Héritier” នៃព្រះរាជាណាចក្រកម្ពុជា មួយព្រះអង្គបានដាក់ស្នើសុំទិញ ក្លឹបបាល់ទាត់ AS Saint-Etienneរបស់ប្រទេសបារាំងក្នុងតម្លៃ១០០លានអឺរ៉ូ។ នេះបើយោងតាមសេចក្តីប្រកាស ព័ត៌មានរបស់ ក្រសួងព្រះបរមរាជវាំងនៅថ្ងៃទី២០ ខែកញ្ញា ឆ្នាំ២០២១។

ក្រសួងព្រះបរមរាជវាំងបានបញ្ជាក់ថា យោងតាមរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ស្ដីពីការរៀបចំនិង ការប្រព្រឹត្តទៅរបស់ក្រុមប្រឹក្សារាជសម្បត្តិ នៃព្រះរាជាណាចក្រកម្ពុជា មិនមានចែងអំពីការចាត់តាំងព្រះរជ្ជទាយាទ “Prince Héritier” ទេ ហើយក៏ពុំមានចែងអំពីស្ថាប័ន ឬ បុគ្គលណាមួយមានសិទ្ធិអំណាចចាត់តាំងព្រះរជ្ជទាយាទឡើយ ៕ ដោយៈ ពល ជ័យ