ហេតុអ្វីបានជា វ៉ាក់សាំង Covaxin បរាជ័យក្នុងការប្រយុទ្ធប្រឆាំងនឹងកូវីដនៅឥណ្ឌា?
វ៉ាក់សាំង Covaxin របស់ក្រុមហ៊ុន Bharat Biotech នៃប្រទេសឥណ្ឌា ត្រូវគេចាត់ទុកថាបរាជ័យក្នុងការប្រយុទ្ធប្រឆាំងនឹងការរីករាលដាលនៅប្រទេសឥណ្ឌា ដោយយោងតាមមូលហេតុមួយចំនួនដូចជា ដំណើរការស្មុគស្មាញ អង្គភាពផលិតរប៉ាត់រប៉ាយ កង្វះតំបន់សុវត្ថិភាព និងកង្វះបុគ្គលិក ដែលមានជំនាញជាដើម។ នេះបើតាមឱ្យដឹងពីសារព័ត៌មានឥណ្ឌា News18។
កាលពីដើមឆ្នាំ ២០២១ នាយកគ្រប់គ្រងរបស់ក្រុមហ៊ុនឱសថឥណ្ឌា Bharat Biotech លោកវេជ្ជបណ្ឌិត Krishna Ella បាននិយាយនៅក្នុងសន្និសីទសារព័ត៌មានតាមប្រព័ន្ធអនឡាញថា ក្រុមហ៊ុនលោក មានបំណងផលិតវ៉ាក់សាំងចំនួន ៧០០ លានដូសក្នុងឆ្នាំ ២០២១។
ទន្ទឹមនឹងនេះ វ៉ាក់សាំង Covaxin ដែលជាវ៉ាក់សាំងផលិតក្នុងប្រទេសដំបូងបង្អស់ ត្រូវបានគេចាត់ទុកថា ដើរតួយ៉ាងសំខាន់នៅក្នុងយុទ្ធនាការវ៉ាក់សាំងដ៏ធំរបស់ប្រទេសនេះ។ ផ្ទុយទៅវិញ វ៉ាក់សាំង Covishield ដែលបង្កើតឡើងដោយសាកលវិទ្យាល័យ Oxford របស់ចក្រភពអង់គ្លេស និងវ៉ាក់សាំង AstraZeneca ផលិតដោយវិទ្យាស្ថានសឺរ៉ូមឥណ្ឌា បានក្លាយជាឆ្អឹងខ្នងសំខាន់ក្នុងយុទ្ធនាការវ៉ាក់សាំងនេះទៅវិញ។ នេះក៏ដោយសារ វ៉ាក់សាំង Covaxin មានតម្លៃថ្លៃជាងគេបំផុតនៅឥណ្ឌា ហើយស្តុកក៏មានកំណត់ដែរ។
ក្រសួងសុខាភិបាលសហជីព ក៏ធ្លាប់បានជូនដំណឹងដល់តុលាការកំពូលថា ដំបូងបង្អស់ក្រុមហ៊ុន Bharat Biotech បានផលិតវ៉ាក់សាំងចំនួន ៩០.០០០ ដូសជារៀងរាល់ខែ និងបានបង្កើនផលិតភាពដល់ទៅ ២ លានដូសត្រឹមខែឧសភា។ ប៉ុន្តែ ក្រោយមកក្រុមហ៊ុន នៅតែមិនអាចផលិតទៅតាមចំនួនដែលខ្លួនបានសន្យា។
អ្នកស្រី Malini Aisola អ្នករៀបចំបណ្តាញសកម្មភាពឱសថនៅឥណ្ឌាទាំងអស់នៃអង្គការក្រៅរដ្ឋាភិបាល បាននិយាយថា៖ «រដ្ឋាភិបាល បាននិយាយពន្លើសអំពីបរិមាណនៃការផលិតវ៉ាក់សាំង Covaxin ខណៈក្រុមហ៊ុនក៏បានធ្វើការអះអាងយ៉ាងខ្លាំងអំពីសមត្ថភាពនៃការផលិត និងការត្រៀមខ្លួនសម្រាប់បន្ថែមកន្លែងផលិតថ្មី។ យ៉ាងណាមិញ បើមើលតាមការអះអាង និងចំនួនផលិត បច្ចុប្បន្ននៅតែមិនស៊ីចង្វាក់គ្នា»។
នៅក្នុងបទសម្ភាសន៍ ជាមួយស្ថានីយទូរទស្សន៍ CNBC-TV18 វេជ្ជបណ្ឌិត Ella នាយកគ្រប់គ្រងនៃក្រុមហ៊ុននេះ បាននិយាយថា៖ «វ៉ាក់សាំងអសកម្ម គឺជាវ៉ាក់សាំងមួយ ដែលពិបាកផលិតបំផុតនៅលើពិភពលោក»។ អ្នកជំនាញចំនួន ៦ នាក់ ផ្សេងទៀត នៅសារព័ត៌មាន News18 ក៏បានយល់ស្របនឹងលោកដូចគ្នា។
លោកបានបន្តថា៖ «យើងកំពុងធ្វើការជាមួយក្រុមហ៊ុនផ្សេងទៀត។ ប្រសិនបើពួកគេទាំងអស់ផ្តល់ជូនដូច ដែលយើងបានរំពឹងទុក យើងអាចនឹងផលិតវ៉ាក់សាំងដល់តួរលេខ ១០០ លានដូសនៅចុងឆ្នាំនេះ»។
ក្រុមហ៊ុនផលិតវ៉ាក់សាំងតាមវិស័យសាធារណៈ ដែលបានសហការជាមួយក្រុមហ៊ុន Bharat Biotech ដើម្បីផលិតវ៉ាក់សាំង Covaxin បានព្យាយាមនាំចូលឧបករណ៍ ដែលប្រើក្នុងជំហានបន្សុទ្ធវ៉ាក់សាំង។ លោកបានបន្តថា៖ «ប្រាំមួយខែមុន យើងបានបញ្ជាទិញឧបករណ៍ទាំងនេះ ដែលត្រូវបានដឹកជញ្ជូនក្នុងរយៈពេល ៤៥ ថ្ងៃ។ ឥឡូវនេះសម្រាប់ការបញ្ជូនឧបករណ៍ដូចគ្នាដដែលនេះ អ្នកលក់ត្រូវការពេលយ៉ាងតិចពី ៦ ទៅ ៨ ខែឯណោះ»។
ម៉្យាងវិញទៀត បញ្ហាកង្វះធនធានមនុស្សក៏សំខាន់ដែរ។ តួរយ៉ាង ឧស្សាហកម្មវ៉ាក់សាំងបែបនេះ ត្រូវការបុគ្គលិកសំខាន់ៗតែ ៧-៨ នាក់ប៉ុណ្ណោះ ប៉ុន្តែត្រូវតែជាអ្នក ដែលមានទេពកោសល្យ និងជំនាញក្នុងការងារនេះ។ ឥឡូវនេះមនុស្សគ្រប់គ្នា កំពុងចែកជើងគ្នា ដោយសារមនុស្សតិច ព្រមទាំងប្រាក់ខែមិនសមរម្យ។ នេះបើតាមឱ្យដឹងពី មន្រ្តីមកពីអង្គភាពផ្គត់ផ្គង់សម្ភារៈ។
យ៉ាងណាមិញ វេជ្ជបណ្ឌិត Ella បានបញ្ជាក់នៅក្នុងបទសម្ភាសន៍របស់ស្ថានីយទូរទស្សន៍ CNBC-TV18 ថា៖ «ធនធានមនុស្សពិតជាពិបាករកមែន ដោយសារដំណើរការផលិត Covaxin ត្រូវការអ្នកជំនាញខ្ពស់ ដើម្បីធ្វើតេស្តចំនួន ២០០ ដង លើការត្រួតពិនិត្យគុណភាពវ៉ាក់សាំង ដែលផលិតបាន»។
ក្រៅពីនេះ ការចិញ្ចឹមកោសិកាវ៉េរ៉ូឱ្យលូតលាស់ គឺជាបញ្ហាប្រឈមមួយទៀត អ្នកជំនាញវិទ្យាសាស្ត្រ និងឧស្សាហកម្មបានលើកឡើង។ អតីតប្រធានក្រុមហ៊ុនផលិតវ៉ាក់សាំង និងបច្ចុប្បន្នជាអ្នកប្រឹក្សាឱសថ បាននិយាយថា៖ «ចំពោះវ៉ាក់សាំង ដែលមានមូលដ្ឋានលើវ៉ិចទ័រ adenovirus ដំណើរការនេះ មានលក្ខណៈសាមញ្ញ ហើយមេរោគត្រូវតែលូតលាស់ប្រមូលផលបន្សុត និងបង្កើតរូបមន្ត។ មិនចាំបាច់ធ្វើឱ្យអសកម្មទេ ហើយជំហានផ្សេងទៀតក៏ងាយស្រួលជាង ការផលិតវ៉ាក់សាំងអសកម្មដែរ»។
បញ្ហាមួយទៀតគឺ អង្គភាពផលិតកម្មច្រើនពេក។ បើយោងតាមអ្នកជំនាញឧស្សាហកម្ម ក្រុមហ៊ុន Bharat Biotech បានបំបែកអង្គភាពផលិតកម្មរបស់ខ្លួនទៅជាយូនីតច្រើន ដែលមានមូលដ្ឋាននៅឆ្ងាយពីទីស្នាក់ការកណ្តាលរបស់ក្រុមហ៊ុននៅទីក្រុង Hyderabad ។
ប្រភពដដែលបានឱ្យដឹងថា ការធ្វើដូចនេះ ធ្វើឱ្យបាត់បង់ការផ្តោតអារម្មណ៍នៅពេល ដែលការផលិតរបស់អ្នកត្រូវបានបែងចែកជាអង្គភាពច្រើនពេក ដែលមានទីតាំងនៅទូទាំងរដ្ឋ ហើយត្រូវពិសោធន៍ក្នុងពេលតែមួយ ដែលបង្កឱ្យមានការលំបាកខ្លាំង ទាំងការផ្គត់ផ្គង់វត្ថុធាតុដើម ការត្រួតពិនិត្យ ការផលិត ការធ្វើតេស្ត និងការដឹកជញ្ជូន។
បន្ថែមពីនេះ អ្នកជំនាញផ្នែកសុខភាព បានស្តីបន្ទោសរដ្ឋាភិបាល ចំពោះការគាំទ្រក្រុមហ៊ុន Bharat Biotech ហួសហេតុ។ អ្នកជំនាញសុខភាពសាធារណៈ អ្នកស្រី Malini Aisola បាននិយាយថា៖ « ការគាំទ្រលើការអភិវឌ្ឍន៍ និងការសាកល្បងព្យាបាល ការពន្លឿន ការអនុម័តបទប្បញ្ញត្តិ ដែលការធ្វើដូចនេះគឺដើម្បីរក្សាភាពផ្តាច់មុខលើវ៉ាក់សាំង ដែលត្រូវបានបង្កើតរួមគ្នាជាមួយស្ថាប័នរដ្ឋាភិបាល»។
