ឧស្សាហកម្មស្រោមដៃម៉ាឡេស៊ីអំពាវនាវឱ្យមានការស្រូបយកកម្លាំងពលកម្មពីបរទេស
គូឡាឡាំពួ៖ សមាគមន៍អ្នកផលិតស្រោមដៃកៅស៊ូម៉ាឡេស៊ី (MARGMA) កាលពីថ្ងៃអង្គារ អំពាវនាវដល់រដ្ឋាភិបាលឱ្យអនុញ្ញាតកម្មករបរទេសចូលប្រទេសដើម្បីបំពេញតម្រូវការដែលកំពុងកើនឡើងនៅឆ្នាំនេះ និងឆ្នាំក្រោយ ដោយលើកឡើងពីកង្វះខាតកម្មករចំនួន ២៥ ០០០ នាក់រាប់ចាប់តាំងពីឆ្នាំ ២០១៩ មក។
ប្រធានសមាគមលោក Supramaniam Shanmugam និយាយក្នុងសេចក្តីថ្លែងការណ៍ថា កម្មករបន្ថែមត្រូវការជាបន្ទាន់ ហើយក្រុមហ៊ុនត្រូវរៀបចំដើម្បីបំពេញលក្ខខណ្ឌ និងតម្រូវការសម្រាប់ដំណើរការជ្រើសរើសកម្មករ រួមទាំងនីតិវិធីទាក់ទងនឹងជំងឺកូវីដ-១៩។
លោកនិយាយថា៖ «យើងមានសមត្ថភាពផលិត ប៉ុន្តែមិនមានកម្មករគ្រប់គ្រាន់ដើម្បីប្រើប្រាស់សមត្ថភាពផលិតឲ្យបានច្រើនបំផុតនោះទេ»។ លោកបន្ថែមថា កម្មវិធីជ្រើសរើសបុគ្គលិកក្នុងស្រុកមានអត្រាទទួលយកទាបជាងគោលដៅកម្មករ ១០ ០០០ នាក់។
ផលិតកម្មនៅម៉ាឡេស៊ីដូចជាវិស័យដូងប្រេង ពឹងផ្អែកយ៉ាងខ្លាំងទៅលើពលករចំណាកស្រុកដែលមិនអាចចូលប្រទេសនេះបានចាប់តាំងពីជំងឺរាតត្បាតចាប់ផ្តើមមក។ ក្រុមហ៊ុនដូងប្រេងក៏បានជំរុញឱ្យរដ្ឋាភិបាលអនុញ្ញាតឱ្យពលករបរទេសត្រឡប់មកវិញ។
ក្នុងខែកញ្ញានេះ រដ្ឋាភិបាលបានប្រកាសការព្រមព្រៀងពិសេសមួយដើម្បីនាំយកពលករបរទេសចំនួន ៣២ ០០០ នាក់សម្រាប់វិស័យចំការ។
សមាគមន៍ MARGMA អោយដឹងថា អ្នកផលិតស្រោមដៃកៅស៊ូរបស់ម៉ាឡេស៊ីកំពុងប្រឈមនឹងការប្រកួតប្រជែងខ្លាំងពីប្រទេសចិន ហេតុដូច្នេះពួកគេត្រូវការរក្សាសមត្ថភាពដើម្បីបំពេញតាមការបញ្ជាទិញ។ ម៉ាឡេស៊ីផ្គត់ផ្គង់ប្រហែល ២ ភាគ ៣ នៃការប្រើប្រាស់ស្រោមដៃកៅស៊ូលើពិភពលោក។
សមាគមន៍នេះបន្តថា ដោយសារតែស្វ័យប្រវត្តិកម្មឧស្សាហកម្មនេះ អាចរក្សាបាននូវកម្លាំងពលកម្មប្រហែល ៧២ ០០០ នាក់ចាប់តាំងពីឆ្នាំ ២០១៣មក ខណៈបរិមាណស្រោមដៃផលិតនិងនាំចេញកើនឡើងពី ១០-១៥ ភាគរយក្នុងមួយឆ្នាំ។
