នីហ្សេរីយ៉ាទទួលហិរញ្ញប្បទាន ៤០០ លានដុល្លារពីធនាគារពិភពលោកដើម្បីប្រយុទ្ធប្រឆាំងជំងឺកូវីដ-១៩
ធនាគារពិភពលោកនិយាយក្នុងសេចក្តីថ្លែងការណ៍មួយថា ធនាគារយល់ព្រមផ្ដល់ហិរញ្ញប្បទានចំនួន ៤០០ លានដុល្លារទៅឱ្យប្រទេសនីហ្សេរីយ៉ាកាលពីថ្ងៃសុក្រ ដើម្បីទិញ និងចែកចាយវ៉ាក់សាំងការពារជំងឺកូវីដ-១៩។
ក្រុមប្រឹក្សាភិបាលរបស់ធនាគារពិភពលោក ចុះហត្ថលេខាលើការផ្តល់ហិរញ្ញប្បទានដែលនឹងផ្ដល់តាមរយៈសមាគមអភិវឌ្ឍន៍អន្តរជាតិ ដើម្បីជួយឱ្យប្រទេសដែលមានប្រជាជនច្រើនបំផុតនៅទ្វីបអាហ្វ្រិកមួយនេះ អាចទិញវ៉ាក់សាំងការពារជំងឺកូវីដ-១៩សម្រាប់ប្រជាជនចំនួន ៤០ លាននាក់ ឬប្រហែលនឹង ១៨ ភាគរយនៃប្រជាជនសរុប រួមទាំងគាំទ្រដល់ការចែកចាយវ៉ាក់សាំងដល់មនុស្ស ១១០ លាននាក់ផង។
ធនាគារនិយាយក្នុងសេចក្តីថ្លែងការណ៍ដដែលថា ហិរញ្ញប្បទាននេះនឹងធានាថារដ្ឋាភិបាលអាចចាក់វ៉ាក់សាំងដល់ប្រជាជនចំនួន ៥១% ក្នុងរយៈពេលពីរឆ្នាំ ហើយអាចចៀសវាងផលវិបាកនៃការបិទខ្ទប់មួយផ្សេងទៀតដែលបណ្តាលឱ្យមានផលប៉ះពាល់ដល់សេដ្ឋកិច្ចប្រទេស។
កាលពីខែមុន រដ្ឋាភិបាលនីហ្សេរីយ៉ានិយាយថា ប្រហែល២០ភាគរយនៃកម្មករនៅក្នុងប្រទេសបាត់បង់ការងាររបស់ខ្លួនដោយសារជំងឺកូវីដ-១៩។
មកទល់ពេលនេះ នីហ្សេរីយ៉ាទើបតែផ្តល់វ៉ាក់សាំងចំនួន ៥ លានដូសដល់ប្រជាជន ២០០ លាននាក់របស់ខ្លួនប៉ុណ្ណេះ ហើយកំពុងចែកចាយវ៉ាក់សាំង Moderna និង AstraZeneca រាប់លានដូសទៀត ដែលខ្លួនទទួលបានតាមរយៈគម្រោង COVAX ដែលមានគោលបំណងផ្តល់វ៉ាក់សាំងដល់ប្រទេសកំពុងអភិវឌ្ឍ។ ប្រទេសនេះក៏មានវ៉ាក់សាំង Johnson & Johnson ចំនួន ១,១២ លានដូស ដែលខ្លួនទិញតាមរយៈកម្មវិធីសហភាពអាហ្រ្វិក ហើយគ្រោងនឹងទទួលវ៉ាក់សាំង Sinopharm ចំនួន ៧,៧ លានដូសទៀតតាមរយៈ COVAX ។
គិតត្រឹមថ្ងៃទី ០១ ខែតុលា នីហ្សេរីយ៉ាមានអ្នកឆ្លងជំងឺកូវីដ-១៩សរុបចំនួន ២០៥ ៧៧៩ ករណី និងស្លាប់ ២ ៧២១ ករណី។
ប្រភព៖ Reuters
