នូវែលសេឡង់រាយការណ៍អ្នកឆ្លងកូវីដ-១៩ថ្មី ២៧ ករណី ចំពេលមានការតវ៉ាប្រឆាំងនឹងវិធានការបិទខ្ទប់របស់រដ្ឋាភិបាល
មន្រ្តីនូវែលសេឡង់រាយការណ៍អ្នកឆ្លងជំងឺកូវីដ-១៩វ៉ារ្យ៉ង់ដែលតាថ្មីចំនួន ២៧ ករណី នៅទីក្រុង Auckland កាលពីថ្ងៃសៅរ៍ ខណៈក្រុមអ្នកតវ៉ាធ្វើបាតុកម្មនៅតាមដងផ្លូវដើម្បីប្រមូលផ្តុំគ្នាប្រឆាំងនឹងវិធានការបិទខ្ទប់ជិតពីរខែក្នុងក្រុងដ៏ធំបំផុតរបស់ប្រទេសមួយនេះ។
ប្រជាជនទាំង ១,៧ លានរស់នៅក្នុងក្រុងកំពុងតែរងចាំមើលការសម្រេចចិត្តរបស់រដ្ឋាភិបាលនៅថ្ងៃចន្ទនេះថាតើខ្លួននឹងត្រូវបិទប្រទេសនូវែលសេឡង់ដែរឬយ៉ាងណា ស្របពេលដែលករណីឆ្លងប្រចាំថ្ងៃប្រែប្រួលចន្លោះពី ៨ ទៅ ៤៥ នាក់ក្នុងក្រុងរយៈពេលប៉ុន្មានថ្ងៃចុងក្រោយនេះ សរុប ១ ២៩៥ ករណី។
លោកស្រីនាយករដ្ឋមន្រ្តី Jacinda Ardern អនុវត្តវិធានការបិទខ្ទប់ក្នុងរយៈពេលខ្លីទូទាំងប្រទេសកាលពីពាក់កណ្តាលខែសីហា ជាការឆ្លើយតបទៅនឹងការផ្ទុះឡើងនៃវីរុសក្នុងទីក្រុង Auckland ។ ប៉ុន្តែខណៈមួយភាគធំនៃប្រទេសត្រឡប់មករកស្ថានភាពធម្មតាវិញ ទីក្រុងនេះនៅតែស្ថិតក្នុងការបិទខ្ទប់។
ប្រព័ន្ធផ្សព្វផ្សាយនូវែលសេឡង់រាយការណ៍ថា មនុស្សប្រហែល ១ ០០០ នាក់ប្រមូលផ្តុំគ្នានៅក្នុងទីក្រុង ទាមទារឱ្យលុបចោលវិធានការបិទខ្ទប់ ប៉ុន្តែមិនមានសេចក្តីរាយការណ៍អំពីអំពើហិង្សា ឬការចាប់ខ្លួនឡើយ។ ការប្រមូលផ្តុំគ្នាក៏គ្រោងនឹងប្រព្រឹត្តទៅនៅរដ្ឋធានី Wellington និងទីក្រុង Christchurch ផងដែរ។
ខណៈដែលប្រទេសនូវែលសេឡង់ស្ថិតក្នុងចំណោមប្រទេសមួយចំនួនតូច ដែលទប់ស្កាត់ការរាលដាលនៃវីរុសបានល្អរហូតដល់សូន្យករណីកាលពីឆ្នាំមុនរហូតដល់មានការផ្ទុះឡើងចុងក្រោយនៅខែសីហា ការលំបាកក្នុងការបញ្ឈប់វ៉ារ្យ៉ង់ដែលតា ធ្វើឱ្យលោកស្រី Ardern រុញរាក្នុងការលុបចោលយុទ្ធសាស្ត្របិទខ្ទប់របស់ខ្លួន។
នាយករដ្ឋមន្រ្តីរូបនេះនិយាយថា ការរឹតត្បឹតលើការបិទខ្ទប់ត្រូវបានបន្ធូរបន្ថយ លុះត្រាតែ ៩០ភាគរយនៃចំនួនប្រជាជនដែលអាចចាក់វ៉ាក់សាំងបាន ទទួលវ៉ាក់សាំងពេញលេញ ខណៈដែលបច្ចុប្បន្ននេះមានត្រឹមតែ ៤៦ ភាគរយប៉ុណ្ណេះ។
ប្រភព៖ Reuters