ប៉ាគីស្ថានបើកការពិភាក្សាជាមួយតាលីបង់ បើទោះបីជាការវាយប្រហារកើនឡើងក៏ដោយ
កាលពីថ្ងៃសុក្រ ទី១ តុលានាយករដ្ឋមន្ត្រីប៉ាគីស្ថានលោកអ៊ីមរ៉ាន ខានបាននិយាយថារដ្ឋាភិបាលរបស់លោកបានបើកការពិភាក្សាជាមួយសាខាប៉ាគីស្ថានរបស់ក្រុមតាលីបង់ ដែលជាក្រុមពីក្រោយការវាយប្រហារសាហាវបំផុតនៅប្រទេសនេះ ហើយលោកក៏បានសន្យាលើកលែងទោសសម្រាប់សមាជិកដែលដាក់អាវុធចុះ។
បើទោះបីគ្មានព័ត៌មានលម្អិតអំពីការចរចារវាងរដ្ឋាភិបាលប៉ាគីស្ថាន និងក្រុមតេហរីកអ៊ីតាលីបង់ប៉ាគីស្ថាន ឬ TTP ក៏ដោយ ក៏ការប្រកាសនេះជាការវិវត្តដ៏សំខាន់មួយ ចាប់តាំងពីការបរាជ័យកិច្ចខិតខំប្រឹងប្រែងកាលពីឆ្នាំ ២០១៤ ដែលឈានដល់ការប៉ះទង្គិចយោធាខ្នាតធំ។
ក្នុងការសម្ភាសន៍ជាមួយសារព័ត៌មានរដ្ឋតួកគី TRT World លោកខានបាននិយាយថា៖ «មានក្រុមច្រើនផ្សេងៗគ្នាដែលបង្កើតជាតាលីបង់ប៉ាគីស្ថាន ឬ TTP។ យើងកំពុងពិភាក្សាជាមួយក្រុមខ្លះអំពីដំណើរការផ្សះផ្សាជាតិ។ យើងប្រហែលជាមិនអាចឈានដល់ការសន្និដ្ឋាន ឬដំណោះស្រាយណាមួយនៅទីបញ្ចប់ទេ ប៉ុន្តែយើងកំពុងនិយាយគ្នា»។
ភ្លាមៗបន្ទាប់ពីការសម្ភាសន៍របស់លោកខាន ក្រុម TTP បានចេញសេចក្ដីថ្លែងការណ៍មួយដើម្បីជំរុញសមាជិករបស់ខ្លួនឱ្យបន្តធ្វើការវាយប្រហារទៅលើយោធាប៉ាគីស្ថាន។ ក្នុងសេចក្ដីថ្លែងការណ៍នេះ ក្រុម TTP ក៏បានច្រានចោលការរាយការណ៍អំពីការបែកបាក់ផ្ទៃក្នុង ហើយមិនបានធ្វើការទទួលស្គាល់អំពីការចរចាជាមួយរដ្ឋាភិបាល។ ពួកគេក៏បានធ្វើការប្រកាសទទួលខុសត្រូវអំពីការវាយប្រហារទៅលើក្បួនរថយន្តយោធាប៉ាគីស្ថានកាលពីថ្ងៃសុក្រ។
ក្រុម TTP និងក្រុមតាលីបង់អាហ្វហ្គានីស្ថានគឺជាក្រុមពីរផ្សេងគ្នា ប៉ុន្តែមាននិន្នាការ និងដើមកំណើតតែមួយ ហើយមានទំនាក់ទំនងយ៉ាងជិតស្និត។ បើទោះបីជាក្រុម TTP ជាសត្រូវរបស់រដ្ឋាភិបាលប៉ាគីស្ថាន ក្រុមតាលីបង់អាហ្វហ្គានីស្ថានគឺជាសម្ព័ន្ធមិត្តយ៉ាងជិតស្និតរបស់ប៉ាគីស្ថាន។ ប្រភពដឹងអំពីការចរចាខាងលើ បាននិយាយថាក្រុមតាលីបង់អាហ្វហ្គានីស្ថានបានដើរតួជាអ្នកសម្របសម្រួលរវាងសត្រូវទាំងពីរ៕
ប្រភព៖ New York Times
