បៃដិនបែរទៅរកនិន្នាការឆ្វេងនិយម ឥឡូវនេះគោលដៅរបស់លោកកំពុងរងការគំរាមកំហែង
នៅពេលដែលលោកចូ បៃដិនចូលកាន់តំណែងជាប្រធានាធិបតីអាមេរិក លោកបានព្យាយាមប្រើប្រាស់ការរីករាលដាលជំងឺកូវីដ-១៩ជាវិបត្តិជាតិមួយដែលនឹងបង្កើតការឯកភាពគ្នាថ្មីមួយនៅក្រុងវ៉ាស៊ីនតោន បន្ធូរបន្ថយការបែកបាក់នយោបាយបង្កដោយការប្រកាន់គណបក្សនិយម និងដើម្បីអនុញ្ញាតឱ្យមានការប្រែប្រួលទៅមុខក្នុងគ្រាដ៏លំបាករបស់ប្រទេស។
ដោយមើលរំលងការបែកបាក់រវាងក្រុមកណ្ដាលនិយម និងឆ្វេងនិយមក្នុងសំឡេងភាគច្រើនដ៏ស្ដើងរបស់គណបក្សប្រជាធិបតេយ្យ លោកបៃដិនបានដាក់ចេញនូវគោលដៅអភិវឌ្ឍសង្គមធំបំផុតក្នុងជំនាន់នេះ ដែលរួមមានការបង្កើនអត្រាអ្នកមានការងារតាមរយៈគម្រោងសាធារណការដ៏ធំដើម្បីជួសជុលហេដ្ឋារចនាសម្ព័ន្ធទ្រុឌទ្រោម ផែនការបណ្ដាញសុវត្ថិភាពសង្គមពីកំណើតដល់ស្លាប់ កម្មវិធីដើម្បីទប់ទល់នឹងការប្រែប្រួលអាកាសធាតុ និងការបង្កើនអត្រាពន្ធទៅលើអ្នកមានដើម្បីសម្រេចគោលដៅទាំងនេះ។
ដើម្បីសម្រេចគោលដៅទាំងនេះ លោកបៃដិនគឺជឿជាក់ទៅលើជំនាញចរចារបស់លោក ដែលត្រូវបានរៀនពីបទពិសោធន៍ ៣៦ ឆ្នាំជាសមាជិកព្រឹទ្ធសភាអាមេរិក ដែលក្នុងកំឡុងពេលនោះលោកបានធ្វើការចរចាជាច្រើនលើកច្រើនសារជាមួយមេដឹកនាំគណបក្សសាធារណរដ្ឋ។
បើទោះជាយ៉ាងនេះក៏ដោយ នៅសប្ដាហ៍នេះ គោលដៅរបស់លោកបៃដិនគឺកំពុងរងការគំរាមកំហែង ដោយសារការបែកបាក់សំឡេងគាំទ្រក្នុងសភា។
ខណៈពេលដែលសមាជិកមួយចំនួននៃគណបក្សសាធារណរដ្ឋ បានបង្ហាញការគាំទ្រចំពោះគម្រោងហេដ្ឋារចនាសម្ព័ន្ធរបស់លោកបៃដិន គណបក្សសាធារណរដ្ឋទាំងមូលបានប្ដេជ្ញាដាច់ខាតប្រឆាំងផែនការបណ្ដាញសុវត្ថិភាពសង្គមរបស់លោក និងការបង្កើនអត្រាពន្ធលើអ្នកមាន។
បន្ថែមពីលើនេះក្រុមឆ្វេងនិយមមានការព្រួយបារម្ភថាក្រុមកណ្ដាលនិយមនៃគណបក្សប្រជាធិបតេយ្យ នឹងបោះឆ្នោតគាំទ្រគម្រោងហេដ្ឋារចនាសម្ព័ន្ធ ប៉ុន្តែនឹងមិនបោះឆ្នោតគាំទ្រផែនការបណ្ដាញសុវត្ថិភាពសង្គម។ ជាលទ្ធផលនៃការព្រួយបារម្ភនេះ ក្រុមឆ្វេងនិយម ដែលមានសំឡេងច្រើនជាងក្រុមកណ្ដាលនិយម បានគំរាមមិនបោះឆ្នោតគាំទ្រគម្រោងហេដ្ឋារចនាសម្ព័ន្ធ ប្រសិនបើក្រុមកណ្ដាលនិយមមិនប្ដេជ្ញាបោះឆ្នោតគាំទ្រផែនការបណ្ដាញសុវត្ថិភាពសង្គម។ ក្រុមទាំងពីរបានអះអាងថាខ្លួនគឺជាអ្នកគាំទ្រគោលដៅរបស់លោកបៃដិន ហើយចោទប្រកាន់ក្រុមមួយទៀតថាកំពុងរារាំងគោលដៅទាំងនេះ។
កត្តាទាំងនេះបានបង្កការរង្គោះរង្គើទៅលើសំឡេងភាគច្រើនដ៏ស្ដើងរបស់គណបក្សប្រជាធិបតេយ្យនៅសភាតំណាង និងសំឡេងភាគច្រើន ៥០-៥០ នៅព្រឹទ្ធសភា។ កាលពីថ្ងៃសុក្រលោកបៃដិន បានធ្វើដំណើរទៅវិមានកាពីតូលដើម្បីជួយផ្សះផ្សាការបែកបាក់រវាងក្រុមទាំងពីរ។ ប៉ុន្តែចុងក្រោយលោក បៃដិន និងប្រធានសភាតំណាងលោកស្រីណាន់ស៊ី ប៉េឡូស៊ីបានយល់ព្រមមិនអនុម័តគម្រោងហេដ្ឋារចនាសម្ព័ន្ធ ប្រសិនបើគ្មានការប្ដេជ្ញាគាំទ្រផែនការបណ្ដាញសុវត្ថិភាពសង្គម។
ការសម្រេចចិត្តបែបនេះបានធ្វើឱ្យក្រុមកណ្ដាលនិយមខឹងសម្បារ ដែលភាគច្រើនគិតថាលោកបៃដិនបានក្បត់ពួកគេទៅគាំទ្រក្រុមឆ្វេងនិយមវិញ។ លោកស្រីកៀសស្ទីន ស៊ីនីម៉ា ដែលជាសមាជិកព្រឹទ្ធសភាកណ្ដាលនិយមដ៏សំខាន់មួយ បាននិយាយថាការសម្រេចចិត្តនេះគឺ «មិនអាចយកលេសបានទេ ហើយគួរឱ្យខកចិត្តយ៉ាងខ្លាំង»។
អ្នកស្រីនិយាយថា៖ «ពេញមួយឆ្នាំនេះមេដឹកនាំបក្សប្រជាធិបតេយ្យបានធ្វើការសន្យាផ្ទុយគ្នាដែលមិនអាចរក្សាបានទាំងអស់ ហើយពេលខ្លះបានធ្វើពុតថាភាពខុសគ្នានៃមតិនៅក្នុងគណបក្សរបស់យើងមិនមានទេ បើទោះបីជាការខ្វែងគំនិតទាំងនោះត្រូវបានបញ្ជាក់ម្តងហើយម្តងទៀតដោយផ្ទាល់និងជាសាធារណៈក៏ដោយ»។
ដោយសារសំឡេងភាគច្រើនរបស់គណបក្សប្រជាធិបតេយ្យគឺស្ដើង ការអនុម័តគោលនយោបាយធំដំណាមួយដូចខាងលើ គឺត្រូវការការគាំទ្រពីសមាជិករបស់ខ្លួនក្នុងសភាទាំងអស់ ហើយមិនអាចមានការមិនគាំទ្រក្នុងចំណោមគណបក្សទេ។ ការសម្រេចចិត្តរបស់លោកបៃដិនអាចបង្កការបាត់បង់ការគាំទ្រពីក្រុមកណ្ដាលនិយម ប៉ុន្តែឥឡូវនេះដើម្បីសម្រេចគោលដៅរបស់ពួកគេ ពួកគេត្រូវរំពឹងលើការគាំទ្ររបស់លោកបៃដិន និងក្រុមឆ្វេងនិយម។ អ្នកវិភាគមួយចំនួនគិតថាបើទោះបីជាមានការបែកបាក់ទាំងនេះ ចុងក្រោយគោលដៅទាំងពីរនឹងត្រូវបានអនុម័ត ដោយក្រុមនីមួយៗ ត្រូវធ្វើការលះបង់មួយចំនួននៃជំហររបស់ពួកគេ៕
ប្រភព៖ New York Times