អ៊ីរ៉ង់ស្នើឱ្យអាមេរិកដោះលែងប្រាក់ជាប់កកជាង១០ ពាន់លានដុល្លារ ក្នុងការចរចានុយក្លេអ៊ែរ
កាលពីថ្ងៃសៅរ៍ ទី២ តុលារដ្ឋមន្ត្រីការបរទេសអ៊ីរ៉ង់បាននិយាយថាកាលពីខែមុនសហរដ្ឋអាមេរិកបានព្យាយាមបើកការចរចានុយក្លេអ៊ែរឡើងវិញ ប៉ុន្តែលោកបានបដិសេធ ហើយស្នើឱ្យក្រុងវ៉ាស៊ីនតោនលើកលែងការគិតជាទឹកប្រាក់របស់អ៊ីរ៉ង់ជាង១០ពាន់លានដុល្លារ ដែលជាប់កកក្នុងធនាគារបរទេស ជាមុនសិន ដើម្បីបង្ហាញឆន្ទៈល្អ។
អ៊ីរ៉ង់បានបដិសេធធ្វើការចរចាដើម្បីស្ដារកិច្ចព្រមព្រៀងនុយក្លេអ៊ែរ ២០១៥ ដោយផ្ទាល់ជាមួយសហរដ្ឋអាមេរិក ហើយការចរចាដោយប្រយោលបានជាប់គាំងតាំងពីខែមិថុនាមកម្ល៉េះ រដ្ឋមន្ត្រីការបរទេសអ៊ីរ៉ង់លោកហូសសេន អាមីរ៉ាបដូឡាហៀនបានប្រាប់ទូរទស្សន៍រដ្ឋអ៊ីរ៉ង់ថាមន្ត្រីអាមេរិកបានព្យាយាមធ្វើការទាក់ទងមកតាមរយៈភាគីទីបីនៅអង្គការសហប្រជាជាតិ។ លោកបាននិយាយថា៖ «អាមេរិកបានព្យាយាមទាក់ទងយើងតាមរយៈបណ្ដាញផ្សេងៗនៅញូវយ៉ក ហើយខ្ញុំបានប្រាប់អ្នកសម្របសម្រួលថាប្រសិនបើចេតនារបស់អាមេរិកគឺដោយស្មោះ នោះសញ្ញាដោយស្មោះគឺចាំបាច់ ការ ដូចជាការដោះឡែងប្រាក់ជាប់កកជាង ១០ ពាន់លានដុល្លារ»។
លោកអាមីរ៉ាបដូឡាហៀនបាននិយាយថាអ៊ីរ៉ង់នឹងវិលត្រឡប់ទៅការចរចាដោយប្រយោលនៅក្រុងវីយ៉ែនណា ប្រទេសអូទ្រីស «នៅពេលឆាប់ៗនេះ» ប៉ុន្តែមិនបានបញ្ជាក់កាលបរិច្ឆេទច្បាស់លាស់។
ដោយសារតែការដាក់ទណ្ឌកម្មរបស់អាមេរិកទៅលើវិស័យធនាគារ និងថាមពល អ៊ីរ៉ង់មិនអាចដកប្រាក់របស់ខ្លួនរាប់ពាន់លានដុល្លារនៅធនាគារបរទេស ដែលភាគច្រើនជាចំណូលមកពីការនាំចេញប្រេង និងឧស្ម័នធម្មជាតិ។
លក្ខខណ្ឌមួយដែលអ៊ីរ៉ង់បានទាមទារក្នុងការចរចា គឺការដកទណ្ឌកម្មអាមេរិកទាំងអស់ ដែលត្រូវបានដាក់លើប្រទេសអ៊ីរ៉ង់ជាបន្តបន្ទាប់ ចាប់តាំងពីប្រធានាធិបតីអាមេរិកដូណាល់ ត្រាំដកខ្លួនអាមេរិកចេញពីកិច្ចព្រមព្រៀងកាលពីឆ្នាំ ២០១៨៕
ប្រភព៖ Reuters
