អង្គការសុខភាពពិភពលោកបង្កើតក្រុមប្រឹក្សាវិទ្យាសាស្ត្រថ្មី ដើម្បីស៊ើបអង្កេតប្រភពដើមជំងឺថ្មីៗ និងការត្រៀមខ្លួនទប់ស្កាត់រោគរាតត្បាតនាពេលអនាគត
ហ្ស៊ឺណែវ៖ អង្គការសុខភាពពិភពលោក (WHO) នៅថ្ងៃពុធសប្តាហ៍នេះបានស្នើបង្កើតក្រុមអ្នកវិទ្យាសាស្ត្រមួយក្រុម ដើម្បីស៊ើបអង្កេតភ្នាក់ងារបង្កមេរោគថ្មីៗ និងការពារការរាតត្បាតនៃជំងឺឆ្លងនាពេលអនាគត បូករួមទាំងការស៊ើបអង្កេតដែលជាប់គាំងនៃប្រភពដើមរបស់វីរុស Covid-19។
ជាមួយគ្នានេះ អគ្គនាយកអង្គការសុខភាពពិភពលោក (WHO) លោក ថេដ្រូស អាដាណម ហ្គេប្រេយ៉េសឹស បាននិយាយថា ការលេចចេញនូវមេរោគថ្មីៗដែលមានសក្តានុពល ក្នុងការបង្កឱ្យមានជំងឺរាតត្បាត និងរោគរាតត្បាតគឺជាការពិតនៃធម្មជាតិ ហើយខណៈពេលដែលជំងឺកូវីដ១៩ (SARS-CoV-2) គឺជាវីរុសចុងក្រោយនេះ វានឹងមិនមែនជាចុងក្រោយទេ។ លោកបន្ថែមថា ការយល់ដឹងថាតើធាតុបង្កជំងឺថ្មីមានប្រភពមកពីណា គឺជារឿងចាំបាច់បំផុតសម្រាប់ការពារការផ្ទុះឡើងនាពេលអនាគត។ សេចក្តីស្នើសុំនេះបានដាក់ឈ្មោះសមាជិកមនុស្ស២៦រូប មុនពេលកិច្ចពិគ្រោះយោបល់ជាសាធារណៈរយៈពេលពីរសប្តាហ៍ចាប់ផ្តើម ក្នុងនោះមានអ្នកស្រី Marion Koopmans, អ្នកស្រី Thea Fischer និងលោក Hung Nguyen ដែលបានចូលរួមក្នុងការស៊ើបអង្កេតប្រភពដើមនៃជំងឺកូវីដ១៩នៅប្រទេសចិន កាលពីដើមឆ្នាំនេះផងដែរ។
គួរបញ្ជាក់ថា អង្គការសុខភាពពិភពលោក (WHO) បានចាប់ផ្តើមសំណើរនេះកាលពីខែសីហា ដោយបាននិយាយថា ខ្លួនបានកំពុងស្វែងរកសម្រាប់គំនិតវិទ្យាសាស្ត្រដ៏អស្ចារ្យបំផុត ដើម្បីផ្តល់ដំបូន្មានចំពោះការស៊ើបអង្កេតលើប្រភពដើមជំងឺថ្មីៗកាចសាហាវដែលកើតចេញពីសត្វទៅមនុស្ស និងអាចផ្ទុះរាតត្បាតនាពេលខាងមុខទៀត៕ ប្រភព៖ CNA